السلام عليكم ورحمة الله وبركاتة
اعتقد انكوا عرفتونى خلاص انا تامر سعد بتاع موضوع سفرية مطروح
ندخل فى الموضوع انا طبعا بعد ماقريت تعاليقات الناس المحترمة اللى ردت عليا فى ملاحظاتى على العربية والمشكله المفاجئة
عملت بالنصيحة المتكررة وسمعت الكلام ورحت امس توكيل العبور اللى هوا مفروض احسن من المقطم
طبعا اخذت اليوم اجازة لانك متضمنش ظروف التأخير ايه كنت هناك الساعة 8.45 صباحا
اخذت رقم وانتظرت المكان فخم وشيك وكل حاجة بس الشياكه مش كل حاجة
اتنده على رقمى طلع معايا واحد اسمه محمد بهجت لتجربة السيارة وكتب كل ملاحظاتى ودخلت العربية غرفة العناية المركزة
تفتكروا مفروض امشى الساعة كام ............؟
العربية خلصت الساعة 4 عصرا يعنى 8 ساعات فى انتظار مرير
المهم طلعت استلم العربية وكانت الفاجعة
اولا - نور الصالون زى ماهوا
ثانيا - العربية داخله عامله 2021 كيلو خارجة عامله 2062 كيلو
ثالثا - العربية داخله مفوله بنزين خارجة ناقصة شرطتين
رابعا- مشكله عدم احكام غلق الابواب زى ماهوا
خامسا- االعربية خارجه مرشوش عليها شويه مايه وبيقولوا اتغسلت وهى مبصمه فى كل حته وزى الزفت
التقرير عن موضوع عدم الدوارة فيشة خاصة بالانجكشن كانت معلقة وغيروها اى كلام فى الحمام
الرد على الكيلو مترات المعمولة والبنزين المستهلك ان العربية مابتعملش كده غير فى المشاوير فعملنا بيها مشوار عشان نجرب
الرد على موضوع التكييف شحنة زياده وتم تظبيطها وكله تمام
الرد على موضوع الابواب - الابواب كانت عايزة تتريح وتم تريحا وده طبعا كدب لآن العربية مدخلتش قسم السمكرة
المهم دخلوا العربية ثانى عملوا نور الصالون وقالوا كده خلاص
من تعبى وزهقى بالاضافة لارتباطى بميعاد اخدت العربية وتوكلت على الله
المفاجئة انى بعد مامشيت بالعربية لقيت الار بى إم بتاع العربية بيرقص بشكل مش طبيعى ولما اكون باجرى بالعربية
وأمور او أدوس دبرياج العربية بتوطا خالص زى ماتكون هاتبطل الار بى إم بيوصل للصفر لازم تلحق تدوس بنزين
عشان العربية ماتبطلش على العموم روحت مشوارى وانا راجع مشغلتش التكيييف لاقيت العربية احسن كتير اى نعم الار بى ام مش مظبوط بردو بس افضل كتير من مع التكييف
مفاجئة جديدة بعد ماركنت العربية فى الجراج وبغطيها لقيت تجرحتين خفاف فى الكبوت بس انتو عارفين ان الواحد جايب العربية بشقى عمره وقسط ولسه ماكملتش شهر فحسيت كأن الخدشين دول فى وشى انا مش كبوت العربية
والله العظيم طلعت بيتى لاجايلى نفس أكل ولا أنام مع انى ميت من الجوع والتعب دماغى كانت هتنفجر

المهم النهارده الصبح الساعه 6 صباحا عملت اتصال 16202 عملت شكوى كتبت فيها كل اللى انا قولتهولكم قالولى فى خلال 48 ساعة هيكلمنى حد من ادارة eim لمتابعة الشكوى وحلها
ارجوكم افيدونى اعمل ايه اروح مركز خدمه معتمد ممكن يكون احسن ولا اشوف حد بتاع تكييف عربيات يبص عليه ولا اعمل ايه ولو حد عنده خبرة فى عمل شكوى فى حماية المستهلك ياريت يفدنى لاحسن انا نفسيتى مدمره بسبب العربية

واخيرا بردوا هاقول الحمد لله الذى لايحمد على مكروه سواه وقدر الله وماشاء فعل