الموضوع: كيف تفحص سيارة تمبرا عند الشراء

هقول برضو بعض الحاجات البسيطه الي ممكن تحدد بيها حاله العربيه او حاله بعض الاجزاء فيها
- شغل الموتور و لف الدركسيون شمال للاخر و يمين للاخر ( و انت واقف) و شوف الباور تقيل و لا لأ لو تقيل يبقى ترمبه الباور عايزه تتغير اما لو خفيف و فيه زنه يبقى الترمبه بتبوظ بس لسه في بدايتها لو خفيف و مفيش اي صوت يبقى كده الترمبه تمام
- بص على الاسكترا بتاعت الباور لو مرشحه زيت تبقى بايظه برضو
(النقطتين السابقتين في حاله ا العربية فيها باور)
-لما ترفع العربيه لازم حد يبصلك على المقصات بارات الاسكترا و الاسكترا لان ممكن يكون فيها بوش
-اطلع بالعربيه و شوف سحبها عامل ايه و صوت الموتور عامل ايه فيه خشونه و لا ناعم
-المساعدين تعالى عند كل مساعد و اضغط على العربية للاسفل وعلى اد ما تقدر و بعدين سيب شو العربيه هتعد تتمرجح و لا لأ و طبعا لو اتمرجحت عند اي مساعد يبقى خفيف شويه
- الموتور ميكونش فيه ترشيح زيت عند الجوانات و برضو ميكونش فيه ترشيح زيت فتيس
-بص على فرش العربيه كليبسات فرش الابواب راكب كويس و لا مخلع التابلوه عامل ايه و فرش الكراسي خصوصا لو الفابريكه بتاع العربيه و فرش السقف
--العربيه من الخارج بص على الفوانيس و الصاج بصفه عامه و الاكصدامات
-لو فيه فتحه سقف بص على الكاوتش اللي حواليها و اتأكد انها شغاله
-بص على كاوتش الابواب كلها متقطع و متبهدل و لا كويس و الابواب في الفتح و القفل بتترزع و لا لأ
-شغل التكييف لو شغال و شوف تبريده عامل ايه
-لو عداد ديجيتال اتأكد ان كل حاجه فيه شغاله

طبعا الحاجات دي مش شرط كلها تبقى 100% عشان العربيه تكون حالتها نضيفه
طبعا هتتنازل عن بعض الحاجات فيهم و كل عربيه و حالتها كل ما كانت الحاجات دي مفيهاش مشاكل كل ما كانت العربيه احسن
لكن لو معظم الحاجات دي فيها مشاكل يبقى حاول تشوف عربيه افضل