الموضوع: بلا جواز بلا هم

كلامك صحيح فعلا .. و فى حاجات كده مستفزة فعلا .. و الواحد بيفضل يفكر فيها و مبيعرفش ايه الدماغ دى.

1. عروسة رافضه انها تأجر فستان الفرح .. و مصرة انها تشترية .. و عريسها يقنعها انه يأجره حتى أول لبسه و هى مصرة انها تشترية .. أنا مش متخيل ايه الدماغ اللى تصرف 10 الاف جنية تقريبا فى حاجه هتستخدم ساعتين .. و ممكن تتأجر و تدفع ربع المبلغ ده.

2. شباب و بنات بيرقصوا بطريقة متعرفش منها اللى بيرقص ده ولد ولا بنت .. و البنات يقفوا و يصفقوا للولد و هو بيرقص بلدى .. و تلاقى بنت بتقول لصاحبتها ده بيرقص أحسن منى.

3. عروسة تقلع حجابها يوم فرحها .. لحد دلوقتى مش قادر أفهم الفكرة دى .. المفروض ان الست بتقعد فى بيتها براحتها .. و لما بتخرج بره بتلبس هدوم تانية محتشمة .. فى الفرح بأه العكس .. هيكون فى ناس كتير جدا و كله عينه على العروسة .. و مع ذلك البنت تعمل العكس .. تتزين و تخلع حجابها .. حتى المحجبه تلاقيها لابسة بدى أبيض شفاف .. و مجسم دراعها و ايديها .. و يا سلام بأه لو حد نصحها تقول له أصل أنا بتزين لجوزى .. طيب مانتى هتبقى انتى و هو لوحديكم .. اتزينى براحتك .. انما مش قدام الناس .. مش هقول حرام عشان محدش يقول بلاش كلام فى الدين .. بس هقول عيــب .. فعلا كده عيب.

4. نفس اللى فوق بس بالنسبة للعريس .. و عارف ان مراته هتبقى فى أحلى حالاتها .. و مع ذلك يعزم كل اللى يعرفه و اللى ميعرفوش .. و الناس تصور .. و الصور تطلع على الفيس بوك و اللى ما يشترى يتفرج .. و لو حد نصح يقول بلاش تشدد و كل الناس بتعمل كده و دى ليلة فى العمر.

سبحان الله فى الجاهلية اللى الناس عايشة فيها .. بعد ما تركنا الجاهلية و ربنا من علينا بنعمة العفاف و الحترام .. اتلعب فى دماغنا و كرهنا عادتنا و تقاليدنا .. و اتصور لينا ان التقدم و الحضارة فى البعد عن الاحترام و الأدب والأخلاق .. و ان التمسك بالعادات والتقاليد تخلف و رجعية و حاجه تخلينا نتكسف منها.

ربنا يهدينا جميعا و نرجع لعادتنا و تقاليدنا و تعالييم ديننا اللى هو أكبر نعمة ربنا من علينا بيه.