المشاركة الأصلية كتبت بواسطة MMamdouh
للامانة مرة واحدة و دى اللى عرفتنى ان الفرملة بالطريقة دى فاشلة اخر 99 حاجة...
كنت على صلاح سالم و راجع متاخر بليل و ماسك اقصى اليمين و ماشى 130 و فجاءة قرر واحد بسيات ماشى فى الحارة اللى فى النص يدخل يمين و هو ماشى بسرعة 40 مثلا و راح محود قدامى... انا شوفتة و فرملت بالمنظر اللى انت شوفتة فى الفيديو... و كل الاحداث التالية حصلت و انا مفرمل:
اولا انا اتخضيت لانى كنت سريع جدا و هو بطىء جدا فا كنت بقرب منة بسرعة... فكرت احود يمين زيادة و اعدى قبلة بس هو بيروح يمين و بيضيقها عليا... فكرت اروح شمال بس و لما فرملت العربيات اللى عديت منها حصلتنى بقت جنبى... ملقيتش حل غير انى افضل مكمل عدل و انا و ظروفى بقى... فى الوقت دة بتاع السيات اكتشف المصيبة اللى حتحصل فا عدل نفسة و كمل طوالى و ادس بنزين عشان يبعد عنى
اقسم بالله العظيم كل دة حصل و انا دايس فرامل على الاخر و العربية بتزحف على الطريق...
المهم ان العربية كملت زحف و خبطت الراجل فى ضهرة فعلا و رحنا راكنين على جنب احنا الاتنين...
اول ما نزلت من العربية كان فية كمية دخان فرامل وهمى و رايا و ريحة كاوتش محروق خانقة... و بتاع السيات لما نزلت مقالش غير جملة واحدة "كل دى فرملة؟؟.... كل دى فرملة؟؟؟"
طبعا الحمد لله ان محصلش مصيبة لان لما عربية ماشية 130 دخلت فى عربية ماشية 40 اكيد لازم تخلص بكارثة... و فعلا انا فقدت الامل ان العربية تقف قبل السيات و مفهمتش ليه زحفت كل دة و مهدتش سرعتها... بعد كدة لما فهمت الفرامل بتشتغل ازاى عرفت لية دة حصل و عرفت انة طبيعى جدا كمان...
ساعه الموضوع دة انا كان عندى حوالى 22 سنة و خبرتى فى السواقة قليلة عشان كدة عملت الغلطة دى... الحمد لله دلوقتى لما الموقف بيبقى صعب كدة بقدر انى افرمل جامد من غير ما اوصل لنقطة الزحف دى و دة خرجنى من كذا موقف وحش بسلام و الحمد لله
MMamdouh