الموضوع: ورشة فولكس

المشاركة الأصلية كتبت بواسطة ehab_mansour

أولا :- تغيير سلك الدبرياج له حالتين :-
1- في السلك العاده ( اللي بيتظبط بواسطة اللي هيركبه ) ده بيحتاج مفتاح عشرة و بنسة عادية فقط عشان تضبط مستواه بعد التركيب
2- السلك الأوتوماتيك (وده اللي بيضبط نفسه بنفسه) وده مش بيحتاج شيء لتركيبه او ضبطه
ثانيا :-
طريقة تركيب كلا السلكين :-
نبدأ بالفك
1- هتفك سلك الدبرياج من ناحية الفتيس عن طريق الضغط علي السلك قليلا ثم نزع طرفه من علي الجزء الثابت من الفتيس ثم تخليصه من الذراع اللي بيحركه السلك في الفتيس
2- بعد الخطوة الأولي ستجد السلك في يدك بالجراب اسحب الجراب قليلا للخارج من علي السلك الداخلي سيظهر لك السلك من نحية صدر العربية و ستجد الجراب و الصدادة البلاستيك اللي بيتحرك السلك بداخلهم قد خرجو من مكان تثبيتهم بصدر العربية
3- حاول لف السلك يمين او شمال بزاوية 90 درجة مع زقة قليلا للداخل و السحب مرة أخري للخارج بما انك اول مرة تغيره فممكن تطلع من أول مرة و ممكن بعد مرتين تلاتة هتلاقي السلك خرج في ايدك بره كله

في حالة السلك الأتوماتيك فقط لو هتركبه تاني لازم قبل متفكه تربط السوسته اللي تحت جرابه ناحية صدر العربية بحزام تربيط عشان ميتفردش منك لأخره و لما تركبه متلاقيش دبرياج زي محصل معايا ورجعني بعد ممشيت بالعربية كيلو وكنت مسافر وعموما هحط صور تدعم الموضوع تحت

التركيب :- وده الجزء الصعب
أولا ناحية الدواسة :-
هتفك غطاء علبة الفيوز بوكس اللي فوق الدواسات و تحاول تفك كرسي السائق عشان يريحك ولو مفكتهوش هتطلع عينك لحد متعرف تركبه
1-تجيب السلك الجديد و تدخل الجزء اللي بيتثبت في الدواسة من الخرم اللي في صدر العربية اللي خرجت منه القديم و تدخله شوية لحد ميوصل للدواسة و بعدين تسيبه محطوط بره و تدخل جوة العربية

2-بعد كده تنام في الدواسة و وشك لفوق و تمد ايدك لحد متوصل لطرف دواسة الدبرياج من فوق هتلاقي السلك داخل فوقيها هتسقطه في طرف الدواسة (ليه مكان بيبات فيه ) و خلي بالك انه عشان يدخل في مكانه ده بتخلي البلبله اللي في طرف السلك في وضع رأسي و بعد متسقط بتلفها تاني بزاوية 90 يمين او شمال عشان ترجع تاني أفقي و تثبت في المكان و متسقطش منك و تفصل مع اول دوسة
3- بعد تثبيت السلك بالدواسة داخليا تخرج بره عند الموتور و تسحب السلك براحة و تتأكد انه مشدود كويس و متعلق بالداخل كويس و متسيبوش من ايدك او تلفه لو تحركه و تزق الجراب فوقيه براحة لحد متسقط الصدادة البلاستيك في مكانها في صدر العربية وفوقيها كاوتشه كده زقها لحد متوصل للصدر عشان المنظر
4- برضه تخليك ماسك السلك و تحافظ انه ميدخلش منك لجوه ناحية الصدر او يتلف عشان ميسقطش تاني من علي الدواسة و بعدين تسقط الجزء اللي في نهاية الجراب علي الدراع اللي بيتحرك في الفتيس و تشد السلك كويس و بعدين تثبته من طرفه في الطرف الثابت في الفتيس مع المحافظة علي تسقيط الكاوتشة اللي في نهايته في مكانها و كذلك الوردة الحديد اللي وراها و بعدين تربط الصامولتين اللي في نهاية السلك بالقدر اللي يناسبك مع ضبط الدواسة و الدبرياج

و بعدين اي حاجه فكيتها ترجعها تاني مكانها بعد متجرب السلك برجلك كام مرة و تضبط مستواه و متنساش تشحم أطراف التقاء الجراب مع السلك فقط ومتحطش زيت بداخل الجراب زي مبيعمل الميكانيكة لأنه بيؤدي مع الوقت لتأكل الكساء البلاستيك اللي علي السلك و بالتالي يتأكل السلك و يبوظ من الداخل

في حالة السلك الأوتوماتيك مش بيتظبطة بتركبه من اطرافه و بس و بعدين تفك الرباط اللي علي سوستته و تسيبه و تجربه هتلاقيه مضبوط لو لقيته مش مضبوط هيبقي من الصعب انك تعرف تضبطه من نفسك (انا ظبطته ولكن بعد محاولات كتيييييييييير ومش هعرف اكتب ازاي بيتظبط هههههههه )

و الله الموفق و المستعان ولو لقيت حاجه مش واضحة قلي وانا أوضح لأن الموضوع كله بيعتمد علي فنيات اللي بيركب لو ملهوش في الصيانة و العكعكه دي يبقي بلاش يغامر

و الله ينور عليك يا محمد يا مصطفي و علي أفكارك النيره و متنساش تدعيلي بالشفاء العاجل لأني مريض و بمر بظروف صعبة جدا اليومين دول

الله ينور عليك ويفتح عليك ياايهاب ايوه كدا ياراجل طلع المواهب المدفونه انا لو كنت وقفت على دماغى مكنتش هشرح زى ما انت شرحت كدا
اللهم اشفه واعف عنه اللهم حط من سيئاته وذد من حسناته بهذا الأبتلاء
الف سلامه عليك يأيهاب وربنا يعافيك يارب

المشاركة الأصلية كتبت بواسطة mgo13

اخونا الكبير محمد مصطفي كبير مدمني البولو سؤال لولبي حلزوني صوت الموتور عندي عالي مرة واحده ورغم ان الموتور كان بيبخر وزي الفل وانا لسه مغير فلاتر وبوجيهات وكشفت كمبيوتر كان كله تمام صوت بيكون عادي علي السلاسنية بس لما ادوس بنزين يبقي عالي جدا هل دا له علاقة بطلمبة البور لاني ملاحظ من اول مافكت علبة الدركسيون والصوت عالي وواحد قال ممكن تكون فتحات علبة الدركسيون ضيقة اكتر من اللازم وبتعمل ضغط علي الطرمبة

لو لسه عامل شغل فى العلبه والعلبه تقيله بيبان صوت الطلمبه لأنها فعلا بتبقى محمله وبالذات فى نهايه مشوار العلبه وهل الصوت دا فى كل وقت بتسمعه ولا وانت واقف بس فى مكان فاضى
وعلى فكره احتمال كبير يكون احساسك بالصوت دا جالك لأنك لسه عامل شغل فى العلبه فا مركز معاها بمعنى انك قبل كدا مكنش فى دماغك فا مكنتش بتسمعه لأن من طبيعه العربيه لما تحمل على الباور صوت الموتور بيعلى لأن الموتور لفاته بتذيد عشان يعوض فرق الجهد اللى الطلمبه خدته
اسمحلى اهزر معاك واقولك
متركزش عشان متهييسش