الموضوع: البرادعي يخون مؤيديه و يتحالف مع الاخوان

المشاركة الأصلية كتبت بواسطة amado ibrahim

تحياتى دون اوتيفا

كلنا فاكرين عبارة

شعب تلمو زمارة وتفرقو عصاية

مبدئيا لازم نعترف انه لولا ثورة تونس مكنش الشعب المصرى فكر فى الخروج والتظاهر

كان لازم نموذج يحتذى به

او ما يعرف بالكتالوج التونسى

هل كان من الممكن لاى قوة او فصيل ان يقنع الشعب المصرى المسالم بالخروج لولا انه رأى بعينه ان الخروج من الممكن ان يحقق نتيجة


ما اظنش

طب ايه اللى فجر الامور فى تونس

هل هو خالد سعيد برده (ده كلام ميخشش العقل)

امال محمد البوعزيزى ده كان بيعمل ايه

واللى طلعو يقلدوه عندنا فى مصر و يولعو فى نفسهم كانو برده بيقلدو خالد سعيد

ده مبدئيا

كل الاشخاص اللى الفيديو بيتكلم عليهم

نبتدى نمسكهم واحد واحد

انا هابتدى معاك من حمزاوى

يا ريت تقولى كام واحد كان ممكن يسمع كلامه

هو شخص اكاديمى لدرجة الملل

نيجى لايمن نور

فاكر انتخابات الرئاسة

هى اللى عرفت الناس بالراجل ده

و جعلت منه ما يشبه السراب للعطشان فى الصحراء

و كانت النتيجة تعرضه لكم هائل من الاضطهاد الممنهج

ولو هو كان راجل امريكا فى المنطقة كانت طلعتو بالعافية من بدرى

مش بعد مكان هيموت فى السجن ويعملهم مصيبة هم فى غنى عنها

و انت عارف ان النظام كان على استعداد يعمل اى حاجة عشان ملف التوريث

نيجى للدكتور البرادعى هو الشخصية الوحيدة اللى حركت الماء الراكد فى السنوات الاخيرة

نظرا لما منحته له جائزة نوبل من شبه حصانة

هذه الحصانة منحته الشجاعة على بدء عملية جمع التوقيعات

الا ان الامر اصابه الفتور

حتى دعوته الاحزاب الكرتونية و التيارات الفاعلة مثل الاخوان لمقاطعة الانتخابات باءت بالفشل

بالاضافة لغيابه المتكرر عن ساحة الاحداث مما افقده البريق الذى اتى به فى فبراير 2010

و لو حضرتك راجعت احداث الثورة هاتعرف كم الغضب اللى وجه للدكتور البرادعى

لانه مكنش موجود يوم 25 و ما تلاه

بل كان ظهوره على الشاشة يوم 28 فى مسجد الاستقامة

يوم 28 او ما يعرف باليوم الفاصل كان ملك للشعب خاصة الاخوان و ما قامو به من حشد

موقع خالد سعيد كان ليه فضل لا يمكن تجاهله فى عملية الحشد للثورة

كذلك مواقع التواصل الالكترونية الاخرى

سيدى الفاضل ان الثورة المصرية كانت بلا قائد

فلا تستطيع ان تنسبها لفصيل معين لنوجه له تلك الاتهامات بالعمالة و الخيانة

لكل منهم دور قام به

بل كان من الممكن ان يقتل فى تلك الاحداث

لو حضرتك حضرت يوم 28 كنت هاتعرف قصدى ايه

قنابل الغازو خراطيم المياه وطلقات الخرطوش مكنتش بتفرق

ياما شباب منعرفش انتمائتهم ماتو او اتصابو

محدش كان بيقول اللى العربية دهستو ده 6 ابريل ولا اخوان

قنابل الغاز و خرطوم المياه اللى انضرب فى وش البرادعى مكنش بيفرق بينه و بين اللى كانو جنبه

نيجى ل 6 ابريل

التهمة الموجهة لهم انهم اتدربو فى صربيا

اتدربو على ايه

و مين اللى دربهم

وهل اللى اتدربو عليه فرق فى الثورة

هل استفدنا منه

هل ظهرت دلائله فى الثورة

والا احنا بنضحك على نفسينا

والا احنا فضلنا برده بنقلد الكتالوج التونسى

انا مش قادر انسى نصيحة الشباب التونسى عن التظاهر ليلا لارهاق قوات الامن

و الاستمرار فى تلك التظاهرات الليلية

الى ان اتت جمعة الغضب وقد انهكت هذه القوات تماما

و كان من السهل جعلها تهرب من ميدان المعركة فى اكبر هروب فى التاريخ


كل ده اتدربت عليه 6 ابريل فى صربيا

و الا احنا اخدناه من التوانسة

مقاومة الغازات المسيلة للدموع

6 ابريل اللى قالت الطريقة والا التوانسة

محاولات التشويه المستمرة ايه الهدف منها

راجع معايا من البداية

الاول السلفيين

و بعدين الاخوان

و بعدين كفاية

و بعدين 6 ابريل

و طبعا ايمن نور والبرادعى من زمان

تسلسل حملات الهجوم

و طريقة الفيديوهات

و نوعية المقالات

و اهداف الهجوم

كلها تشير لدولة امن الدولة اللى عايزة ترجع

محدش اتكلم عن الانتخابات المزورة

عن بطش الشرطة

عن تدخلات امن الدولة

عن فساد الكبار

عن مشروع التوريث

تفتكر مين اللى اغفل دور هذه الملفات فى قيام الثورة

سيدى ابحث عن المستفيد من هذه الحملات

المستفيد الذى ظل يتعامل مباشرة مع المخابرات الامريكية

و اجهزة الامن القومى الامريكى لسنوات طويلة

تعامل امتد لقيامهم بالاعمال القذرة التى كانت ترفض الدول التى تحترم نفسها ان تحدث على اراضيها

عايز رأى

امريكا هى اللى بتروج انها من صنعت ثورة مصر

بتعمل دعاية لنفسها

عارف ليه

عشان الحكام اللى خايفين على عروشهم يدفعو عشان متحصلش عندهم ثورات

مش مصدقنى

شوف السعودية اشترت من امريكا والاتحاد الاوربى سلاح بقيمة كام مليار دولار السنة دى

مما عرف بأكبر صفقة اسلحة فى تاريخ الشرق الاوسط

فهمت مين اللى بيعمل دعاية لنفسه

هو فيه حد يطلع يقول اللى قالته الست باترسون الا اذا كان وراه غرض

معداش الاسبوع الا والسعودية التقطت الطعم

و على طول قدمت فروض الولاء

امريكا هذه المرة تلعب دور من يحب ان يحمد بما لم يفعل

هى مولت بعض المنظمات

لكن ما قدرة من مولتهم على قيام الثورات

عايز تعرف الاجابة

الاجابة تونس

اسمح لى حضرتك احييك على مشاركتك التى فيها جزء من الحقيقة .
اعتقد ان الشعب المصرى كان كله معجب بتونس وشعبها وبنقول يا ريت احنا كمان نقدر نبقى زيهم .
بس ما افتكرش ان الشعب المصرى مقلد اوى لمجرد التقليد
او حتى مقلد لمجرد الخلاص مما هوه فيه من ظلم وطغيان وعدم وجود عدالة .
اكيد تونس اثرت بصورة ما او جعلت الناس تفكر وتقول طيب ما هو ممكن زى ما حضرتك بتقول .
لكن كانت هناك محاولات سابقة زى السنة اللى فاتت لما الناس بردو خرجوا فى نفس اليوم يوم 25 يناير وما كانش فى وقتها تونس .حقيقى رجعوا زى ما خرجوا بس لان ما كانش موجود اللى حصل السنة دى .
مش هاطول على حضرتك .انا مش مقتنعة زى ما حضرتك بتقول ان الاجابة تونس .
تقبل تحياتى

المشاركة الأصلية كتبت بواسطة amado ibrahim

هناك ما يعرف بغيرة الشعوب

خاصة لما يكون الشعب ده تاريخه على المستوى العربى زى حالتنا

بعد مكنا بنصدر الثورة للعالم العربى دولة عربية تسبقنا

دى نقطة

النقطة التانية وجود مثال قابل للتطبيق

مثال تعرض للأمن المركزى

مثال انضرب عليه قنابل غاز واتعامل معاها ازاى

مثال استطاع ان يقدم خطة فعالة لانهاك قوات الامن (اللى اتضح انها غير مؤهلة للمواقف العصيبة)

مثال نشوفه بعنينا

عشان نصدق ان التجمعات الضخمة لما تكون عندها اصرار و اسلوب تعامل ولو حتى بسيط وبدائى بس فعال

ممكن تصنع المعجزات

اوافق حضرتك الراْى تماما فى كل ما قلته .
وخاصة غيرة الشعوب وخاصة المصريين انهم يعنبروا نفسهم الاوائل فى كل شىْ بالنسبة لجميع الدول العربية .
بس حتى بالامثلة اللى حضرتك بتقولها واكيد احنا استفدنا منها ولا ننكر ذلك .
لكن كان ممكن الموضوع ما يكملش او ما نقدرش عليه .
او ما ينجحوش فى اللى عملوه زى السنة اللى فاتت مثلا .
يعنى بردو الاجابة مصر والمصريين واصرارهم وايمانهم مش الاجابة تونس .
وسواء فى بينهم اللى بيدور على مصالخه الشخصية او الممول من جهة اجنبية او غيره .وده كله موجود وهيظهر ان كان الكلام ده حقيقى او لا .
لكن بردو انا مقتنعة ان الاجابة مش تونس .
وهناك بعض الاشياء والاحداث وان بدات فى الوضوح ولكن لن اتحدث عنها حتى تتضح تماما للجميع .ونتاْكد من حقيقتها .