انا للاسف وصفات الرجيم ماليش فيها و كل اكلي بالزبدة الصفرة او سمنه بلدي بس عندي اكلتين ممكن ينفعوا للرجيم
هات فراخ الصدور المخليه و ماتخليش الراجل يقطعها خليها علي سمكها زي ما هي
و تبلها بالبصل المفروم و المحل و الفلفل و السماق و البهارات والزعتر و علبة زبادي و معلقة صلصه صغيرة و ليمون و زيت قليل
اقل مده تسيب الفراخ في التتبيله هي ساعه و الافضل انك تبيتها فيها في التلاجه
و لما تسويه سويها في الفرن في شواية زي دي هتلاقيها عند اي حد اداوت منزليه تقريبا ب 30 جنيه
رص الفراخ فيها طبعا بعد ما تشيل التتبيله من عليها علشان ما تتحرقش وحطها علي الرف اللي فوق في الفرن و علي الرف اللي تحت حط صينية مليانه مايه علشان تسوي الفراخ كويس و بسرعه
و قبل ما تطلعها من الفرن ب 5 دقائاق اعصر ليمون تاني علي وشها
بتقعد في الفرن من 20 دقيقة لنص ساعه علي حسب حجم الفراخ و بعد ما تطلعها هتكون مسخن فحمايه علي النار و تجيب فنجان صغير و تحط فيه حبة زيت صغيرين و ترمي الفحمه فيها و تحط الفنجان وسط الرفاخ و تغطيه بالفويل علشان ياخد ريحة و طعم الشوي
والطريقة دي تنفع بردوا للفراخ اللي بعظم و بتكون شبه فراخ اندريا
و فيه طريقة تانيه للفراخ الكامله
تجيب فرخه و طبعا هتنضفها كويس جدا وتغسلها بالخل و بعدين تتبلها بملح و فلفل و توم مهروس فصين ماتكترش وورق لورا و ليمون و معلقة صلصه ومعلقة عسل ابيض صغيرة و طبعا زيت
وتضربهم كويس بالشوكة و بعدين تدعك الفرخه بيهم كويس من جوه و من تحت الجلد و من بره طبعا و تسبها اقل مدة في التلاجه صاعه و الافضل تكون متبلها من بالليل
و بعدين تسخن الفرن و تجيب زجاجة بيبسي الكبيرة مصنوعه من الازاز مش بلاستيك و تملاها مايه و تلبسها للفرخه و تدخلها الفرن و بتاخد نص ساعه تقريبا
فيه طريقة للحمه الفيليه اعتقد انها تنفع للرجيم بردوا
هات لحمه فيليه سمكها تقريبا 1 سم و نص و تبلها بالملحو الفلفل و القرفه و زيت الزيتون وورق اللوراو الحبهان و الليمون
و حطها في التلاجه تتبل اقل شئ بردوا ساعه و ممكن نص ساعه لاننا بنسوي اللحمه بتتبيلتها علي عكس الفراخ
و بعدين حات بصل كبيره و قطعها حلقات و فلفل و قطعوا حلقات بردوا
و هات طاسه تيفال و سخنها بسيط و بعدين حط اللحمه فيها و شوحها علي الجنبيبن , نسيت اقولك و انت بتبل اللحمه انغز كل قطعه بالسكينه نغزتين تلاته علشان و انت بتسويها ماتئوسش منك
و بعد ما تشوحها هتحط التتبيله اللي كانت متبله فيها و تزود فنجان مايه و اولي ما تغلي تهدي النهار و تغطيها و تسبها تستوي براحتها
و بعد ما تسوي شيل اللحمه من الطاسه و هات البصل و الفلفل الرومي اللي انت كنت مقطعه و شوحوا في باقي تتبيلة اللحمه , شوحوا لحد ما يدبل و بعد كدهقدمه مع اللحمه
ممكن كتير يستغرب البصل و الفلفل مع اللحمه بس طعمه فعلا بيكون تحفه
و طبعا انت خليك احسن في الرز البسمتي افضل علشان الرجيم و لو بتحبه قولي و انا هقلك علي كذا طريقة له سهله و سريعه
الافضل لكن انك تطبخ بزيت الزيتون و هات نوع نضيف لان اللي مش حلو بيوحش طعم الاكل
و سبب اننا بنحط الزيت علي اي تتبيله انه بيساعد الفراخ او اللحمة علي انها تتبل كويس
لو انت مافيش وقت تطبخ حاول علي اد ما تقدر اول ما تجيب الفراخ اواللحمه بعد ا تغسلهم و تنضفهم كويس انك تتبلهم و تسيبهم يوم في التلاجه و بعد كده تكيسهم علي اد استخدامك و تفرزنهم
دا هيقلل الوقت عندك بحيث انك تطلعم علي الشوي علي طول و كمان الفراخ او اللحمه كل ما تسيحهم بيفقدوا قيمته الغذائيه
المفضلات