الموضوع: الحمد لله استلمت السيفيك بس مفيش نمر في المرور الا بالرشوة آه يا بلد!!!!!!

الحمد لله يا جماعه استلمت السيفيك و العربيه ما شاء الله لا قوة الا بالله حلوة بس هي في 3 ملاحظات عليها :
1- العربيه عريضه فلازم الواحد ياخد باله قوي من الابعاد خصوصا في الشوارع الجانبيه الضيقه انا للأسف حكت مني المرايه من أول يوم علشان مكنتش مقدر العرض صحز
2- في صوت تكتكه جي من العجلتين اللي قدام لما بركن أو بطلع خصوصا لما بكون لافف الدريكسيون على آخره يا ترى ده طبيعي؟؟
3-الفرامل ضعيفه الى حد ما يعني لازم الواحد يسيب مسافه شويه بينه و بين اللي قدامه خصوصا ان السحب ما شاء الله حدث و لا حرج.

المشكله يا جماعه اني رحت المرور الجميل بتاع عين الصيره انهارده علشان أرخص فوجئت بلأتي :

1- طفايه الحريق بقت ب 121 جنيه رغم انها كانت ب 96 جنيه الأسبوع اللي فات طبعا لأن المصنع ملك لشخصيه مهمه في الدوله طبعا كلكم عارفينه وهو الى رفع السعر 25 جنيه مره واحده وده طبعا لان اللي شاري عربيه ده كافر ولازم يقشطوه.
2-مهندس الفحص قعد يقولي كل سنه وأنت طيب عشرين مره ومسكتش الا لما لهف عشرين جنيه وده على أساس ان المره بجنيه.
3- الحمد لله دفعت الضريبه القديمه و خلصت الورق وجت آخر مرحله اني أروح للمقدم هشام رئيس المرور أو زي ما بيقولوله هشام باشا !!!
4- دخلت عليه لقيته ماسك السيجاره و بيكلمني من طرف منخيره مفيش نمر تعالى اسأل يوم التلات بصراحه كنت عايز اتف عليه بس ان ليك عند الكلب حاجه المهم مشيت وأنا مضايق طحن.
5- شوفت ناس عماله تخرج بنمر ولما سألت عرفت انهم بيظبطوا الأمين اللي مع المقدم المريض ده من 200 الى 300 جنيه وطبعا المقدم بينصص مع الأمين من الباطن حقول ايه غير حسبي الله ونعم الوكيل!!!!!

المهم أنا دلوقتي مش عايز أدفع رشوه بس في ناس بيقولولي هتروح التلات هيقولك تاني مفيش نمر وهكذا ...... يا جماعه ايه الحل ده حتى الموظفه اللي بتاخد الورق هي كمان طلبت فلوس وش كده قولولي أعمل ايه ؟؟؟؟؟؟؟؟؟؟؟

أنا بفكر أطلع على وزاره الداخليه أعمل شكوى خصوصا ان والدي عقيد بالجيش ومشجعني على الخطوه دي ايه رأيكم ؟؟؟؟ ولآسف للاطاله

أولا : ألف مبروك علي العربية وربنا يحافظلك عليها واللي راكبينها ان شاء الله
ثانيا : بخصوص الفرامل أعتقد أنها مش سيئة بالدرجة دي ولكن كما قيل لا بد من عمل حساب السيارات التي أمامك جيدا وموضوع الفرامل ده بسبب ال Abs كما قال أحد العاملين في الفطيم بالإسكندرية.
وثالثا بخصوص الدفع فهذا أصبح شيء عادي جدا وفي كل المواقع المرتبطة بالخدمات الجماهيرية وليس المرور فقط فالمجتمع كله أصبح ..... وذلك لأسباب كثيرة لا مجال لذكرها هنا. والموضوع أصبح محير بين الدفع وتفتيح الدماغ لإتمام أعمالك أو الرفض والإنتظار ليس لساعات بل لأيام. فما الحل؟؟؟؟؟؟؟؟؟