عضو جديد فى عائلة الهوندا

**smsm_cato** · 20-12-2011 10:50 AM

السلام عليكم ورحمة الله وبركاتة الحمد لله ربنا رزقنى بعربية هوندا سيفيك 83 1500 cc اولا انا كان حلمى انى اقتنى هوندا سيفيك 92-93 لكن زى ما المثل بيقول على قد لحافك مد رجليك وانا لسه لحافى قصير بس الحمد لله وواحدة واحدة ان شاء الله هتيجى طبعا الهوندا معروفة وسمعتها سابقها لكن لم استطيع ان اعوض الوسع الشديد بتاع 132 الغالية اللى كانت معايا اصل اخوكم طولة 182 سم المهم نيجى بقى للاستشارة اللى طالبها من اخواتى فى عائلة الهوندا العربية الى حد ما كويسة ناقصها شوية شغل بسيط ترويق يعنى لكن هى والحمد لله فابريكا دواخلبس الرش اللى برة مش عاجبنى لونها نبيتى بس عجبنى الصاج بتاعها قوى جدا وان شاء الله هبقى اصورها بس فى حاجات عايز اسئل عليها فى زرار يمين الكونتاكت مش عارف بتاع ايه ثانيا الثلاجة بتاعة التكييف موجودة وناقص الكمبروسر والسربنتينة ياترى يكلفوا كام واجيبهم جديد ولا استيراد والعربية مرور حدائق القبة وانا من الشرقية والموتور اللى عليها لسه راكب من 4 شهور استيراد ولسه متثبتش على الرخصة ومعايا صور ورق الافراج الجمركى والفاتورة هل لما انقل ملكية هيبقى فى مشاكل فى مطابقة البصمة والفحص ولا عادى واخر حاجة فى بوش فى عصاية الفتيس اسيبة على كده ولا اروح لعفشجى يحلة ويشوفله حل معلش تقلت عليكم فى الاستفسارات بس علشان لسه جديد فى عالم الهوندا

**haythamkmal** · 20-12-2011 02:52 PM

يا باشا الف ميروك ربنا يباركلك فى العربية ويكفيك شرها، واهلا بيك هونداوى جديد
بالنسبة لاستفساراتك اكيد حد من اللى معاه الموديل ده هيفيدك ان شاء الله

**yalahwy2010** · 20-12-2011 04:16 PM

أهلا بيك فى الجروب
كان نفسى أقدر أفيدك........بس انا معايا lxi 2009
ان شاء الله تلاقى الرجالة هنا يقدروا يفيدوك

**tarekomar66** · 20-12-2011 07:23 PM

الف مبروك على العربيه وربنا يبارك لك فيها ويكفيك شرها واهلا وسهلا بيك عضو جديد فى العصابه الهونداويه
انا ممكن افيدك فى حكايه ورق الموتور انته لازم كل 15 يوم تقريبا تشوف الافراج الاصلى وصل مرور العربيه ولا لسه ولو ما وصلش لازم تجيب تاريخ ورقم الصادر من مرور الافراج ولما تتأكد ان الاصل وصل مرور العربيه لازم يتعمل لها فحص جديد علشان الموتور الجديد يتثبت ع الرخصه " الموضوع دا بياخد وقت كتير اذا ما جرتش وراه " وربنا يبارك لك فيها ان شاء الله

**lord_of_egypt22** · 20-12-2011 10:32 PM

اهلا بيك في احلي منتدي

**SAMEH_FOUAD** · 21-12-2011 09:09 AM

اولا الف مبروك وربنا يديك خيرها ويكفيك شرها

ثانيا : اهلا بيك معانا هونداوى جديد ونورت المنتدى

ثالثا بقى الاستفسارات :

1- قول اى رسمة على الزرار وانا اقولك دة بتاع اية

2- الكمبروسير والسربنتينة قليلين شوية ومش هتلاقيهم غير فى الحرفيين اوبورسعيد والاتنين فى حدود 1000 جنية او اقل شوية , طبعا استيراد

3- وانت بتنقل الملكية اديهم ورق المحرك الجديد هيتطابق البصمة بتاعتة بالورق وهتكمل اجراءاتك عادى , وزى ماقالك الاستاذ طارق لازم تسعى ورى الموضوع عشان تاخد الاصل

4- البوش الى موجود فى عصاية الفتيس لازم يتعمل وهو مش مكلف لان دة عيبة من القاعدة اللى بتتركب عليها العصاية وبتتغير عادى فى وقت قصير وورح لعصام او منير فى الحرفيين فى شغلك للعربية

**smsm_cato** · 21-12-2011 10:11 AM

الله يبارك فيكم وشكرا للترحاب السريع من اخواتى فى المنتدى اللى شرفونى بالرد على اسألتى وبالنسبة للاخ طارق عمر انت كده قلقتنى بالنسبة لحكاية الموتور دى وبالذات لما قولت بياخد وقت كتير ولازم اجرى وراة الراجل اللى اشتريت منه قاللى انه راكب من 4 شهور والورق زمانة وصل المرور سؤالى هنا من اللى بيودى الورق المرور صاحب العربية ولا التاجر اللى اشترى منه ولا مين بالظبط واسأل عليه ازاى انا من الشرقيه والمرور حدائق القبة فصعب ان اسال عليه باستمرار وانا معايا صورة الافراج الجمركى والفاتورة هل دول اللى بقدهم للمرور بتاعى ولا لازم اجيب الاصل معلش اصل دى اول مرة اشترى عربية موتورها مش مثبوت على الرخصة