الموضوع: أول طلب أطلبه من وحوش قسم الفولكس واجن

السلام عليكم و رحمة الله و بركاته ..............

بعد السلام و التحية و كل سنة و إنتم طيبين و بخير و عقبال كل سنة

نخش فى الموضوع علطول قبل ما حد يزهق منى و يقوللى بزعيق إنجز بقى الدنيا صيام

أنا قدامى عربية جولف 5 موديل 2006 1600CC بدون فتحة سقف كانت مع واحدة قريبتى و هيه بتفكر تبيعها و تجيب حاجة تانى و أنا بفكر أخدها منها

بالنسبة للتفاصيل : العربية ماشية 69000 كم تقريبا و هيه كانت بتستخدم الفتيس كالتالى ( N , R , D ) بس ماتعرفش أى حاجة عن الستيبترونيك أو حتى Sport Drive و عمرها ماجربتهم بالرغم من إنها سألتنى عليهم من فترة لكن أنا خوفتها و قولتلها دول بتوع الجرى و الحرق و هيه كانت جايبة العربية من البيت للجامعة و بس و من ساعة ماخلصت الجامعة 2009 و العربية إستخدمها فقط للسفر .

الصالون الداخلى فابريكة ماشاء الله لا يعكره فقط إلا بعض الخدوش فى بعض زراير الكاسيت و كذلك فى مفتاح الإضاءة كذلك الكابوت و حوض الموتور ماشاء الله لا قوة إلا بالله زى الفل و لكنى لاحظت وجود زيت شبه كتير فى بعض أجزاء حوض الموتور ( حوالين الموتور و لكن مافيش حاجة عند الموتور )
الدهان الخارجى : لللأسف العربية كلها رشة بره نظافة ماعدا السقف و للأسف البرنس إللى رش العربية شاكله مش صنايعى جامد لإنه ممعجن كتير و راشش أى كلام لكن العربية مش عاملة حوادث بفضل الله .

طبعا أنا ناوى أروح أكشف على العربية بالكمبيوتر عند واحد معرفة شغال فى توكيل فولكس علشان أخد القرار النهائى بالنسبة للعربية ده .

طبعا أنا كنت عاوز أخد أراء حضراتكم بالنسبة للعربية و إيه مميزاتها و عيوبها و إيه أخبار قطع الغيار بتاعتها و ما مدى توفرها و تقريبا حالة العربية ده تعمل كام و طبعا بعد ما أكشف عليها و أجيب Report هعرف حضراتكم بإللى حصل .

أسف على الإطالة و جزاكم الله خيرا و كل عام و أنتم بخير