اقتباس المشاركة الأصلية كتبت بواسطة mmamdouh مشاهدة المشاركة
يا فهد فيه فرق كبير جدا بين "استهلاك" و "اهلاك"...

لا جدال على ان الحرق بيعتبر "استهلاك" اسرع للمكنة و فى الظروف دى هنتكلم دايما عن الحد الادنى اللى لازم عندة تتعمل الصيانة عشان المكنة تعيش... يعنى اى قطعة ليها حد ادنى و حد اقصى لازم تتغير خلالة يبقى انت لازم تمشى على الحد الادنى لان استهلاكك عالى

العكس بالعكس "الاهلاك" هو انى استعمل العربية و هى فعلا محتاجة صيانة يعنى امشى بيها بزيت منتهى الصلاحية او بدون مياه تبريد او بوجيهات ميتة و فلاتر مسدودة... بغض النظر عن طريقة سواقتى فا كل كيلو بمشية بيقلل من عمر المكنة فعلا لانى بستخدم الموتور بطريقة غلط و دة بيضر المكنة

و بعدين لو هنتكلم كلام نظرى فقط... ليه الريد زون معمولة عند 6500 مثلا مش 3000 او 4000 طالما ان المشى على rpm اعلى من كدة مضر للمحرك؟؟... و بما انك مهندس ميكانيكا فا اكيد انت عارف ان القدرة الحصانية القصوى للمحركات بتاعت السيارات بتطلع قرب الحد الاقصى للفات المكنة يعنى فى حدود 5700 او 5800... هل معنى كدة ان الاستخدام الصح للمكنة يعنى عدم استخراج كامل قدرة المكنة تحت اى ظرف؟؟... طيب انا هستفيد ايه من مكنة بتطلع 200 حصان عند 5800 لفة اذا كنت عمرى ما حزود عن 3500 عشان المكنة متبوظش؟؟

و على فكرة الشباب اللى بتتكلم عليهم و ماشيين بمكن مفوت دة بيرجع لاهمال الصيانة مش لانهم بيحرقوا و كدة... يوم ما تبقى فاضى عدى عليا فى الرحاب اخلليك تجرب عربية الوالد... العربية دى موديل 99 و عاملة 133 الف كيلو منهم بتاع 100 الف سواقة حرق... و لحد النهاردة ما شاء الله بتجيب اقصى سرعة مكتوبة فى كتالوج العربية بالرغم من طريقة السواقة و عدد الكيلومترات و عدد السنين اللى عدت عليها

الموضوع دة بالضبط زى ما تجيب واحد بيلعب رياضة وواحد مدمن مخدرات.... مينفعش تقول ان اللى بيلعب رياضة هيموت بدرى او حتى هيعجز بدرى لانة بيبذل مجهود و بيهلك عضلاتة... دة بيعمل حاجة طبيعية و متوافقة مع الغرض اللى ربنا خلق العضلات عشانة... بالعكس دا هتلاقى صحتة احسن من الشخص العادى... بس بشرط طبعا انة يتغذى كويس و يعوض الطاقة اللى بيحرقها و الا يفيص

اما اللى بياخد مخدرات فا دة بيهلك فى جسمة و بيبوظة و لازم يخرالة حاجة وحشة عاجلا او اجلا... هو اساسا جسمة مش معمول لاستيعاب المخدرات و تراكمها لازم يسبب اضرار و تلفيات بدون ادنى شك

ارجو انى اكون قدرت اوضح الفرق بين "الاستهللاك" و "الاهلاك" بشكل جيد

mmamdouh


لحد دلوقتي محدش إدالنا تفسير علمي لكلمة فتح الموتور !!!!!!!!!!!!!!!

يعني إيه موتور مفتوح وموتور مقفول؟؟؟؟؟؟
اللي الناس عارفاه إن الموتور لما بيبقى مفتوح .. يعني استجابته أسرع وقوته أعلى

طيب إيه اللي بيخلي الموتور يعمل حاجة زي دي؟؟؟؟ محدش عنده تفسير علمي (هندسي) لحد دلوقتي

الوحيد اللي قال حاجة قريبة هو المهندس فهد

اللي أنا متخيله إن الموتور لما بيلف بسرعة عالية.. معدل التآكل بيزيد (أكيد 100%)، لإن معدل التزييت في الموتور بيقل (ليه؟؟؟)، عشان الزيت مش بيلحق يوصل للأماكن اللي المفروض تتزيت بالسرعة المطلوبة، ويمكن تحتاج زيت أخف

ومع الوقت.. بتبدأ الشنابر والبيل بتاع الموتور يتاكل.. وده بيخلي حركة الموتور أسهل بدون شك لإن المقاومة بتاعة الاحتكاك قلت، فلما تدوس بنزين.. العربية حتجري

من هنا بييجي موضوع إن الموتور الفاتح حيعمل عمرة بدري شوية

في حاجة تانية
فيه أجزاء تانية متحركة زي كابل البنزين مثلا.. لو انت متعود تدوس الدواسة للآخر.. حتلاقي الكابل بيتحرك كامل مشواره بسهولة.. غير اللي متعود يدوس نص المشوار بس

وحاجات زي دي كتير

أنا كان معايا تويوتا كريسيدا 82 (كاربيراتير)، ولما كنت بحط wd-40 أو زيت على اللينكات والبوابات اللي فيه كان أداء الموتور بيتحسن جدا.. وكأن الموتور فتح
فيه حاجات تانية غير إنك تسوق بسرعة عشان تخلي الموتور يفتح

أنا واحد من الناس مع العصبية في السواقة كنت باوصل لحدود الخط الأحمر.. بس ما كنتش بعديه، وعملت عمرة للعربية عند 340000 كم، وجزء كبير من سواقتي كانت على لفات أعلى من تلتين الخط الاحمر، بس مش ده لوحده يخلي عربيتك تفتح موتورها


...