الموضوع: عيب الصناعة في السيارة تريوس نصيحة بعدم الشراء

اولا اسمحو لي ان اقص عليكم القصة المخزية التي عشتها مع توكيل دايهاتسو
و اسمحو لي ان اكتبها لكم كما حدثت بالتفاصيل البسيطة التي اقسم بالله انها حقيقية كي يعرف اصحاب هذا التوكيل انه لن يضيع حق ورائه مطالب
و اعلم ان الله لن يضيع حقي بأذن الله

البداية:-
السيارة ( تريوس vxr اعلي فئة موديل 2010 )
لم تتعدي 20 الف كم حتي الان
من فترة بدأت اسمع اصوات طقطقة من الخلف مع اي مطب خفيف حتي
اشتكيت في صيانة ال 15 الف و طمئنوني ان ده عادي مع الباب الخلفي و الكاوتش و القفل بتاع الاستبن اللي متركب علي الباب
ثم بدأ الصوت في ان يكون طرقعة و بعد فترة علي حوالي ال 17 الف اطلب الخط الساخن و احدد ميعاد لكي يحددو مصدر الصوت و يعالجوه
و بعد الذهاب يدخل السيارة ثم يخرجها و يقولو الموضوع تمام و تجرب علي السريع مع اي مطب يقول لك لا ده صوت من الحاجات اللي في الشنطة و بعدين يقول لا اصل ده الكوريك اللي في الشنطة
المهم مع صيانة ال 20 الف كنت زهقت كل حد يركب معي يقول لي ايه الصوت ده
فذهبت لهم و قلت لهم بأدب الموضوع زاد اوي و الصوت بسمعه بنفسي و لن اخذ السيارة الا بعد ان يعالج
خرجو معي للتجربة و قال لي مهندس الورشة اااااااااه عرفت منين طيب منين يا بشمهندس ( لا معلش مهندس الاستقبال يقول لك علشان دي الرولز المتبعة فأحترمت النظام و انتظرت حتي يخبرني مهندس الاستقبال )
مهندس الاستقبال اخر النهار بأدبه الجم يقول احنا لم نتوصل للعيب جيدا و نطلب ان تتركها لنا لاننا سوف نستدعي التيكنيكل سبورت بتاع الشركة ( ليه يا هندسة هو الموضوع كبير اوي كده ) لا لا دي حاجة بسيطة
اعود لهم بعد كام يوم بعد ان حددنا ميعاد يوافق وجود الخبير اللي استدعوه في ابو رواش للنظر و تحديد الحكاية خدوها طول اليوم و بعدين قالو لي احنا محتاجين انها تظل معانا 48 ساعة
فقلت له انا عاوز ابيع السيارة ( خدوها انتم و ادفع الفرق و ادوني واحدة زيرو )
فقال لي اصل انا مش اختصاصي الحكاية دي و بعدين انتظر لما الصوت ده يروح و بعدين اعرضها علشان تبقي بدون عيب فقلت له كلامك صح
و قال لي اتصل بخدمة العملاء فيه عندنا نظام الاستبدال و تدفع الفرق فأتصلت بيهم وقتها فحددوا لي ميعاد فعلا عندي في المعادي بفرع تبع الوكيل و قلت لهم ان الميعاد المناسب لي في الاسبوع التالي حتي يكونو انتهو من تظبيط الصوت ده
و تركتها لمدة 3 ايام في التوكيل بأبو رواش و اتصل بي المهندس و اخبرني بأن الموضوع بسيط
خير يا هندسة فيه ايه بقي
قال لي انهم يحتاجون ان يعيدو تبنيط الرفرف الخلفي شمال

يا نهار ابيض
تبنيط ايه يا هندسة دي زيرو
قال لي اصل البنط فاتحة و محتاجين نعيد تبنيطها و هما يا دوب حوال 12 الي 14 بنطة بس
قلت له انت فاهم يعني ايه عربية تتلحم في مصر؟
يعني تفقد ربع قيمتها السوقية
فقال لي دي هتبقي بنط فابريكة و احنا كوكيل بنستخدم نفس الماكينة بتاعة اللحام و لا تقلق و دي بنط داخلية يعني لن تري و الكلام ده فقلت له انا لن اخدع احد علشان هيا داخلية او خارجية انتو ختخدوها مني و انتو بقي اللي تبقو مسئولين
المهم قال لي ده عيب يجب اصلاحه و الافضل انها تتعالج علشان الاحتكاك بيحدث بين الصاج و بعضه و لو لم يتبنط سيفتح اكثر
فقلت له علي ضمانكم و انا سوف اعرضها علي شركتكم و انتو بقي اتكلمو وقتها مع اللي هيقيمها و اللي حدد لي ميعاد التقييم فوعدني بذلك
المهم تاني يوم اتصل بي و اخبرني بأن البنط اتعملت و العربية تمام
فقلت له طيب خير بس انا ايش ضمني انها مش فاتحة في الرفرف اليمين ايضا و لا الشاسية و لا الرفارف الامامية و قلت له انا بصراحة اتغميت من هذه السيارة و مش هرتاح الا لما يأخذوها
فقال لي بس بعد ما خلصت البنط اكتشفو انها اثرت علي دهان الرفرف في جزء صغير جدا
و تحتاج للدهان حتي لا يكون هناك لونين
فطبعا اتصدمت من الكلام و رفضت كل هذا العك و زعقت و قال لي انهم سيرشونها رش الفابريكة و لن يكتشف و لو هناك اي شئ علي ضمانتهم فقلت له انا معترض علي كل هذا فقال لي انهم مسئولين عنها و هي في الضمان و لا اقلق ابدا و حدد لي ميعاد الاستلام تاني يوم الساعة 4
المهم ذهبت تاني يوم للاستلام و كان يوم الخميس و لم يخرجوها الا بعد ان صلينا المغرب و مش عارف ده طبعا كان مقصود حتي لا اري فداحة الرش اللي عرفته بعد كده انه للرفرف كله و لجزء من الباب الخلفي و للاكصدام كله
المهم اكتشفنا انا و السائق اللي معايا ان فيه لحام اسفل السيارة واضح في الصاج فأخبروني ان احضرها يوم السبت لكي يدهنو اللحام و اعتذرو لانه ظاهر
و فعلا ذهب السبت لكي يدهنوه مادة و كان ايضا هناك شكوي اني وجدت الباب الخلفي به صوت هو الاخر
فأخبروني انها حاجة بسيطة و ظلو يعملو فيه حتي الساعة الرابعة عصرا
و كل ده اللي مصبرني عليهم ان ميعادي معاهم كان هيبقي يوم الاتنين لتقييم السيارة و قلت انهم كشركة اكيد فيه اتصال بين اداراتهم لكي يقولو الحقيقة و الكلام ده و ان السيارة بها عيب صناعة و انهم حاولو يعالجوه فدمرو الدهان و هو مسئوليتهم و كل هذه الاحلام اللي كنت معشم نفسي بها
المهم حضر الفني بتاع التقييم في معرضهم بالمعادي و ظل يفتش في السيارة و يقول لي ما شاء الله ايه الحلاوة دي انت محافظ عليها و اول ما وقف عند الرفرف شهق و قال لي انت كنت عامل حادثة و لا ايه فقلت له لا ده رش في التوكيل و المفروض فابريكة فضحك و قال لي فابريكة ايه ده رش لا يرشه سمكري تحت شريط القطار و ظل يظهر لي البلاوي اللي عيني كانت لا تراها لاني لم التفت اصلا للرفرف لانهم قالو جزء بسيط بسبب تطبيع اللحام من الداخل فأكتشفت ان الرفرف كله كان مفكوك من الحز اللي فوق الكاوتش مباشرة و واضح جدا طريقة الرش و ان الرش للرفرف كله و ليس لجزء بسيط و ان الباب ايضا مرشوش و ان الاكصدام مرشوش فطلبت امامه مهندس القسم بتاع الاستبدال و اخبرته ان هذا تم عندهم و طبعا لا حياة لمن تنادي و طلبت مهندس الاستقبال اللي بيقابلني بأدبه الجم كل مرة فقال لي انه غير مسئول عن قسم الاستبدال و اني اقدم شكوي
ففعلا تقدمت بشكوي علي الخط الساخن لهم و كنت اظن انهم يعرفون انهم بيبيعو سيارة ثمنها 150 الف جنية مش سيارة صيني ب 80 و لا ب 90 الف و ان لما العربية يكون فيها عيب صناعة مثل هذا و يكون فيه غشم لاصلاحه و التغلب عليه يجب ان يحافظو علي سمعتهم
الا اني اكتشفت للاسف الشديد اني كنت غلطان
و قال لي مهندس الاستقبال بعد يومين في اتصال منه ان الشكوي بتاعتي اتحركت فعلا و و صلت له هو عرف منها اني قلت ان الرش اللي تم به سوء مصنعية فطلب مني ان احضر لهم السيارة لكي يحسنو من هذا السوء و يضبطو الرش
فضحكت و قلت له ان هذه الجزئية هي الجزئية الرابعة في الشكوي اللي تقدمت بها لهم و ليست هي اساس الشكوي لان الشكوي كانت من ان السيارة بها عيب صناعة ثم انكم حاولتم تحلوه بطريقة تفقد السيارة جزء من قيمتها ثم تنكرتم لها حين قيمتوها و تركتوني اواجه مصيري و كأنكم لستم من وضعتوني في هذا الوضع ثم ترتب علي العيب و طريقة معالجتكم له سوء في الدهان لدرجة انه يكتشف بسرعة لهذه الدرجة و بناء عليه فأنا اطلب اولا البحث في بنود الشكوي كلها
و طبعا لم يستجيب احد حتي الان
طلبت مهندس التقييم اللي كان ارسل لي الفني و سألته بصفة شخصية عن السعر اللي ممكن يضعه للسيارة في حالة اصراري علي الاستبدال لاني مش بتاع مشاكل و نفسي اخلص و لو وضع سعر مناسب سوف ارضي به و كانت صدمتي قاسية
فأخبرني بأنه علشان خاطري و علشان هو متعاطف معي و انه حاسس اني صادق فيما اقول
هو سوف يضع امامي رقم علي مسئوليته ( كام يا هندسة يعني الله يكرمك)
فقال لي من 95 الي 100 الف جنية و الله علشان خاطرك انت بس
طبعا شكرته علي زوقه
و تاني يوم ذهبت لمعظم الشركات التي تستبدل السيارات كالمصرية و سمير ريان و غيرهم و قلت لهم الرفرف مرشوش و طبعا هما مكنوش محتاجين اني اقول لانه واضح
كام يا عم يشوفو الرفرف و لا يزيد عن ال 105 الف تعريفة
اتصلت بهم و اخبرتهم انهم تسببو في انخفاض قيمة السيارة بأكثر من 20 الف جنية علي اقل تقدير
و وجدت ايضا اني كنت غلبان اوي و حسن الظن اوي
و قدمت شكوي لجهاز حماية المستهلك اول امس
و ارسلت امس فاكس للشركة الام في اليابان
و ان شاء الله سوف اذهب لجامعة القاهرة و ادفع رسوم لكي يتم عمل تقرير و ارفع قضية ضد هذا التوكيل و ان شاء الله سوف اقوم بعمل دعاية لهم بما حدث في الصحافة
و بأذن الله لن اترك حقي
و بأذن الله سوف افقدهم كل يوم عميل جديد لانهم ليسو اهل للثقة
اسف جدا علي الاطالة عليكم

م.حاتم السباعي