السلام عليكم ورحمة الله وبركاته


ان شاء الله مسافر السعوديه بعقد عمل تبع مجموعة الفؤاد للمقاولات "فايز جميل زقزوق وشركاه "

مقر الشركه بمكه المكرمه بس شغلى حيكون محاسب موقع ولسه مش عارف الموقع بتاعهم فين بالظبط
طبعا حتوزع بعد لما اوصلهم هناك

دى او تجربه ليا ان شاء الله فى السفر بره مصر ومحتاج نصايح اخواتى فى المنتدى اللى سافروا فى شغل بره قبل كده ايه التجهيزات اللى المفروض اجهزها قبل مااسافر وايه اللى المفروض اخده معايا

ايه الغالى هناك والمفروض اشتريه من هنا
وايه الرخيص هناك وبلاش اخده معايا من هنا

اللاب توب بتاعى بفكر اسيبه لاختى واشترى واحد من هناك
المشكله انى حاسافر منفض خالص من الفلوس ومش حابقى حمل اشترى حاجه من هناك فى اول شهرين على الاقل وده اللى كان مخلينى بفكر اخده معايا
ياترى ممكن الاقى الحاجات دية رخيصه هناك سواء جديد او مستعمل واشترى واحد مستعمل بسعر رخيص

الموبايل بتاعى سامسونج جالاكسى فيت حاخده معايا طبعا علشان عليه كمان كل التليفونات فهل ممكن لم ارجع ان شاء الله الاقيهم بيجمركونى عليه

خطوط الموبايل بتاعتى فودافون وموبينيل حاوقفها من الشركه ولا خلاص حاتبقى راحت عليا ولا ايه
فيه اجراءات او اوراق المفروض اخلصها من هنا قبل ماسافر
انا عملت توكيل عام لوالدى علشان لو فيه حاجه محتاجه تخلص من مصر يعملها

شنطة السفر مش عارف اجيب ايه ومقاس كام والوزن المتاح ليا ايه
انا بشوف شنط نروللى 4 مقاسات اعتقد ان مقاس 3 اللى هو قبل الاخير مناسب ولا رايكم ايه

اخد هدوم كتير معايا من هنا ولا الهدوم هناك رخيصه وابقى اشترى من هناك
اخد شتوى ولا مش حاحتاجه والجو هناك حر

معلشى هى استفسارات كتير بس قلة الخبره مخليانى محتار

اخيرا ياريت كل واحد دخل الموضوع يدعيلى ان استريح هناك والوضع يكون كويس وان ربنا يقوينى على الغربه لانى بتقطع من جوايا من دلوقتى كل لما افتكر انى حاسيب ابويا واختى