الموضوع: باركولي الاول ---- و بعدين ساعدوني :)

بسم الله الرحمن الرحيم
بفضل الله يا جماعه انا بقيت بيمر و أحدث بيمر ف المنتدي كمان
ربنا وفقني و اشتريت e30 النهارده بس
الحمد لله رب العالمين

دلوقتي بقي بما اني لسه بيمر مستجد عاوزكو تساعدوني خاصة ان عربيتي لسه عايزه شوية شغل

العربيه موديل 84 معدله 90 عليها مكنه 6 سليندر 2000 البيضا و فيتيس اوتوماتك
حتي الان دي معلوماتي عن العربيه

دلوقتي بقي هقولكم الحاجات اللي مضايقاني فيها و ياريت بجد تساعدوني لأني ابيض خالص يمكن ابيض من الموتور نفسه

معلش استحملوني لو الموضوع طويل شويه -- بس والله ده عشمي ف رجاله البي ام لزميل جديد
وخاصة اني لسه جايب العربيه النهارده و قلت اشارككم علطول عشان تفرحولي و تساعدوني
بسم الله الرحمن الرحيم

1- العربيه متسقطه اوي قدام و ورا و محطوطلها جنط 16 عريض --- ف لما بلف الفرده اللي قدام بتحك ف الرفرف وبرضه ورا لما باخد مطب الرفرف بينزل يحك ف الكوتش الخلفي \ دلوني اعليها ازاي وفين و هتتكلف كام

2- اهم حاجه بقي اللي معقداني ف عيشتي و هتكرهني ف البي ام بعد الشر يعني ---- السحب,
الموتور صوته لوحده وهي متموره عالي و حلو وشديد " ال ار بي ا مش شغال " بس الفتيس بقي
اول ما بديله غيار العربيه بحسها 800 سي سي مش 2000 !!!!! انا كان معايا كريستاله 1300 قبلها
والله العظيم حاسسها اقوي منها وبالمناسبه يا جماعه الموتور صاحبه لسه مغيره من 6 شهور
بس مش عارف ليه تقيل اوي كده ف السحب ؟!! و الكيك داون برضو تعبااااااااااان
انا بجد بعد ما فرحت بالعربيه حسيت ان الفيتيس و الموتور هيقفلوني منها
\ارجوكو دلوني و قولوولي اعمل فيها ايه و العيب ده من ايه ؟ واعملها عند مين ؟؟؟

3- حاجه كمان هي ان الفيتيس غياراته سايحه علي بعض يعني مفيش الكليك اللي بين كل غيار و التاني "اوتوماتك" \ دي بقي اعمل فيها ايه ؟؟

4- الهاند بريك تقريبا ملهوش واير --- او سايب \ لأسوأ الظروف الواير تمنه كام ؟ و منين ؟

5- العربيه عايزه شبكه امامي بطقم الفوانيس الاربعه لأن اللي فيها متبهدل\دلوني بكام و منين والفوانيس العاديه بكام و العدسه و الرينجات بكام ؟؟

6- صالون العربيه عايز يتشد برضو و شوية زراير عايزه تتغير و فرش الابواب و كده يعني -- عايزه شدة
سروجي بس يكون معلم \ ياريت برضو تدلوني علي حد و التكلفه بالتقريب كام ؟

7- التابلوه في زراير كتير اوي مش شغاله ولا اعرف اصلا بتاعة ايه و عداد ال ار بي ام مش شغال
وفي لمض كتير علطول شغاله ---- يعني باختصار برضو عايزه كهربائي محترم \ دلوووووني علي حد كويس و امين و عرفوني برضه هتتكلف كام ؟

8- الجنوط عندي 5 خرم بس كلهم مربوطين ب 4 مسامير بس وفي واحد مربوط ب تلاته !!
ف مش عارف برضو ده من الطنبوره ولا هي مسامير ناقصه ولو ناقصه اجيبها منين ؟

9- و اخيرا بقي عشان مطولش عليكو عايز اسأل علي اسعار شوية حاجات و اماكن بيعها :
المساعد بتاع الكبوت و بتاع الشنطه - المرايات الجانبيه و طقم الكهربا بتاعها - التابلوه كامل - فيتيس مانول

طبعا انا مش هقولكو اتمني مكنش طولت عليكو لأني عارف اني طولت عليكو --- بس والله عشان ده بجد من ثقتي ف الاعضاء المحترمه اللي مبتتأخرش عن تقديم المساعده و النصيحه لكل اللي يطلبها

اتمني يا جماعه تساعدوني و ترجعو تفتحو نفسي لل بي ام تاني واللي عندو اي معلومه اىييييييي معلومه يقولها او اسعار اي حاجه يشارك برضو
شكرااااااااا