استاذ هانى ممكن توضحلى ايه اجرائات وتكاليف انشاء شركه استيراد وتصدير والبطاقه التصديريه واذا وكلت محامى كم تكون اتعابه
استاذ هانى ممكن توضحلى ايه اجرائات وتكاليف انشاء شركه استيراد وتصدير والبطاقه التصديريه واذا وكلت محامى كم تكون اتعابه
اتعاقدت مع شركة تايم شير لشراء اسبوعين سنويا بأحدي القري السياحية الخاصة بهم ولم ادفع من المقدم المتفق عليه سوي 200 جنيه ووقعت علي ايصالات بالالتزام بسداد باقي المقدم والاقساط في مواعيدها والعقد الذي تم التوقيع عليه مكتوب خلفه ( احتياطات قبل التعاقد ) وانا اريد الغاء هذا التعاقد وقد اتصلت بمدير الشركة واخبرته بهذا بعد التوقيع بعدة ساعات وقد اخبرني بأنني بموجب التوقيع اصبحت ملتزم بالدفع لهم ما تم التوقيع عليه وانني في حالة الفسخ علي دفع 35% من قيمة التعاقد وهذا البند مكتوب فعلا في النسخة التي معي التي مطبوع عليها ( احتياطات ما قبل التعاقد ) اريد ان اعرف ما الموقف القانوني لذلك ............ وشكرا
نشكركم على الباب ده.......عندى سؤال.....تقدمت لإستأجار شقة عندى لإقامة شركة بإسم زوجها الذى يعمل فى السعودية ،....المشككلة فى رأيى أن هذه السيدة ستأخذ شقتى تفتح فيح شركة بإسم زوجها الغائب ، مما يضعف العقد ، ياريت رأى قانونى يساعدنى لتأجير الشقة لهذه السيدة بإسم زوجها لإقامة شركة
حسب طبيعة الشركة
هل ستكون منشأة فردية .. اي صاحها انت فقط
ام توصية بسيطة
ام شركة ذات مسئولية محدوده بها عدة شركاء
وهي ما ارشحها لك كاطار قانوني لك
بالنسبة للتكاليف حسب المحامي
ولكن بالاضافة الى مصاريف التأسيس ربما تصل الى 1000 جنيه تقريبا او أقل حسب رأس المال
اتعاب المحامي تقريبا تبدأ من الف جنيه فما فوق
تحياتي
اهلا بك
اما معها توكيل عن زوجها
او تؤجر باسمها
وفي جميع الاحوال عليك ان تضعي شروطا في عقد الايجار تسمح لك بحماية حقوقك كاملة
في الشقة او الايجار
وعليك الاستعانه بمحام محترف تثقىي فيه من المعارف او لااقارب للمساعدة
واهم شرط
انه عقد خاضع للقانون الجديد بالاضافة انه غير قابل للتجديد نهائيا .
ولما تحبوا تجددوا يبقى عقد جديد نوفي
وشروط اخرى سيساعدك محاميك فيها
تحياتي
الاستاذ هاني السلام عليكم ورحمة الله وبركاته
لي استشارة عاجلة عندك وياريت لو امكن حضرتك تبعتلي رقمك الشخصي في رسالة خاصة علشان اوضح لك الموضوع بشكل اكتر لأن المشكلة تخص الوالدة
الوالدة كانت رافعة قضية مدنية والخصم استعان بشهود زور وكسب القضية الكلام ده من 2005
عنوان بطاقة والدتي على عنوان اختها ولكنها مش مقيمة معاها
بعد فترة بدأ محضر من المحكمة يجي على فترات لمنزل خالتي ويسأل على والدتي لأن عليها حسب ماهو بيقول اتعاب المحاماه والمصاريف قضية والمحكمة وحاجات زي كدة
انا مش فاكر المبلغ كان كام بالظبط في بداية ما المحضر كان بيجي لكن حاليا المبلغ ده وصل ل 20 الف جنيه اتعاب
ومؤخرا المحضر جا لعنوان خالتي وقال لها انا هحجز على العفش الي عندك بما يساوي قيمة المبلغ الخاص بالأتعاب ومصاريف المحكمة والكلام ده، واداها مهلة ترشده على عنوان والدتي المقيمة فيه علشان يقبض عليها
لجأنا لمحامي معرفة من احد الاقارب علشان يشوف الموضوع ده (وبصراحة انا مش واثق في شطارته لأنه بيقول
كلام غريب)
بعد ما المحامي راح المحكمة يستفسر عن الموضوع ده فقال ما يلي:
انه حاول يعمل ما يشبه تصالح مع المحضر او مع الشخص القائم او المسؤول عن موضوع الغرامات والفلوس دي الموجود في المحكمة بحيث انه يدفع جزء من المبلغ ويعمل طلب التماس بتخفيض المبلغ فقالوله هيشوفوا الموضوع ده وبعد كدة راح لهم بعد فترة فقالوا له مفيش تخفيض ولازم تدفع المبلغ ده كله
اقترحنا اننا نهمل القضية والموضوع ده كله ونخليها تسقط بالتقادم لأن حسب علمي بعد ما سألت ان النوع ده من القاضيا والغرامات بتسقط بعد مضي 5 سنوات
فالمحامي قال مش هينفع لأنهم هناك في المحكمة كل ما موعد سقوط القضية يقرب فيقوموا هم بإعادة الابلاغ وتجديد القضية مرة اخرى بشكل ما بحيث انها تفضل سارية ولا تسقط بالتقادم (وبصراحة الكلام ده مش داخل دماغي نهائي)
سؤالي لحضرتك يا استاذ هاني، الكلام الي انا حكيته ده كله ينفع اصلا؟ وهل في حاجة اسمها محضر له لسطة انه يحجز على عفش حد تاني حتى لو كان صاحب المشكلة عنوانه على نفس عنوان الشخص ده؟ هو مش المفروض ان كل شخص ليه ذمة مالية مستقلة وشخصية اعتبارية مستقلة مينفعش يتاخد بجريرة شخص آخر؟ وهل اصلا في حاجة في القانون اسمها مصاريف جلسة ومحمكمة وكلام من ده والي ميدفعش بيتسجن ويمتنع من السفر والحاجات دي كلها؟
وموضع سقوط القضية بالتقادم وان في حد بيجددها في معادها علشان ياخد الفلوس، الكلام ده واقعي فعلا يا استاذ هاني وقانوني وبيحصل ولا دي شلة نصب من المصضرين وموظفين في المحكمة علشان ياخدو فلوس؟
ياريت حضرتك لو تكرمت تفيدني في كل حاجة بالتفصيل قدر الامكان ولو بالامكان برضه تليفون حضرتك الشخصي في رسالة خاصة علشان تفاصيل الموضوع الدقيقة مع والدتي وليست معي وحضرتك قولي ايه اليوم والوقت المناسب للاتصال بحضرتك ولك جزيل الشكر والتقدير
اهلا بك
بالنسبة للححز
فهو مجرد تهديد وعلى خالتك اثبات ان الام لا علاقة لها بهذه الشقة او ما بها
بكافة طرق الاثبات
ويحق للدولة الحجز الاداري بدون حكم قضائي اقتضاء لحقوقها .. وهذا امتياز لها
بالنسبة للمحامي
ربما سيطيل المسألة خاصة اذا كان محامي صغير او غير محترف ويرغب في عائد مادي
من خلال اطالة المسألة
وفي النهايه عليك الاستعانه بمحام محترف وخبره
للتعامل مع هذه المسألة ليخفض المبلغ او يقسطه
لان الحكم خلاص صدر واصبح باتا
ومسألة انه اعتمد على شهود زور او غيره
فهو حكم وله اثار ستتحملها الوالده
وستدفع ستدفع في النهاية
وعليه يجب ان تكون الاستراتيجيه هي تقسيط المبلغ
ولا تتعاملوا مع الموظفين لان من مصلحته تحصيل كامل المبلغ وبسرعه
حتى ينال مكافآته الرسمية على هذه المسالة
بالتوفيق
الأستاذ هاني اشككر حضرتك جزيل الشكر على تفضلك بالرد جزاك الله خيرا
في بس كم نقطة احب استوضحها من حضرتك علشان افهمها كويس
أولا: موضوع الحجز على العفش والكلام ده حضرتك بتقول ان عليها اثبات ان والدتي لا تقيم في الشقة وليس لها اي علاقة بها، معلش ممكن توضحللي الكلام ده ممكن يتعمل ازاي وازاي تثبت انها ملهاش علاقة وانها غير مقيمة اصلا في الشقة
ثانيا: ما معنى انه يحق للدولة الحجز الاداري علشان حقوقها؟ يعني فعلا الاجراء ده صحيح ان المحضر من حقه يحجز على العفش الموجود حتى لو لم يكن له علاقة بوالدتي؟
ثالثا: بالنسبة للاقتراح الخاص باهمال الموضوع حتى تسقط القضية، هل فعلا بيتم تجديد الدعوة مرة اخرى على والدتي قبل انقضاء مدة الحكم علشان المحكمة تعيد المطالبة بالفلوس ولا ده قانونا مينفعش؟ والمفروض القضية الي زي دي بتسقط بعد كم سنة من صدور الحكم؟
رابعا: طيب لو المحضر توصل للعنوان الحقيقي الي والدتي مقيمة فيه فعلا، في الحالة دي هل بيتم القبض عليها او الحجز على العفش الي عندها ولا ايه الي بيحصل؟
خامسا: حضرتك بتقولي اننا منتعاملش مع المحضرين، طيب ايه هو المسمى الوظيفي للشخص المسؤول عن الموضوع ده في المحكمة علشان نتوجه ليه مباشرة بطلب تخفيض المبلغ؟
معلش طولت على حضرتك بس علشان اكون فاهم كل حاجة ولو عندك نصائح اخرى تنصحني بيها فياريت تتكرم وترشدني ليها وشكرا لك مرة اخرى
السلام عليكم أ هاني الله يجزيك خير على مساعدتك للاخرين
بسال حضرتك ايه الاجراءات والاوراق المطلوبة من تراخيص وسجلات وملف ضريبي لفتح محل تاجير سيارات وشكرا لحضرتك
أستاذ هاني ... بعد التحية
أنشأت (شركة توصية بسيطة) بإسم زوجتى نظرا لإننى موظف حكومى و أنا معها فى عقد الشركة (شريك موصي)
تاريخ الإنشاء فبراير 2013 براس مال 20000 (عشرون ألف)
المشكلة أن المحام الذى أتم لى الأوراق قد وعدنى بإنهاء الإجراءات الضريبية كل عام عن طريق أحد معارفة .. ولكنه يتنصل منى الأن ...
وبحسب معلوماتى إنه من المفترض أن أقدم إقرارا ضريبيا قبل نهاية مارس الجاري
هل أتوجه بنفسى لمصلحة الضرائب بموجب التوكيل وأنهى الإجراءات ... أم يتعين على أن أوكل محام أخر أو محاسب ضريبى؟
علما بإن المحام قد أبلغنى بأنه ليس لزاما على تقديم فواتير أو دفاتر حسابية ...
وجزاك الله خيرا
اخ لى ( بمعنى الكلمة ) والده مأجر شقة من السبعينات وبيدفع الايجار وبيأخذ الايصالات بانتظام وعداد الكهرباء باسمه
وعقد تليفون فى اوائل التسعينات
حصل مشكلة مع السكان واتفقوا كل واحد يركب عداد مياه خاص بشقتة بدل العداد بتاع العمارة كلها
بتوع شركة المياه عاوزين اصل عقد الايجار للاطلاع عليه وصورة منه
المشكلة ان عقد الايجار ضايع من زمان
هما معاهم معظم ايصالات الايجار من 40 سنة مبيروموش حاجة ( مش عارف العقد ضاع منهم ازاى )
معاهم كمان اصل مخاطبة من الحى بتاريخ سنة 1979
الظريف فى الموضوع إن ناس كتير من ضمنهم محامين قالوا يا حاج اضرب عقد ايجار وروح اعمل بيه عداد المياه
أنا حذرتهم من إن ده تزوير وممكن صاحب العماره لو عرف يقدم بلاغ فى النيابة حتى فى حالة تقديم صورة مش اصل ( أنا مش محامى بس ده فهمى ومعلوماتى العامة ) وهما فى نفس الوقت مش بيحبوا الحلول الى مش قانونية
ان شاء الله كنت عايز انا وصاحبى نفتح محل بلاى استيشن ايجار مش تمليك كنت عايز اعرف ايه التراخيص اللى تطلع وازاى عشان ابقا ماشى قانونى ؟
اهلا بك
اعتذر عن التأخر في ا لرد
نظرا لعملي خارج مصر والسفر المتكرر
ولكن لا اعلم مستوى الزميل المحامي الذي انشأ الشركة او نصحك بعدم تقديم دفاتر حسابيه
علىك الاهتمام بهذه المسائل بشده
حيث انها ولو كانت شركتك اعمالها بسيطة
مسألة الضرائب قد تحيل حياتك الى جحيم
ولدينا امثله على امور تفاقمت الى حد لا يمكنك تصورة
عليك الاستعانه بمكتب او محاسب خبره لتنظيم اوراقك المحاسبيه
ولا تثق في احد بشكل مطلق كي لا تتعرض للضرر المادي
تحياتي
الحل القانوني الوحيد هو عقد جديد من المالك
ولكن هو نفسه لو عرف بضياع العقد حيستغله ومستحيل يعمل عقد جديد
او ان والد صاحبك يعمل عقد ايجار وياخد عليه اثبات تاريخ لصاحبك
طبعا هو مش مالك
ولا العقد نافذ قانونا.. لانه تصرف في غير ملكه . الا اذا اجازه صاحب العقار ..
ولكنه حل شكلي لتركيب العداد
ومن الافضل الحصول على موافقة صاحب العين
بتفتح محل عادي بنفس الاجراءات لاي محل
ويفضل الاستعانه بمحام ممن حولك ..
ولكن نظرا لانك تتعامل مع العاب وحقوق ملكية فكرية
فعليك الحذر من استخدام اي العاب غير مرخصه
او برامج كمبيوتر مضروبة
او تزويد الاخرين بشكبة انترنت غير شرعيه
ما فيش حبس او مش بيطبق
ولكن لسعه الغرامه اللي بتوصل 50 الف جنيه والمصادره
ممكن توجع
ومن المؤكد ان المصنفات حتزورك دايما
بالتوفيق
أ هانى لو سمحت
محتاج رايك فى موضوع مهم جدا بالنسبه ليا
أنا كنت فى كليه هندسه المنصوره وأجلت أول سنه بسبب عذر مرضى مقدرتش احضر بعد كده لحد ما اتفصلت من الكليه بعد 3 سنين بسبب الرسوب فى سنه واحده
انا اتفصلت سنه 2003
العذر المرضى ده كان موقف حياتى كلها مش كليه وبس ودلوقتى بدات اتعالج منه
وعاوز ارجع الكليه قالولى طالما عدى اكتر من 10 سنين مينفعش
وفى دكتوره هناك قالتلى ارفع قضيه على الكليه
وأنا مستعد اجيب أكتر من شهاده من دكاتره متخصصين أن عذرى المرضى ده السبب فى رسوبى وعدم رجوعى للكليه طول السنين دى
ايه رأيك أنا عندى فرصه لو رفعت قضيه على الكليه ؟
السلام عليكم و رحمة الله و بركاته
الموضوع باختصار هو فرصة مشروع تجاري (محل)
المتوفر نصف المبلغ
لتوفير النصف اﻵخر حاجة من تلاتة
1.جمعية بقيمة النصف المتبقي أقبضها الاول.....للأسف المبلغ اللي باقي كبير و مرتبي مش هيقدر يغطي إلتزامات جمعية بالحجم ده
2.قرض من البنك....و ده خراب آخرة و دنيا و فشل للمشروع من قبل بدايته و محق لبركته
3.الحل التالت اللي في دماغي هو إدخال شركاء في صورة أسهم
سيتم تقسيم المبلغ الباقي على 10 أسهم متساوية و طرح الاسهم للزملاء و الاقارب للدخول كشركاء
السؤال:
هل الكلام ده قانوني؟؟؟
هل ده يعتبر توظيف أموال و لا شراكة قانونية؟؟
ينفع في شروط العقد أشترط أن اﻹدارة لي أنا و أحدد نسبة الربح التي سيتم خصمها نظير اﻹدارة و لا لازم يبقى مرتب محدد و مينفعش يرتبط بالربح؟؟
لو حد من الشركاء حب يطلع في أي وقت إزاي أضمن خروجه بأمان بدون التأثير على النشاط؟؟ كيف يتم صياغة شرط زي ده؟؟؟
هل المشروع ده هيعتبر شركة و لا مجرد محل ذو نشاط تجاري و ملكيته مشاع بين الشركاء؟؟
هل صاحب التصرف في العين هو صاحب أكبر نصيب و لا المسئول عن إدارة النشاط؟؟؟
آسف على اﻹطالة و في إنتظار رد حضرتك
السلام عليكم ورثت ارض زراعية و حيازة الارض القديمة ليست معى, الارض مستأجرة و ربما تكون مع المستأجر لصرف السماد ( يطلق عليه فى الارياف الكيماوى) , هل اقدر اتوجهه للجمعية الزراعية و طبعا معى الاوراق اللازمة لنقل الحيازة لأسمى و ما الاجراءات المطلوبة بالضبط؟ مع خالص شكرى
طيب دلوقتي أنا إشتريت شقة بإحدي المدن الجديدة اللي تبع هيئة المجتمعات العمرانية بس الشقة في عمارة على أرض إسكان عائلي والرخص سليمة
عملت عقد وكان موجود محامي من طرفي راجع العقد ودفعت الفلوس ومالك العمارة والأرض عملى توكيل بالبيع والتعامل مع الجهاز والكهرباء ومعملتش أي حاجة تاني بعد كده والمحامي مقالش إن فيه خطوات تانية غير إني أستلم الشقة وأقفلها وقفلتها فعلا بقفل وانا خارج مصر فلسه مبدأتش تشطيب
إيه الإجراءات بعد كده بالنسبة للمدن الجديدة وإيه موضوع التسجيل ده وبيتعمل فين وإيه الأوراق المطلوبة والرسوم
بالعكس
مهم جدا ان المسألة تبقى واضحه وقانونية تماما
ومسالة الضرائب مطبقة سواء منشأة فردية او شركة او ايا كان النشاط
ولازم تعرف ان المشاكل بتحصل دايما خصوصا لما ان شاء الله المشروع ينجح
وكله يطمع في حته اكبر ..
النفوس تتغير
والورق ثابت ....
وخلي محامي بيفهم وتثق فيه يحضر العقود عشان ما يبقاش فيه اختلاف بعد كده ..
او مشاكل تهد النشاط
بالتوفيق ان شاء الله
من الافضل لك التعامل مع محامي قريب لك ,.. او تعرفه
لانهاء الاجراءات..
والمسألة كلها صورة البطاقة .. ولو شركة ام منشأة فردية
الشركة يكون هناك عقد بين الاطراف .. سواء توصيه بسيطه او تضامن مثلا
ثم الضرائب .. وتسجيل العقد في الشهر العقاري .. وشهره بالمخكمة
وتختلف المسألة حسب طبيعة العقد
اذا كان عقد اموال ام اشخاص
من اجل هذا من الافضل ان يتابع معك محاميك
بالتوفيق
لو سمحت اريد حلا قانونيا لهذه المشكله :
امتلك جدي 3 قطع اراض اصلاح زراعي ولديه من الابناء 7 اولاد و2 بنات ( اعمامي وابي) وتوفي ولم يقسم الارض عليهم وبقيت الارض كلها مع اعمامي لفتره طويله ( لانعرف اين يذهب خيرها )حتي كبرنا وكبرت المسئوليات الماديه ع ابي واراد ابي ان يلجأ الي حقه في الارض حتي يساعد في المعيشه وعندما عرض عليهم ( اخوته ) حقه ليشتروه رفضوا رفضا شديدا وتحججوا بحجج كثيره وقالوا الارض مش هتتباع او هتتقسم طول ماحنا عايشين (( ولا نعلم ماهو السبب )) اليس هذا حق والدي وميراثه الشرعي في والده .. وبقي والدي في صراعااات مستمره معهم من اجل ان يتفقوا ويحصل علي حقه ودياً ولكن ههيهات .. وبقي هذا الوضع حتي توفي والدي رحمه الله ولم يحصل ع شبر واحد من حقه في والده.
وبعد الوفاه ذهبت لعمي الاكبر وطلبت منه حقنا فقال لنا حق ايه (( نتعالوا كل موسم وخدوا حقكم في ريع الارض وخلاص )) وبصراحه وافقنا منعا للمشاكل وهو احسن من مفيش وكان كل مره نروح ناخد حقنا في ريع الارض اوقع له اقرار اني استلمت ريع الارض لي ولامي ولاخوتي الي ان فوجئت في مره انه يعطينا اقل 5 مرات من حقنا واكثر (( تحديدا في 2010م ))فامتنعت عن التوقيع منفعلا مطالبا بحقنا الشرعي في الارض وحق والدنا الذي توفي ولم ياخذ حقه ... واحااااول الان بكل الطرق ان احصل ع حقنا منهم علما بان اعمامي كلهم ع نفس موقف عمي ولا يريدون ان يعطونا اي شئ
فاستشرت بعض الناس فقالوا لي اوقف الحيازه الزراعيه وارفع قضيه
فاريد ان اعرف الخطوات القانونيه بالظبط ... وشكرا مقدما
السلام عليكم ورحمة الله وبركاته
استفسار بخصوص قانون الوظيفه المدنيه الجديد بمصر بخصوص بند الاجازات بدون مرتب للعمل بالخارج
هل تم تحديد حد اقصى للاجازات بدون مرتب للعمل بالخارج لانى باسمع كلام كتير عن الموضوع ده لكن لما دورت على النت لم اجد فى القانون ما ينص على ذلك
وهل لو تم تطبيق ذلك سوف يتم باثر رجعى ام يبداء عد السنوات من تاريخ تطبيقه
مع الشكر
أهلا بك
اولا : -
من الواضح انكم ستعانون في هذه المسألة كثيرا
ولذا عليك الاستعانه بمحام من المنطقه التي تعيش فيها .. ولديه علاقات وخبره جيده
والاهم الا يكون له علاقه باقاربك
ثانيا
سيقوم المحام باتخاذ الاجراءات القانونية .. لضمان حقكم .. منه امسألة الحيازة الزراعية
وكذلك كنوع من التهديد وضع الارض تحت الحراسه .. لحفظ غلتها لحين تقسيمها ..
ويجب ان تتم الاجراءات بحذر
فان اقاربك سيقاومون بشده .. وسيستغلوا ضعاف النفوس بكل تأكيد
للدفاع عن الارض ...
او منحكم قطعه ميته .. يمكنهم مثلا قطع الماء عنها او التحكم فيها بعد التقسيم
لذا يجب ان يكون المحام معك خبره .. ويتحرك بخطه واضحه
بالتوفيق
السلام عليكم..
لدي أستشاره وأرجو إن أحصل لديكم الجواب الوافي..
أحد المعارف قام بشراء شقه سكنيه من المالك في احد المدن الجديدة المسئوله عنها شركه، وتم كتابه عقد بيع وعمل توكيل خاص بالبيع والتعامل مع الشركه المالكه للمدينه.
ولكن لم يتمكن من تسجيل العقد في الشهر العقاري لان الشركه صاحبه العقارات لا تقوم بتمليك الارض.. بالتالي غير ممكن عمل دعوي صحه ونفاذ حسب كلامهم.
اللي جانب إن رسوم التسجيل في المدينه 30 الف جنيه!!!!!
الان حينما تم الاتصال بالشئون القانونيه الخاصه بالمدينه للسؤال عن التسجيل أخبروة إنه يلزم توكيل عام أو حضور صاحب الشقه شخصيا... وانه غير ممكن بأستخدام توكيل خاص وان هذه هي قواعد الشركه.
فكيف لا يمكن بأستخدام توكيل خاص مسجل بالشهر العقاري وما فائدته أذن؟!!!
وهل لا قيمه الان للعقد المكتوب بينهم اللي جانب التوكيلات والعقد الخاص بالمالك القديم من المدينه؟!
وشكرا لك أستاذي الكريم وجزاك الله كل خير
اهلا بك
لا اعرف بالنسبة للشركة ما معني عدم قبول توكيل خاص رسمى
او ان التسجيل بها للشقة 30 الف !!!!!
اي اغلى تقريبا 7 مرات من الجهة الحكومية المختصه وهي الشهر العقاري !!!!
بالنسبة للتوكيل فهو ساري وسليم
ولكن في حالة وفاة الموكل فهذا قد يؤدي الى تعقيدات تتعلق بعدم صلاحيته
او امكانية الطعن فيه في حالة استخدامه من قبل المشتري
من الافضل حاليا ان يوقع ورثه البائع على العقد تحسبا لوفاته
والعمل مع ادارة الشركة او المدينه لايجاد حل
والا فيجب لعلاج هذا الامر .. حضور صاحب الشقة الاصلي بنفسه
للتخلص من ذكاء ادارة الشركة او المدينه
للحفاظ على حقوق المشتري
شكرا لك أستاذي علي التوضيح..
برأيك هل لا يمكن الضغط علي الشركه للقبول بالتوكيل الخاص الرسمي، والعقد المكتوب بينهم.. وإيضا العقد الخاص بالمالك ألاصلي للشركه للقيام بنقل الملكيه؟!!
إم أنه لا يوجد حل معهم غير حضور صاحب الشقه الاصلي اللذي ربما يكون مشغول أو بعمل أو او .. الخ ؟
وشكرا مره اخري
هو الفكره يا أستاذ هاني أنه المالك الاصلي مسافر وغير متواجد حاليا بمصر ومسأله عمل توكيل من بلده وتوثيقه في السفاره متعبه نوعا ما..
فهل ممكن يتم التسجيل بالتوكيل الرسمي المخصوص للشركه وبباقي الاوراق بالرغم من شروط المدينه التعسفيه؟!!
وهل ممكن حضرتك تتابع الموضوع كون أنه في اختصاص وظيفتك ولو بأجر.. لانه تعامل الفرد العادي يختلف عن تعامل المحام أو المستشار القانوني.
انا مقيم فى اسكندرية وثلاجة البيت عندى عطلت فاتصلت بواحد فنى علشان يصلحها المهم جالى البيت وقال ان الموتور محتاج يتغير واخذ الموتور القديم وعربون وتانى يوم جاب الموتور الجديد وركبه وشحنة بالفريون والثلاجة ابتدت تشتغل واخد باقى حسابه 550 جنيه وثانى يوم الثلاجة عطلت اتصلت بيه وجالى البيت وقالى ان ضغط الفريون عالى وقلل الفريون وابتدت تبرد وبعدين برده ما اشتغلتش اتصلت بيه وقلتله قالى ازاى يعنى قلتله زى ما بقولك كده تعال شوف فيها ايه المهم ادانى ميعاد ومجاش وفضلت اتصل بيه ميردش عليا وتانى يوم – وكان يوم جمعة - اتصلت بيه وفضل ما يردش عليا لحد لما رد عليا وقالى انه مش بيشتغل يوم الجمعة المهم انفلت عليه وقلتله انه لازم يجى يشوف حل للمصيبة اللى عندى فى البيت دى المهم جالى البيت وفحص الثلاجة قالى مش عارف فيها ايه وقام قطع وصلات الموتور وقام علشان يمشى قلتله انت رايح فين قالى رايح اجيب عدة علشان اشحن تانى وراح وغاب فضلت اتصل بيه ميردش عليا لحد لما المدام بتعته ردت عليا وقالتلى هو مش قاللك انه مش بيشتغل يوم الجمعة قلتلها هو كان عندى وقال انه رايح يجيب عدة قالتلى هو نزل وساب التليفون - وانا عارف انه قاعد جنبها – المهم قلتلها انا عايز اكلمه قالتلى 5 دقايق وهيكلمك وفعلاً كلمنى وقالى ان بجهز العدة قلتله انت اتأخرت قوى انت جاى ولا مش جاى قالى انا مش جاى وملكش حاجة عندى واللى انت عايز تعمله اعمله
رحت قسم سيدى جابر التابع لمحل سكنى وعملت محضر وطلبت منهم يستدعوه فى القسم قالولى ميقدروش يستدعوه لإن عنوانه فى دائرة قسم تانى – قسم الرمل . سالت فى القسم عن اللى هيحصل قالولى لازم تتابع المحضر فى النيابة بعد 4 ايام من تاريخ المحضر علشان يحصل حاجة وإلا محدش هيعمل حاجة.
انا حاسس بالاحباط ومش عارف اعمل ايه علشان آخد حقى . ياريت حضرتك تساعدنى
للاسف ان المسألة ممكن تطول بلا داعي
ولن تأخذ حقك
لو كان مركز صيانة كان ممكن تاخد حقك بسهوله عن طريق حماية المستهلك
لكن الافراد حتبقى كلمتك امام كلمته بلا فائده للاسف
لو مستعد تصرف ممكن يتم الضغط عليه بشكل قانوني
ولكن اعتقد ان المصاريف احسن لك تكون في تلاجه جديده
معلش هو ده الواقع للاسف
ياريت تجاوبني أستاذ هاني.. وشكرا لك.