الموضوع: حاجة تفطر !!

اولا السلام عليكم ورحمة الله وبركاته

ثانيا كل عام وانتم بخير بمناسبة شهر رمضان المعظم اعاده الله عليكم بالخير واليمن والبركات
وصوما مقبولا وافطارا شهيا انشاء الله

رمضان الي فات كنت متابع علي قناة اون تي في "on tv" برنامج من تقديم الأعلامي الكبير "إبراهيم عيسي" وكان بيحكي شوية مواقف الصراحة هي المفروض تزعل بس هو كان بينتقض الموضوع بطريقته التهكمية فكان بيحول الموقف من موقف يضايقك علي سلبيات مجتمعك الي موقف كوميدي ساخر وصحيح شر البلية ما يضحك

انا النهاردة عايز أقول لو حد بيحصل معاه مواقف من ديه (المواقف الي تفطر، وأكيد بتحصل لنا كلنا طالما في مصر المحروسة) وهو علي الطريق (ربنا يستر طريقنا جميعا) ياريت يحكيه لينا واهي تبقي زي نكتة ظريفة وانت صايم

انا هبتدي بنفسي
النهاردة وانا ماشي بالعربية علي طريق النفق الموازي للمريوطية والمار تحت شارعي فيصل والهرم ويسمي شارع الشيخ الشعراوي
المهم،
الطريق دة المفروض في نفق بيعدي من تحت شارع فيصل وفوق النفق دة في ملف بيخليك تلف وترجع تاني
انا ماسك يميني ومشغل الفلاشر الشمال وباخد شمالي واحدة واحدة وورايا ميكروباص تويوتا بيقلب نور وماسك شماله وعمال كلاكسات من الي قلبك يحبها انا فاكره هيلف هو كمان وهينزل الناس في الملف فشاورتله بأيدي ان انا كمان هلف شمال وروحت قارص شوية وكاسر كله وداخل الملف وببص في المراية

لقيت البيه بيدخل يمين ناحية شارع فيصل ومش هيلف الملف


امال ليه كنت عمال تقلب نور وتضرب كلاكسات طالما انت مش داخل شمال ماكنت سبتيني اخد شمالي والف وانت كنت شغلت الفلاشر يمين وخد يمينك وكل واحد يروح لحاله ليه الكلاكسات والنور

بالزمة مش دي حاجة تفطر


كل عام وانتم بخير

والله المستعان
،
،