اقتباس المشاركة الأصلية كتبت بواسطة fahd_628 مشاهدة المشاركة
بصو انا رأى ان دة فعلا اهلاك للمكنة

اولا عند 6,000 لفة فى الدقيقة يعنى 100 لفة فى الثانية

انتو متخيلين قد اية الموتور شغال بسرعة ؟؟؟؟؟

دة غير طبعا ان الأحتكاك بيبقى عالى جدا و بيحصل Wear اسرع للبساتم و الشنابر و الجدار

تانى حاجة بالعقل كدة بص على عربية اى شاب مقديها جرى و حرق و الكلام دة و بص حتلاقى المكنة مفوتة و بتطلع دخان ( مش كلة طبعا دة مجازا بس شباب كتيير حتلاقى مكنهم مفوت )

و للعلم كل العربيات الحديثة فيها Rev limiter يعنى عمرك ما حتسرع الموتور الا لو نقلت نقلة غلط من خامس لثانى مثلا بدل رابع على سرعة عالية

و مش معنى ان اقصى سرعة للعربية 200 كم/س انى افضل ماشى 200 كم/س على طول لأ طبعا

و بعدين انا مش حنسى كنت قريت زمان اعلان ل BMW فى مجلة كان مكتوب مواصفات العربية و السرعة القصوى و كان مكتوب تحت كدة ان BMW مبتنصحش بالمشى فوق 4000 RPM لفترات طويلة

والله يا جماعة هوة دة الى كان مكتوب

و فعلا العربية الى بيتجرى بيها و الكلام دة حتلاقيها اسرع من الى بيتمشى بيها عادى بالراحة بس الى بيتجرى بيها هتعمر بدى طبعا محدش يقدر يقول بدرى قد اية بس انا شايف ان 6,000 RPM دة حيقصف عمر الموتور قريب جدا لو بتفضل ماشى كدة على طول

و على فكرة انا بمشى بعربيتى و بنقل عند 2500 ل 3000 RPM فى العادى و لكن اوقات الجرى بنقل عند 6000 - 6200 RPM

و دة الطبيعى انك مش حتفضل تنقل على طول على RPM 6000 دة كدة غلط و انت حر فى الأخر

و على فكرة عود نفسك على النقل بدرى علشان انا كان جاتلى فترة على طول بحب انقل عند 4,000 او 5,000 RPM بس بعدين عودت نفسى انى انقل بدرى و احافظ على الموتور و اثناء الحاجة فقط انقل عند 6000

ليا واحد صاحبى متعود انة ينقل عند 5000 RPM برضة و مبيعرفش يسوق غير كدة و اتعود على كدة ربنا

و برضة انا حقنعك

ناخد اقصى الظروف

هات عربية فيات 127 مثلا مع احترامى الكامل ليها و موتورها خفيف شوية

و اقعد امشى بيها على 6000 RPM و شوف اية الى هيحصلها بعد شهر او شهرين

و شوف بقى لو كنت مشيت بيها طبيعى كانت حتقعد معاك قد اية

و بعدين محدش يقولى عربيتى مش زى ال 127 لأنها جديدة

لأ طبعا كل عربياتنا مش مصممة للقيادة الرياضية و الحرق على طول

الحاجات دية معمولة لل M3 مثلا او ال M5 او ما شابه ! معمول حسابهم انهم حيتساقو بسرعة و هيتحرق عليهم

لكن احنا كل عربياتنا 1300 او 1600 سى سى مش معمولين للكلام دة

و على فكرة انا طالب فى هندسة ميكانيكا يعنى مش بتكلم كدة و خلاص
يا فهد فيه فرق كبير جدا بين "استهلاك" و "اهلاك"...

لا جدال على ان الحرق بيعتبر "استهلاك" اسرع للمكنة و فى الظروف دى هنتكلم دايما عن الحد الادنى اللى لازم عندة تتعمل الصيانة عشان المكنة تعيش... يعنى اى قطعة ليها حد ادنى و حد اقصى لازم تتغير خلالة يبقى انت لازم تمشى على الحد الادنى لان استهلاكك عالى

العكس بالعكس "الاهلاك" هو انى استعمل العربية و هى فعلا محتاجة صيانة يعنى امشى بيها بزيت منتهى الصلاحية او بدون مياه تبريد او بوجيهات ميتة و فلاتر مسدودة... بغض النظر عن طريقة سواقتى فا كل كيلو بمشية بيقلل من عمر المكنة فعلا لانى بستخدم الموتور بطريقة غلط و دة بيضر المكنة

و بعدين لو هنتكلم كلام نظرى فقط... ليه الريد زون معمولة عند 6500 مثلا مش 3000 او 4000 طالما ان المشى على RPM اعلى من كدة مضر للمحرك؟؟... و بما انك مهندس ميكانيكا فا اكيد انت عارف ان القدرة الحصانية القصوى للمحركات بتاعت السيارات بتطلع قرب الحد الاقصى للفات المكنة يعنى فى حدود 5700 او 5800... هل معنى كدة ان الاستخدام الصح للمكنة يعنى عدم استخراج كامل قدرة المكنة تحت اى ظرف؟؟... طيب انا هستفيد ايه من مكنة بتطلع 200 حصان عند 5800 لفة اذا كنت عمرى ما حزود عن 3500 عشان المكنة متبوظش؟؟

و على فكرة الشباب اللى بتتكلم عليهم و ماشيين بمكن مفوت دة بيرجع لاهمال الصيانة مش لانهم بيحرقوا و كدة... يوم ما تبقى فاضى عدى عليا فى الرحاب اخلليك تجرب عربية الوالد... العربية دى موديل 99 و عاملة 133 الف كيلو منهم بتاع 100 الف سواقة حرق... و لحد النهاردة ما شاء الله بتجيب اقصى سرعة مكتوبة فى كتالوج العربية بالرغم من طريقة السواقة و عدد الكيلومترات و عدد السنين اللى عدت عليها

الموضوع دة بالضبط زى ما تجيب واحد بيلعب رياضة وواحد مدمن مخدرات.... مينفعش تقول ان اللى بيلعب رياضة هيموت بدرى او حتى هيعجز بدرى لانة بيبذل مجهود و بيهلك عضلاتة... دة بيعمل حاجة طبيعية و متوافقة مع الغرض اللى ربنا خلق العضلات عشانة... بالعكس دا هتلاقى صحتة احسن من الشخص العادى... بس بشرط طبعا انة يتغذى كويس و يعوض الطاقة اللى بيحرقها و الا يفيص

اما اللى بياخد مخدرات فا دة بيهلك فى جسمة و بيبوظة و لازم يخرالة حاجة وحشة عاجلا او اجلا... هو اساسا جسمة مش معمول لاستيعاب المخدرات و تراكمها لازم يسبب اضرار و تلفيات بدون ادنى شك

ارجو انى اكون قدرت اوضح الفرق بين "الاستهللاك" و "الاهلاك" بشكل جيد

MMamdouh