الموضوع: مسافر السعوديه باذن الله ومحتاج نصائحكم

المشاركة الأصلية كتبت بواسطة minicooper20

العقد بيتاعك كام سنه وهل فيه زياده سنويه و هل المبيت و الاكل عليكم لا عليهم

نظام عقود السعوديه دلوقتى سنتين وبعدين يتجدد
يعنى خلص السنتين وبعدين اتفق على عقد جديد خالص اعتقد مفيش حاجه اسمها زياده سنويه

المشاركة الأصلية كتبت بواسطة walidzakzok

لو طلعت على مبلغ قليل انسى انك تزيد ...السعودية نظام الكفالة فيها بهدلة

هو اللى مطمنى شويه انها شركه كبيره مش مؤسسه صغيره ملك لفرد
على حسب بحثى فى النت هما مجموعة مستثمرين ومجلس اداره يعنى ممكن صاحب الشركه مايعرفنيش ولا ليه علاقه بيا

المشاركة الأصلية كتبت بواسطة m.moustafa

باشا لو مفهاش مشاكل يا ريت تقولنا انت طالع على مبلغ قد ايه وايه المميزات اللي هيدوهالك يعني هل مرتب اساسي بس وبعد كده بدل سكن وانتقال ولا هما هيوفرولك عربية وسكن.

كمان التامين الطبي اخباره ايه، واخيرا انا عايش في جدة هبعتلك تليفوني على الخاص كلمني لو عندك اي استفسار ممكن اساعدك وكمان لما تيجي كلمني عشان لو في حاجة نظبطهالك ان شاء الله.

ابدا مفيش مشاكل
العقد ب 2500 ريال
كل حاجه عليهم ماعدا اكلى وشربى
يعنى تامين طبى انتقالات اقامه سكن

سؤال بقى على موضوع التامين الطبى ده لانى مش فاهمه هو فايدة ايه بالظبط وامتى استخدمه
يعنى اى شوية برد ممكن استخدم التامين الطبى ولا هو حاجه كده ضد العجز او اصابة العمل لاقدر الله

على فكره التاشيره محاسب ودى دوخت عليها السبع دوخات من 3 سنين ولاقيتها مره من سنه ونص وبعد لما خلصت الاجراءات كلها الشغل رفض يدينى اجازه
المره دية الحمد لله لاقيتها تانى وقدرت اخد اجازه من الشغل من شهرين من قبل لما الاقى العقد لدرجة انهم دلوقتى بيستعجلونى علشان اقوم بالاجازه او الغيها وربنا يستر ناوى لو اطمنت ان كل حاجه ماشيه صح حامضى الاجازه ومش مشكله لو قعدت فى البيت اسبوع او اتنين لغاية لما اخد التاشيره

طبعا لاقيت بعض العروض افضل من كده لكن تاشيره عامل ودى ماتنفعشى معايا اساسا لانى موظف ومش حاقدر اغير المهنه فى الجواز

ياريت تبعتلى نمرتك علشان لو حبيت استفسر منك على حاجه وانا هناك ان شاء الله وخصوصا لو ربنا سهل وقعدت فى مكه حنكون قريبين من بعض جدا

السلام عليكم
اولا ربنا يوفقك فى حياتك العمليه فى السعوديه ويارب تبقى فاتحه خير عليك وتحقق كل اللى تتمناة
هاحاول افيدك على قد ماقدر من خبرتى المتواضعه فى دبى الامارات سابقا ودلوقتى من اقامتى فى قطر

احسن حاجه فى السفر ده لو انك ان شاء الله هتبقى عايش فى مكه وده فعلا حلم لناس كتير وانا اولهم هتقدر تعمل عمره كل فتره وهتبقى قريبمن المسجد الحرام وهتقدر تحج ونفسيتك هتبقى على طول مرتاحه يكفى انك فى اطهر مكان على وجه الارض

اولا كويس انك عملت توكيل لوالدك لكافه المعاملات هيريحك كتير

بالنسبة لتشترى من مصر وايه من هناك:
اولا الهدوم معظم السنه هتبقى لابس صيفى حاول تخلى اللبس الاكتر صيفى بس ده مايمنعش انك مسافر على ايام البرد يعنى خد معاك لبس بيت مثلا بناطيل وتى شيرتات بكم وممكن سويت شيرت او بلوفر مش تقيل اوى لايام البرد بليل بس يعنى لبسك ينحصر اغلب اوقات السنه على التى شيرتات وقمصان نص كم او كم و بناطيل جينز او كلاسيك للبيت برمودا وشورتات وكده اللبس فى السعوديه كويس واسعاره معقوله يعنى انت خد معاك بس مش كتير اوى او لو كنت ناوى تجيب حاجه ماتجيبهاش من عندك ممكن من السعوديه فيه عندك مجمعات ومولات كتير جدا اسعارها معقوله وتشكيلات كتير وصناعتها كويسه هندى او صينى زى
سلسله سنتر بوينت ودى سلسله محلات ومولات للملابس اصلا يمتلكها هنود وموجوده فى كل الخليج وبعض دول شرق اسيا فيها محلات :1- ماكس وده فيه كل انواع الملابس من البيبى الى عنده يومين للحريمى والرجالى كلاسيك وكاجوال هدوم بيت وغيارات وكل اللى تتخيله واسعاره كويسه اوى
2- سبلاش : وده زى ماكس بالزبط بس يمكن اغلى شويه / 3- شومارت او شو اكسبريس ده متخصص بالاحزية كوتشيات وجزم واسعاره كويسه جدا
كل التعلقات الصغيره هناك احسن وارخص من مصر متشيلش نفسك على الفاضى برفانات كريمات شامبوهات مكن حلاقه كل حاجه هتلاقيها هناك

ممكن تخلى اللاب توب معاك السنه دى وتبقى تسيبه فى مصر لما ترجع اول اجازه لانك بتقول انك مش عايز اول فتره تصرف كتير ممكن تبقى تجيبلاب تانى من السعوديه قدام شويه لما ربنا يكرمك والموبايل الجالاكسى عادى مفيهوش مشاكل .
طبعا فيه عندك تامين صحى بس الادويه غاليه جدا هناك عشان كده حاول تاخد معاك شويه ادويه الى بيكون شائع استخدامها زى مسكنات للبرد او الانفلونزا مثلا داى اند نايت او انتينال بتاع النزلات المعويه والام المعدة فوار املاح او هضم ممكن قطرات للعين هنا البنادول بتاع الصداع احسن من الى فى مصر
العسل النحل الابيض فعلا هناك مش حلو خالص وتحس انه مغشوش ممكن تاخد معاك منه لو متعود تستخدمه

بالنسبه لخطوط الموبايل المصرى ملهاش لازمه لو مش عايزهم يتوقفوا اديهم لاى حد يفضل مشغلهم كل فتره يعمل مكالمه منهم مثلا انما ملهمش لازمه هناك
الشنطه انت ليك وزن لو على مصر للطيران تقريبا 40 كجم تحت فى العفش و7 كجم فوق فى الطياره
لو انت لسه مطلوب للتجنيد يعنى كنت قضيت فتره تجنيد او اخدت تاجيل ومعدتش 30 سنه لازم تعمل تصريح سفر من من منطقه التجنيد الى انت تابع لها وبيتعمل قبل السفر على طول بيومين تلاته بالفيزا على فكره ماتقدرش تسافر من غيره او انت مازلت مطلوب للتجنيد

فيه حاجه اسمها تصريح عمل بيتعمل فى مكتب تصاريح العمل لدى الهيئات الاجنبية تبع وزاره الداخليه السنه ب 100 جنيه وده غاليا بنسبة 70 % مش بيطلبه منك فى المطار بس لو طلبه منك ومش معاك ممكن يرخم عليك ويقدر يمنعك من السفر حاول تعمله وتبقى فى التمام
المهم حاول تحدد اهدافك من السفر ده وربنا يكرمك ان شاء الله وتحقق الى تتمناه