الموضوع: اثنين حينفصلوا او بمعني اوضح حيطلقوا بسبب.......

السلام عليكم ورحمة الله
اخوتى واحبتى للاسف وعلى مدى يومين اقرأ الموضوع والمشاركات وأجد ان اغلب المشاركات لا تراعى الجانب النفسى والسلوكى لدى الطرفين وأن اغلب احبتى من الجنسين يعطى اقتراح كعلاج عام يصلح فى جميع الاحوال والشخصيات دون تحسب ان ما يصلح زيد قد يضر بعمرو والعكس بالعكس والقليل القليل م يتروى فى المسألة وينظر بعين الصقر التى ترى الموقف من الاعلى وانه لابد قبل ان يحكم على الامور ان يسمع للاخر وما اظن ما حدث الا لان الراوية انثى ولا يعقل ان تشهد انثى لذكر فى زماننا المعيب بأهله الا ما رحم ربى
ولو تناولنا الامر برمته كعناصر يمكننا ان نرى ما يأتى:
1- ان ما يحدث لاخينا الان وهو ليس حاله فقط ولكن حال كثير غيره قد يكون ابتلاء وان الابتلاء قد يكون بذنب ولا يرفع الا بتوبه فنسأل الله لنا ولأخيتا التوبة والمغفرة وان يصرف عنا الهم والحزن وكان السلف يرون اثر ذنوبهم فى مسلك دابتهم وسلوك نسائهم واوصى نفسى واخى بقيام الليل فان اسهم اليل لا تخطىء
2- للاسف الشديد فترة الخطوبة فترة شديدة الحرج طالت ام كثرت وهى دائما وابدا فيلم عربى مصرى يحجث فيه من التجمل ما يحدث وعلى كل المستويات غنيهم وفقيرهم ملتزم بالدين وغير ملتزم وهذا التجمل غالبا من الطرفين وقد يزيد من طرف اهل الفتاه وانا هنا لا اتحامل على جنس ولكن من باب التجارب وليست تجربة بل كثير على المستوى الشخصى وعلى مستوى المحيطين اللصيقين بى وهنا يحدث الخداع الكبير -ارى البعض يقول لابد ان تزيد فتلرة الخطوبة واقول له "متحولش" والله مهما طالت وفى اسرنا المؤمن يلدغ من نفس الجحر مرات ومرات وانك لو رجع بك الاختيار لاخترت نفس الاختيار ولو بفروق طفيفة
وهذه نظرية علمية ان الاصل فى الانسان وخاصة اذا كان مثقف وعلى درجة علمية انه ليس بغبى وان اختياره مبنى على مجموعة من القواعد والاصول وان القرار انتهخاء مبنى عن معلومات وتغير المعلومات لابد ان يغير القرار فاذا قام الانسان باتخاذ قرار مبنى على قاعدة معلومات وبيانات محددة وثبت فشل لقرار واعيد عليه الموقف وتوافرت نفس قاعدة البيانات لوجد نفسه حتما سيتخذ نفس القرار وعن تجربة ايضا واعتقد انى لست بغبى-ههههه
ولكنى اشبه هذا بمن يقول يدعوا الله ان يردهم الى الحياة ليعملوا ثم يخبر الله انهم لو ردوا لعادوا لما نهوا عنه
فنحن نتخذ القرار الخطأ مرات ومرات اذا لم تتغير قاعدة البيانات
وقاعدة البيانات التى تظهر لنا فى فترة الخطوبة قاعدة مشوشة مليئة بالتجمل والمداهنة والظهور بافضل شىء ودائما وابدا الرجل مضحوك عليه لانه وحيد اما الفتاة فهى واهلها كثر ولو اخطأ احدهم لتجاوز الاخرون واصلحوا الخطأ من باب انهم من بيت اصول ومعندناش بنت ترفع صوتها على جوزها واكسر لها ضلع يطلع اتنين وكسرها وملكش دعوة واحنا نكمل عليها والكلام الكبير اووووووووى ده وفى الاخر يطلع معظم الاباء حنفى "الا ما رحم ربى" ويكون شعارهم بعد اول تكشيرة من الام اللى وزنها ربع طن وهوا لا حول له ولا قوة ووزنه مش مكمل 60 كيلو بعد لما طلع على المعاش ان يقول تنزل المرادى
المهم وحتى لا يتفلت منا رابط الموضوع الاصلى وبعد اضفاء روح الفكاهة على ما ذكر فلا يمكن لاحد ان يعتب على الزوج بانه تعجل او استسهل فى فترة الخطوبة وانما حاله كحال الكثير من الرجال لا يستطيع معرفة ما فى الهدية الملفوفة بالحرير الا بعد فتحها وهو ونصيبه اما جوهرة وهذا ما يتمناه كلنا واما والعياذ بالله قنبلة موقوته لا يمكن التكهن بها قبل الفتح نعوذ بالله من ذلك
3- الاخوة الذين يقولون بان الترك والاهمال خير وسيلة لايقاظ الغافل من غفلته واعادته الى الحق لم يراعوا نفسية الانسانة واهلها وحالها فهناك من يزيده الترك عنادا وعن تجربة مشابهة تم الترك لمدة سنة ونصف والامر معلق ولا يزيد الوقت الطرفين الا عنادا حتى وصلت لدرجة ان الزوجة وضعت مولودا ولم تخبر زوجها وسمته بنفسها وعلم الاب مصادفة انه رزق بطفلة من اخرين غرباء وكاد الامر يصل للطلاق بعد الدخول فى قضايا بدعوى النفقة على الصغار والزوجة ومصاريف الولادة وعلاج الصغار وما شابه ذلك والاب ليس له حيلة الا دعوى طاعة لا تسمن ولا تغنى من جوع ودعوى رؤية ايضا ليست بشىء فى عالم الاجرام اقصد المحاكم وحسبنا الله ونعم الوكيل فيمن افسد النساء واضاع حقوق الرجال
ولذلك يجب عند اسداء النصح للرجل ان يعلم جيدا حال الكرأة واهلها هل هم من الذين يجدى معهم الترك والاهمال ام ان ذلك لن يزيدهم الا عنادا وكبرا"من با بنتى ميتعملش فيها كده ومش هترجع الا لما ييجى على وشه زى ال....." اسف للكلمة ولكن هذا حال كثير من الاباء الذين كسرتهم نساؤهم فلم يجدوا الا ان يذلوا اولاد الناس
4 الاخوة الذين يقولون بان الطلاق هو الحل اردد لهم مقولة اخو صديقى وهو محامى صغنن ان الازواج لو بينهم مصانع الحديد فما هم فيه خير لهم مما بعد الطلاق لو هناك اولاد فالعلاقة لن تنتهى ولكن بدلا من ان يتخللها جزء رحمة سوف تستمر ولكن بلون واحد فقط وهو الاسود والقانون المصرى لن تجد ما هو اقذر ولا اسوء منه فى حق الرجال فللمرأة الحاضنة نفقة حضانة ومنزل حضانة مؤسس ونفقة صغير تبعا ليسار الزوج واى مصاريف اخرى خلاف المأكل والمشرب والملبس يعنى مدارس وعلاج ودروس وباص و........... الخ وطبعا قضية سنوية لزيادة النفقة واستعلام عن مرتب وقضية اخرى للمصاريف الجانبية واديها فضايح فى الشغل وحكم يتنفذ فى الشغل وقرف فى تنفيذ حكم الرؤية يعنى مره اه وعشره لأ لان الولد تعبان او عنده امتحانات او كان فى رحلة او المطره بتمطر او اضطراب سواقين وهكذا ويوم لما ييجى ييجى مضروب ميت جزمة واخر قلة ادب وكأنك بتشحت منه وهو يعينى معذور لان ماما قالت وكلام ماما يصيؤر يا حسنين -ليه يا بوى علشان احنا فى بلد ..... وده غير حبس لو امتنعت عن النفقة وبلاوى سودا
فلازم يتعمل حساب كل ده قبل قرار الطلاق لانه بداية المصايب وليس نهاية القرف وحتى لو اتعمل محضر اتفاق قبل الطلاق كل الكلام ده بيتلحس وبيرجع لرأى القاضى ورؤيته لان الكثير من المحامين بيقولوا ان الغلبانة اضظرت ترضى بالقليل علشان تنال حريتها من هذا الوغد الذى ليس بأدمى وطبعا ده ميرضيش حد وانت عندك اولاد وعارف المصاريف والحكاية والرواية ودمعتين يقوم القاضى يعيش ويحكم زى ما يشوف وارزع راسك فى الحيط يا كبير لانك غلطن انك وافقت تستر واحده وتعفها فى ظل قانون منيل بستين نيلة
5-كثير من الاهل مدلعين بناتهم ولكن نفسهم ان البنت مطولش عندهم علشان الوجاهة الاجتماعية ومستنيين الراجل ييجى برده علشان نفس البنت متتكسرش والراجل يتجرأ عليها فدول لو رحت لوحدك هتلاقى كلام ينرفز وهتطر ترد وهتطلع غلطان فلازم يكون معاك حدد لبق يشتت تفكيرهم ويمنع اجتماعهم عليك والنهاية معروفة ان الجميع بعد لما ام البنت تبعبع شوية والبنت تنزل دمعتين والوسيط يقول انا مش شايف ايه المشكله كله حاجات بسيطه وبتحصل فى اول الجواز " وطبعا اول الجواز ده ممكن يستمر عشر سنين او يزيد ونفس الكلمة تتقال" والزوج طبعا مسبهل من اللى بيحصل واللى بيتقال وبيدور على كلمة يقولها معندوش غير حزبى الله ونعم الوكيل وكفى به نصيرا يقوم يقول الجميع يلا يا ولاد بلاش لعب عيال خد مراتك وروح ومتزعلهاش تانى يحسن مش هنرجعاهلك والزوج المسكينيبلع الشتمة بالعافية ولشان حاله يا ولا ستين فى سبعين هوا انا زعلتها اولا علشان مزعلهاش ثانيا ويخلص الموضوع ولكن صلح الديب على الغنم ويكون الزوج مشغلل العداد هيقدر يحافظ على عقد السلام كام يوم
اكيد الكل دلوقتى بيدعى عليا وبيقول سودتها فى وشنا وبرده لم تعطى حل اقول وبالله التوفيق
للاسف لو طلق الرجل زوجته فى حالة كهذه وتحمل التبعات وصبر واحتسب وتزوج باخرى فسيجدامرا اخر ينغص عليه حياته وقد يستسلم قبل اتمام البناء ويطلق بعد العقد تفاديا لاعادة القصة ويقدم على اخرى ولكن سيجد ايضا ما ينغص حياته لانها دنيا ولان المرأة خلقت من ضلع اعوج لن يستقم ولان الرجل ليس بمعصوم من الخطأ ولكننا لا نلرى اخطائنا وقد نظنها لمم ولكنها عند النساء من الكبائر فمجرد غض البصر عن امرأة جميلة جدا امام زوجتك اهانة ليها لانها تفهم انها عجبتك وانت تجاهد من اجل غض بصرك بينما هى لم تسمو لمستوى جمال تلك المرأة ومهما بذل الرجل لن ترض المرأة لانهن يكفرن العشير كما قال الصادق المصدوق
وختاما اوص اخى ان يصم غدا ويقوم الليلة داعيا الله ان يفرج همه وهمى وهم كل المسلمين وان يأخذ معه احد اقاربه العقلاء وزوج اختها فقط وليس اختها ويذهب بهدف واحد لم شمل بيت واخساء الشيطان وانا على يقين ان الله سيوفقه بإذن الله ولو ارادوا فتح اى موضوع لا يتكلم وعلى قريبه ان يخمد نار القيل والقال بقوله لا نريد ان نناقش تفاصيل فبالبيوت اسرار واحنا جايين نلم الشمل مش نألب الاوجاع وكل سنه وانتم طيبين وايام مفترجه وحاجت من كده والله الموفق وهو المستعان وعليه التكلان
واسف للاطاله ولكن الموضوع ذو شجون

المشاركة الأصلية كتبت بواسطة marimmarum

السلام عليكم ورحمة الله وبركاتة
انا قراءت جميع المشاركات امبارح وكانت اول مرة اشوف الموضوع من اصله وحبيت اشارك فيه دلوقتي لان في حاجات كتير حبيت اوضحها من وجهة نظري انا كزوج واعذروني لو كنت دخلت متاخر ولكن مكنتش متوقع ان الموضوع حيلاقي اهتمامكم ومشاراكتكم الجدية للموضوع وبناء علية حبيت ادخل اعلق علي خلاصة الكلام السابق
اولا :
العبد لله ملتزم دينيا يعني بتقي الله في معاملاتي كلها لاني لي مرجعية وهي قال الله وقال الرسول
حبيت كمان اقولكم ان اولا زوجتي فيها صفات كويسة لاني محبش اكون من الناس اللي قال فيهم رسولنا الكريم اذا خاصم فجر
قبل ما نتجوز في فترة الخطوبة اتكلمت معاها في كل شي شاغل بالي من تساؤلات وكانت كل اجابتها مقنعة ليا تماما لانها كلها كانت اجابات سليمة فانا درستها كويس ومكنتش لاقي حاجة اقف عندها .
حديكوا لحضراتكم مثال :
سالتها ان لو كان شغلها حياثر علي البيت حتعمل ايه ?
قالت لي ولا يهمك حسيب الشغل علشانك لو كنت مضايق منه
قلت لها برضو لو حدث فين خلافات لا قدر الله ممكن تسيبي بيتك وتروحلي لبيت والدك?
قالت لي لا طبعا مسيبش البيت خالص انا حفضل علي قلبك علي طول وتضحك وتقول انا اختي عمرها ما سابت بيت جوزها , فقلت في نفسي ما شاء الله ونعم العقل
وغيرة وغيرة من المناقشات اللي تخليني افهمها وتفهمني وكانت النتيجة ايجابية دائما
قلت ليها برضو اية رايك ان لو حدث بينا خلاف ومعرفناش نحلة نرجع لدستورنا اللي هو كتاب ربنا واللي يحكم بية الدين بينا يكون هو الحل , وهي كانت موافقاني جدا وتقولي تمام وكل حاجة مية مية
بعد الجواز لقيت في تاثير جامد في البيت وانا حسيت ان غصب عنها لانها بعد شغلها بتكون تعبت ومش قادرة انها تعمل حاجة في البيت ولو عملت بتبقي صعبانة عليا واحيانا اقوم اساعدها في شغل البيت واحيانا لما القيها جاية تعبانة اقولها مش مهم اكل نبقي ناكل اي حاجة لانها بتصعب عليا فعلا وانا اجي علي نفسي واقول اية يعني الاكل مش مشكلة وخاصة ان زوجتي بتتعب بسرعة ومجهودها قليل .
بداءت اقترح عليها انها تاخد اجازة من الشغل بدون مرتب واسمها معاها وظيفة وخلاص ترجع لها وقت ما تحب وتفضي دلوقتي لبيتها شوية , اعترضت وقالت لا مش حقدر اقعد انا اتعودت علي الشغل
فكرتها بكلامها اللي كانت بتقولة ليا ايام الخطوبة فقالت ليا انا غيرت رأي
وبعد ما الوم عليها القيها عن تقصرها القيها تنشط يومين وتبقي تمام وبعدين ترجع تاني
وبعد كدا حصل مشاكل بخصوص الشغل والموضوع طبعا واصل اول باول باهلها واتكلموا معايا في الموضوع دة وسمعتلي كلمتين منهم وكلموها برضو علشان تشد حيلها شوية وانا جيت علي نفسي شوية وكانوا بيقولولي كل البنات في الاؤل كدا وبعد كدا وبعد الخلفة بتكون احسن وكدا كدا هيا حتقعد من شغلها وتاخد اجازة بعد الولادة علشان البيبي
انا بعد ما روحت لاهلها وحسيت انهم في صفها جدا وبيعوموا الامور واستغربت ان والدتها عتبيتني وكاني غلطان وتقولي مش من الدين انك تخاصمها وعامل متدين, وتقولي لو كنت معترض علي الشغل كنت اتكلم فية معانا مش معاها احنا اللي نقرر لان دة كلام كبار فقلت ليهم انا مش متجوز طفلة علشان في كل حاجة اتكلم مع اهلها .
المهم الحاجة الغريبة ان والدتهاقبل الجواز كانت معايا في كل حاجة وكانت ضد بنتها ودايما بقول لزوجتي ان والدتك ست اصيلة لانها مبتحبش تزعل الراجل ابدا .
المهم عديت الموضوع وقررت اني استحالة حفتح اي مشكلة مع اهلها تاني والمشاكل بينا وبس وهي كانت نازلة وحاسة بنشوة الانتصار جدااااا
المشكلة الحالية ان احنا كنا زعلنين مع بعض في موضوع هايف ومتخصمين فلقيتها في نهاية الاسبوع بعد الشغل بتقولي انا حروح ابات عند ماما وفوت عليا بكرة بعد ما تخلص شغلك ,فروحت قلتلها انتي اللي بتقرري امتي تباتي برة وامتي متبتيش وملكيش زوج تستاذنية ولا انا سواق الهانم
واذ بيها اعديت تعيط ومنهارة وراحت قالت لولدتها وولدتها زعلت وكلمت والدتي بعصبية جدا. مكنش مثلا ضربتها بسكينة وقالت لها انها حتقد معانا يومين, ومن ساعتها وهي هناك
كلمتها في انها ترجع لبيتها وهي تقولي تيجي تتكلم مع اهلي لان ليا اهل تتكلم معاهم
قلتلها مش حتكلم مع حد غير معاكي وبس والمشكلة دلوقتي اني عايز اروح اخذها من تحت البيت وهيا واهلها عيزيني اطلع واتكلم معاهم في المشكلة ويحددوا معايا شوية نقاط واخذها وانا حلفت اني مش رايح مهما حصل وذي ما طلعت لوحدها تنزل وانا حوصلها للبيت ونتكلم
وهيا رافضة مهما اقولها يمين شمال يهديكي يرضيكي مفيش فايدة قولتليها طيب تعالي نروح دار الافتاء واللي يحكموة بية نعملة تقولي محكيش حاجة لحد غريب.
كلمت جوز اختها وكان مقدر موقفي جدا وحاول يكلمهم كتير مفيش فايدة لازم اطلع برضو اختها كلمتني وقالت لو مجتش واتكلمنا معاك حنروح بيتها وناخد هدومها لحد ما انت تيجي برضو ومتقلقش حتابع حملها مع احسن دكتور وحتولد في احسن مستشفي .
قلتلها انا ميتلويش دراعي ومش بتهدد اعملوا اللي انتوا عيزينو.
فانا عملت اللي عليا وحاولت الاصلاح ومفيش فايدة وطلاق انا مش حطلق علشان قوانينا الجميلة.
وقلت ليهم انتوا كدة بتخربوا البيت .
اهلي انا بقي عمرهم ما عتبوها في اي حاجة ودايما بيستقبلوها احسن استقبال مهما كان بينا مشاكل علشان دايما يقولولي لو كلمنها في حاجة حتشيل مننا واحنا منحبش كدا وعلشان كدا تقولي ماماتك دي ست رائعة
دلوقتي انا مش حقدر اخذ اي خطوة تاني نهائي لان هما فاكرين ان لما راحو واخدوا هدومها يبقي انا حنخ وحبدا اخلي حد يتكلم من طرفي ويحايل فيهم وانا اقسمت اني خطوة واحدة زيادة عن اللي عملتو مش حعمل
وماشي بمبدا لما تقطع صباعك احسن ما تقطع ايدك ولما تقطع ايدك احسن ما تقطع دراعك كلة وهكذا
يعني لازم كل ما اتدارك حياتي معاها بدري احسن ما اتداركها بعد ما يكون عندي 3 عيال
وقدر الله وما شاء فعل ويعلم الله اني مكنتش مقصر معاها وكانت عايشة احسن عيشةوبتاكل احسن اكل وعمري ما عملت ميزانية لاي حاجة
وبقول ولا تجعل يدك مغلولة الي عنقك ولا تبسطها كل البسط
يعني عايش كويس جدا جدا وعامل حساب لبكرة برضو
نسيت اقول ليكو من ضمن الزعل انها كانت عايزة تعرف حساباتي البنكية كام وبتعتبرها اني لو معرفتهاش يبقي انا مخونها
اسف جدا جدا للاطالة عليكما بس حبيت اشرح ليكوا وجهة نظر كاملة للموضوع.

اخى الكريم حاول تقرأ مشاركتى لعل الله ان يفرج همك