بص يا يوسف
اكبر غلط و انت لسه متخرج انك تدور عالفلوس
انت بتقول مش لاقي شغل بدون خبرة بمرتب محترم
مش هتلاقي
لازم تتمرمط و تتبهدل عشان تتعلم
و صدقني المنفعة متبادلة يعني اما تشتغل في مكان بمرتب بسيط و خبرتك بسيطة ....... المرتب ده نظير انك 25% من الوقت شغل و 75% من الوقت بتتعلم
و بتكتسب خبرة من اللي حواليك و دي اللي بتعلي سعرك ....... و على فكرة في اول اربع سنين السعر بيعلى بشكل تصاعدي أسي exponential
يعني لو بدات ب 2000 جنيه ممكن جدا في 4 سنين تضاعفهم مرتين و لو شاطر ممكن اكتر
بس اوعى تغلط الغلطة بتاعة كتير من حديثي التخرج دلوقتي و تدور عالفلوس قبل اي شئ
انا اول ما اتخرجت كنت اتمنى شغل ان شالله ب 300 و لا 500 ........ و ابويا قال لي لو لقيت حتى شغل ببلاش انزل و اديك مصروف مش عيب ....... و لو هتشتغل ب 200 و لا 300 اشتغل و انا اساعدك على مصاريفك ما يضرش
صدقني ....... الشغل احسن من قعدة البيت و لو ببلاش ..... و ما تقعدش تقول فلان اللي بياخد كذا مش احسن مني و ده استغلال و بتاع ........ من الناحية الاخرى انا كصاحب عمل او مدير اعين واحد فريش (صدقني انا اول ما اتخرجت كنت فاكر نفسي الواد الفت التت النت بس اكتشفت ان الخبرة الاكاديمية و المشاريع الاكاديمية حاجة و الخبرة العملية حاجة تانية) و اقعد اعلم فيه و اديله خبرة و اخد منه شغل 30% من الوقت بس بمبلغ كبير ليه؟
و الشغل بيجيب شغل و حتى لو شركة صغيرة مسيرك تنقل للاكبر ...... انا ابتديت في شركة في شقة في عمارة بمرتب على قده جدا و كان القبض بيتاخر كتير ...... دلوقتي ربنا كرمني ...... عشان ما اتنكتش عالشغل
و يا ريت ما تزعلش مني و تاخدها نصيحة من اخ اكبر اتمرمط 8 سنين في سوق العمل
المفضلات