الموضوع: هل كبرت على المكان إللي بتشتغل فيه؟

السلام عليكم

اولا أتمنى أكون حطيت الموضوع في مكانه الصحيح ... يعني المنتدى الإجتماعي ولا المنتدى العام .... المهم أتمنى إنه يكون موضوع مفيد للمناقشة والإفادة ولا يكون كما وصفه أخونا كريم (cryptonx) واحد من مواضيع العك الإجتماعي:)

وبما أن المنتدى هو واحد من أهم المتنفسات لي ويمكن للكثير منا فحبيت انفس عن نفسي وأدخل معاكم في نقاش او إستطلاع رأي او حوار عن مشكلة بتؤرقني منذ فترة وبتلح عليا مؤخرا.

+++ هل كبرت على المكان إللي بتشتغل فيه؟ ++++++++

مش علرف لية إخترت العنوان ده بس إللي جه في بالي وقت الكتابة ..... ليس المقصود بكبرت هو التعالي على العمل ولكن معناه ان الإمكانيات والقدرات والطاقة الموجودة أكبر من مكان العمل..... أن رب العمل غير قادر على إستيعاب هذة الطاقة وتوظيفها في مكانها السليم ..... أن عدد ساعات عمل كثيرة تتحول إلى روتين وتصفح صفحات النت ..... أن القدرة الإنتاجية قليلة وما باليد حيلة وإذا كان صاحب العمل راض عما توصل إلية من جمع الأموال ولا يريد الرقي أكثر ..... انك تسعى بنهم للوصول إلى حلول ولكنك تواجه الباب المسدود وهو الوقوف "محلك سر".... أنك تسعى وراء الكورسات والشهادات والخبرات النظرية ولكن للأسف لا تستطيع التطبيق!

كل هذا وتعمل مع أجانب ومرتب مجزي والحمد لله والاسم شركة ملتي ناشونال ..... ولكن لا جديد! فماذا تفعل؟؟؟؟

1- تسيب المرتب والمكان إللي قعدت سنين فية علشان مخاطرة غير معروفة؟
2- تسيب بلدك وتروح بلد تاني ممكن يقدر الإمكانيات ويخليك تشتغل ويفرغ كل طاقتك؟ (للأسف مجالي محدود جدا جدا جدا في مصر ولكنه رائع في أوروبا ويزدهر الأن في الخليج).
3- السن صغير تحت 30 وحاسس إني بعد 10 سنين (إن شاء الله) حفضل في مكاني!
4- فاضلي درجة وأبقى المدير... بس المدير الأجنبي بيعمل إية؟ قاعد وأنا بعمل الشغل! هو فرحان بالمرتب وجو مصر الرائع ومش مهم الخبرة إللي يكتسبها من المكان.... يعني لا طموح في الوظيفة!

ولكن

مرتب مجزي مكفي الاقساط والمصاريف بس مش يخليك تركب عربية كاش او يكون عندك شقة مش فيلا تصيف فيها + قاعد في وسط أهلى + ساعات عمل محددة + لا يوجد ضغط شغل!

ملحوظة عندما بدأت في العمل كانت الأمور طاحووووووونة وسهر في الشغل وضغط .... بس خلاص مفيش! يمكن الواحد إتعود على ضغط الشغل؟

معلش موضوع مكعبل ويمكن أفكار مش منظمة بس إللي جه في دماغي قولته!

والله المستعان

بص يا أحمد كلامك سليم 100%

بس إنت لازم تحسبها كــ Package

يعنى إنت دلوقت مميزات شغلك إيه :

1- مكان أخدت عليه
2- عندك وقت فاضى (ينفع تستغله فى تطوير مهارات أو كورسات) تمهيدا للنقله القادمه
3- مرتب مكفى إحتياجاتك
4- قاعد فى بلدك
5- عرفت دية شغلك و مديرك و أجازاتك و مواعيدك

طب لو هاتنقل تحسبها إذاى ؟

1- الخطوة إللى جاية خطوة الهدف منها postion ولا فلوس ؟
2- فين ؟ و المخاطرة تستحق ولا ؟
3- إمتى (مهم أوى تظبط الوقت) عشان لو روحت و مارتحتش يكون عندك خطة بديله مش فى عز معمعه الأقساط و تفضل فى بيتكم شهرين 3 تصرف من الهوى
4- هاتتنازل عن إيه مقابل إيه فى ال package الجديده ؟


كل شغل فى الدنيا فيه الحلو و الوحش مفيش مكان هاترتاح فيه 24 قيراط و فى مصر مفيش مكان هايرضيك حتى 15 قيراط - لو فيه فلوس كويسه - هاتلاقى مواعيد هباب و مدير غبى و زملاء مش عارف إيه
لو مواعيد حلوه و بيئة الشغل مريحة - هاتلاقى فولس قليله و مفيش طموح للتوسع ....

و هكذا


حط مخطط للـ 3 سنين قدام - 5 سنين قدام و إبتدى فكر إنت عايز تبقى إيه و إذاى

ربنا يوفقك و يكرمنا جميعا