الموضوع: بالصور تنضيف الهوايات و الكاربون فايبر للكرستالة

المشاركة الأصلية كتبت بواسطة sasa3

السلام عليكم و رحمة الله و بركاتة

كنت من كام يوم عند واحد بتاع اكسسوار عربيات و لقيت عنده بالصدفه الكاربون فايبر اللون الى انا كنت عاوزه فاخذت من 1/2 متر و قولت اما اضبط انا بقا العربيه بنفسى
و كنت عاوز اعمل كاربون على الهوايات و المنطقة بتاعت بكر التكييف فى النص و لقيت ان المنطقه بتاعت العدادات ممكن تتعمل كمان بالكاربون فايبر

فقولت اتكل على الله و ابدا افك حتة حتة كده (اول مرة كنت افك فيها اى حاجه من العربية )

نيجى لفك العدادات

و متنساش تنزل الدركسيون لتحت خالص علشان تاخد راحتك

الاول هنشيل المسمارين الى ماسكين الفبرة الى قدام العدادات من هنا و بعدها نسحب الفبرة بالراحة هتطلع معانا بسهولة

بعد ما فكينا الفبرة هتلاقى العدادات ممسوكة باربع مسامير فى الماكن الى عليها الدائرة الحمرا نفسكهم بسهولة و بالراحة و ياريت لو معاك wd-40 لو حاجه مش راضية تتفك
نمسك العدادات من الجوانب و نسحبها علينا و بالراحة برضه هتطلع

و اما نشيل العدادات هنلاقى وراهم المنظر ده و نخلى بالنا من الكلبسات الى فوق ده علشان متقعش

و اما فكيت العدادات قولت اما اغير النور بتعهم و فكيت لمبة بالقاعده بتاعتها (لف القاعده ربع لفه هتلاقيها فكت معاك بسهولة ) و دورت على زيها و كان اسمها لمبة من غير كعب و كانتوا 3 كبار و واحده وسط
الواحده كانت ب1.75 جنية
و ابقا شيك على كل اللمبات يمكن واحده محروقة او حاجه
و اماكنهم قدامك اهوه الى بالاحمر دول و فيه واحده مستخبية فوق شوية

و ديه الفبر بتاعت العدادات الى كنت ناوى اعملها كاربون فايبر برضه

و بمناسبة تغيير الانوار بتاعت العدادات كانت لمبة الولاعة مش شغالة قولت اما افكها و اشوفها
الاول نشيل الطفاية بسهولة و نسحب من نفس المكان ده الاول و بعدين من الناحية التانيه و من فوق هتطلع معانا بسهولة (لو عندك كاسيت يا ريت تشيل وشه قبل ما تبدا علشان ميتجرحش)

هتلاقى المنظر ده بعد ما تشيل الفبرة اكتشفت ان فيه لمبة للولاعه بس كانت محروقة
المهم لمبة الولاعه و لمبة الطفاية الى بالاحمر دول و بنفكهم برضه زى ما بنفك لمبات العدادات ربع لفه و يطلع معاك عادى خالص و هتلاقيهم عليهم غطاء اخضر كده ممكت تشيلة و تركبة للمبة الجديده لو عاوز النور يبقا اخضر الى فى الولاعه و الطفاية او متركبوش براحتك

و كده انتهينا من تغيير الانوار

نيجى بقا للفايبر كاربون

نيجى نفك الهوايات الى فى الجوانب تحط المفك مطرح ما انا حاطط و مفك تانى من تحت و بالراحة نضغط من فوق هتلاقيها طالعه معاها برضه بالراحة (معلش صورتها بعد ما كنت خلصت)

و اول ما نفكها و نطلعها نفك الوش فقط و نطلعه

باقى الهواية بعد ما شلنا منها الوش هتلاقى فيها كمية تراب و شحم مش معقولة الحل ايه علشان تنضفهم --> ازازة بنزين او بجنيه بنزين و كيس قطن ب 2.5 جنية و تقعد تمسح فيها لحد ما الشحوم و الاتربة الى فيها تروح و فى الرريش برضه هتلاقيها وسخة كده ننظفها بالبنزين و نسيبها يوم بره فى البلكونة او على الشباك علشان ريحة البنزين تروح

و بعدين نيجى للوش بقا و ياريت يكون معانا مسطرة و تاخد مقاساتك قبل ما تشتغل علشان تقطع صح

دول وش الهوايتين بعد ما ركبت عليهم الاكاربون فايبر

و نروح للباب و نفك لوحة الزجاج الكهرباء الاول نفك المسمار الى فى المقبض و بعدين نحط مفك تحت مكان السهم الى فى الجمب و نرفعها شوية و بعدين نسحبها لتحت شوية هتلاقيها طلعت و مربوطه بكلبس كهرباء ابيض هتلاقى له سنة طالعه شوية كده نضغط عليها و نطلع عادى زى اى فيشة كهرباء فى العربية

و نفس النظام فى الباب التانى

و ده هيكون الشكل النهائى للتابلوة

و يوم ما انا ركبت الحاجه ده قولت اما اركب بقا فرش للعربية بالمرة

و لو فيه اى استفسار انا موجود فى الخدمة قولوا انتوا بس

و معلش طولت عليكم

والله زى الفل ماشاء الله جميل جدا