الموضوع: رايكم اية فى موضوع الجواز بعد زيادة الأسعار

انا رأى ان المشاكل بتنقسم لجزئين
الجزء الأول: الفلوس و اسعار الشقق اللى اصبحت غريبة و توصل الواحد لليأس
ده غير ان احيانآ بيفضل الواحد معتمد على أهله حتى بعد الزواج بسبب ان المرتب مش مكفى و الغريب انك تلاقى الناس رايحين يحجزوا فى قاعة افراح ب17 الف جنيه!!!! و الله انا ممكن افركش جوازة بالكامل بس مش هدفع المبلغ ده لشوية عواطلية

الجزء التانى: و بصراحة هو ده أكتر جزء مستفز الا و هو الشبكة اللى فى بعض الأحيان بتبقى مبالغ فيها و طبعآ بطبيعة العائلات المصرية عندها قدرة غير عادية على توليد المشاكل و الخلافات من أصغر حاجة و بالتالى بتلاقى الوضع بعد شوية بقى جو عكننة و قرف
و بصراحة انا عن نفسى مش هستحمل ألاقى الجو ده و أكيد هخلع فى اول فرصة حتى لو كانت دى البنت اللى بتمناها

انا لسه بدرى على الحاجات دى بس برضه انا مش صغير و فاهم ان الموضوع مش سهل و من خلال اللى بشوفه من خطوبة و جواز لناس قريبنا عرفت ان الموضوع بيحتاج وقت و تأنى لإن الناس النهاردة بقى ليها ألوان كتير فى الأول بيبقى كل الناس حلوة و بيضاء ذى الفل و بعد كده لما الموضوع بيدخل فى الجد و الفلوس تلاقى الوش التانى طلع و قلة الأصل و العكننة (إلا من رحم ربى)

الحمد لله ادينى بتفرج من بعيد و بتعلم عشان لو ربنا اراد لى جواز ابقى فاهم اللعبة ماشية إزاى

المشاركة الأصلية كتبت بواسطة e_farid

عايزين الأول نشوف أسباب المشكلة قبل ما ندور علي حلول علشان نعرف نطبق الحلول اللي هنحطها.

أعتقد من وجهة نظر أهل البنت بتكون المشكلة انهم بيقيموا مدى حرص العريس على بنتهم و أد ايه هو شاريها بيقيموا دة بمقدار ما يمكن أن يدفعه العريس من أموال، و كمان بيقيموا مدى امكانية نجاح و استمرار الزواج بامكانيات و دخل العريس ... يعنى من الآخر المشكلة هى المعادلة الخاطئة اللى بتكون فى ذهن أهل البنت "استقرار الجواز يتناسب طردياً مع امكانات العريس المادية" ... و كرد فعل جمعى لأى عريس و أهله بيعتبروا انه فى مقابل كم المبالغ اللى بتتصرف فى الزواج فمن المنتظر من أهل العروسة الانفاق بسخاء على جهاز بنتهم ... و بتكون المحصلة فى النهاية ان مشروع الزواج عبارة عن مجزرة مادية للطرفين و غالباً ما تترك الكثير من الحزازات النفسية لدى الطرفين التى قد تلقى بظلالها على مستقبل الأسرة الجديدة.

المشكلة ان فعلاً أكتر من 75% مما ينفق لاتمام الزواج هو مصاريف لهدف المنظرة من فرح و شبكة ثقيلة و عفش فاخر و ديكورات مبالغ فيها جداً ... كلها مصاريف يمكن الاستغناء عنها ببساطة لو تجاهلنا نظرة العائلة و فلانة جالها ايه و فلان عروسته عملت ايه ... كلنا بنتناسى قول الله تعالى فى محكم التنزيل "إن يكونوا فقراء يغنهم الله من فضله" ... فهل يمكن الغاء هذه الأفكار و تغييرها لدى مجتمع يقاوم التغيير بضراوة و يتخذ من عبارة "ليس فى المكان أبدع مما كان" شعاراً؟؟؟

بكل بساطه اسباب المشكله هى الماده

مفيش فلوس لانه مفيش شغل يبقى هيفتح بيت منين ويصرف على البيت وعلى نفسه وعلى مراته منين مش معقوله هيخلى اهله يساعدوه فى الجواز وبعد الجواز يصرفوا على بيته

من ناحيه ثانيه لو بصينا لاوضاع البلد الاقتصاديه والسياسيه اللى بنمر بيها الان

الشباب هيجيبوا شقق منين وهيقدروا يفرشوها برضوه منين الاسعار فى كل شى ولعت وكلنا عايشين وشايفين كده

ومن ناحيه اسواء الانحدار الاخلاقى اللى انتشر بين الشباب والجواز العرفى والفيديو كليبات وفيديوهات الموبيل
اللى مش هيقدر يتحمل مصاريف الجواز اهوه بيستخبى تحت حجه انه مش عاوز يتجوز او ملقاش البنت المناسبه وطبعا ده نتيجته علاقات غلط وانحراف اخلاقى وسلوكيات خاطئه جديده على مجتمعنا بدات تنتشر الان


بصراحه الله يكون فى عون كل شاب بيفكر يتجوز فى الايام والظروف دى ربنا يقويه

على فكرة انا مش شايفة ان باة فى اهالى بتغالى فى المهور زى زمان - او يمكن دة

اللى شايفاه فى عيلتي - يعني انا لما اتقدملى محمود مامتى قالتلو من الاول انا مدياك

بنتي مش هيبقي شوية دهب اغلى منها !! ( هو بصراحة اغلى P: ) بس قصدى انه

الناس بقت عارفة الظروف و ان محدش لاقي و الشباب مش بيشتغل فمتهيألى جزء كبير

بقي متفهم و ليه صحاب كتير اتجوزو زمايلهم فى الكلية و اهو شاب لسه بيبدا و

اتجوزو فى ايجار جديد و خلاص .. فمضنش ان الناس لسه بتغالى اوى زى زمان!