الموضوع: صرخـــــــة مواطن مصري ؟؟ أرفعو الجمارك

طيب ما هي الجمارك هاتبقى صفر على الاوروبي , تفتكروا سعر الاوروبي هايرخص , مستحيل

حد يقول إن عربية متجمعة في مصر لا عليها جمارك و لا غيره تتباع بنفس سعر المستورد من بره , دي لازم تبقى بنص سعرها لو فيه عدل , بس المشكلة إن مفيش عدل فيه سرقة و إحتكار و إتفاقيات بين المحتكرين لضمان إستمرارية إحتكارهم للسوق و مص دمه لآخر قطره

محدش هايسمح بأن الجمارك تتلغي لأن فيه مصالح ناس كبيرة قوي ورا الموضوع ده

وأنا شخصيا أؤيد إنهم يخفضوها لنسبة معقولة زي دول العالم المتحضر , عشان إحنا كمان نتحضر شوية و منشوفش عربيات من الستينات و السبيعنات واقفة في الشارع و موقفة وراها حال البلد

واللهي ياشباب انا بحترم رأيكم بالكامل حتى وان كان يتعارض مع رأيي بس خلاني أفكر في أمور تانية مكنتش واخد بالي منها ...

زي مثلاً أن طول عمرنا متعودين أن حكوماتنا الي بتديه بالشمال بترجع تاخدو باليمين ..... هههههههههه ونبقى معملناش حاجه ، بس فعلاً زي ما قال أخويا وحبيبي بيقولك أهو فرق سعر العربية نعبيه بيه بانزين مدى الحياة ... بس هو فعلاً الموضوع شائك شوية ، لأن الموضوع مش رفع جمارك بس لازم نعمل خطة كاملة استراتيجية لحل أزمة المرور ومن ضمنها حل وفك وتكهين العربيات القديمة في الشوارع وان لا يزيد عمر العربية عن عشرين سنة ويستثنى من ذلك الاقاليم والمزارعيين شرط ان لا يقودوا سيارتهم داخل المدن الكبيرة نهائي .

منع ماركات السيارت الغير معمرة من دخول المدن الكبيرة كال 128 فيات والفيت بجميع انواعها ماعدا الجديدة والحنطور وعربيات الكارو ... ومنع عربيات الادا الروسي ، وكل عربية زاد عمرها عن عشرون سنة للدخول للمدن الكبيرة .

عمل خطة استراتيجية لتفريغ العاصمة من محتوحها وتشجيع الناس للذهاب للمدن الجديدة وأشراك مدن مصر المهمة كالسويس والاقصر والصعيد والاسكندرية وبور سعيد وحتى سيناء في مسئوليات القاهرة .

ويراعا عدم تجميع كل الاماكن الحيوية في مكان واحد زي ميدان التحرير ونقلهم لأطراف المدن بعيد عن الزحمة .

عمل خطة لتحديد النسل ، يعني ممكن الي يخلف عيل الحكومة تدفعلو مكافئة لو خلف عيل تاني يدفع عليه غرامة 3 أضعاف المكافئة ... وممكن نعمل كمان زي قصة فرعون وموسى عليه السلام لمن كان عامل نظام سنة خلفه وسنة منع يعني نخلف سنة وسنة لأ .

عمل شباكات لمترو الانفاق او المترو المعلق داخل المدن وبكده العربية الواحده هيحركها بس لمن يجي يتفسح .

أيضاً من الامور الهامة منخليش البلد كلها تروح الشغل في وقت واحد ويخرجو من الشغل في وقت واحد والشوارع تطربئ على دماغ الي فيها ده غلط ... يعني بالله عليكم لمن كل المصالح الحكومية والبنوك يروحو الشغل الساعه 8 الصبح وكلهم يخرجو الساعه 2 الظهر الله طيب مالازم تزحم الشوارع ما انتا كلهم مدخلهم في نفس الوقت ومخرجهم في نفس الوقت ، والكوميدية باه ان الخزنة بتقفل الساعه 12 يالله بسرعه علشان تلحق الخزنة ، خززززززززنة ايه يعني بالضبط بالضبط قدامك خمس ساعات فقط دي هتلحق توصل مشوارك ولا هتلحق توقف طبور ولا هتلحق تورد ولا هتلحق تلف على الموظفين تاخود امضه امضة ولا حتلحق يارجعو ورقك ولا هتلحق تروح تصور الورقة ولا هتلحق تجري تروح تجيب دمغة دي مسخرة ومهزلة وبهدلة .
وعلشان كده المواطنون والناس رايحين جيين على المصالح الحكومية ويزحمو الشوارع لأنو كل يوم بيطر يسيب شغلوو علشان يجري يخلص مصلحة حكومية بيوقراطية والروتين .

وترجع تقولي لا مش هنرفع الجمارك أصل الشوارع زحمه هههههههههه بالزمة دي مش مهزلة ... والله يكون في عون بتاع الاقاليم الي رايح جي على القاهرة علشان يخلص ياعيني ورقة لعيالو ولا مصلحة ليه ويعطل نفسو ويزحم شوارع القاهرة .

المهم ربط المصالح الحكومية بشبكة كومبيتارية بمعنى في كل مصلحة حكومية فيها كمبيوتر لكن بيستخدم أستخدام متخلف ... كانو مكنة طباعة فقط المفروض يكون بينات كل مواطن على الكمبيوتر وورقوا على الكمبيوتر مش يقولك روح هتلي ورقة من الكمبيوتر الي جمبي هههههه طيب مانتا قدامك كمبيوتر ما اطلع بيناتي بالرقم القومي ... والي يدحك بجد بجد جرب تطلع بطاقه ليك او تجددها يقولك روح هتلي شهادة ميلادك الله طب ما شهادت ميلادي على الكمبيوتر عندك ههههههههههههههههه

المهم علشان منطلعش عن الموضوع ان نعرف نخطط صح ونحسبها صح علشان نعيشها صح ... وبعدين احنا ممكن نعمل زي ما اقترح بعض الاعضاء المحترمين نرفع الجامرك دلوقتي مؤقتاً عن العربيات الي تحت ال 1600 سي سي مع محاسبة التوكيلات الي هتغلي او تمتنع ... واذا كانت الدولة عايشة على الاتاوات ... فضروري عباقرة مصر يعملو خطة كمان متكاملة لبناء مصانع الاهتمام بالسياحة الاهتمام بالزراعة المهم البحث عن موارد بجد حقيقة غير شقى وتعب وقوت المواطن البسيط الغلبان .

وياسيدي ده انا لو هدفع 70 الف في فيرنا ساعتها هركب كورولا ولا يارس ولا حتى نيو ألنترا والي معاه قدرة على 150 الف أهو يركب عربية بي أم دبلي ولا مرسيدس سي كلاس وحتى عربية كامري او همر وساعتها ممكن يقلبها غاز هههههههههههه أذا البنزين مديقو . ولا ايه رأيكم يا شباب

يا جماعة ما البلد طول عمرها بتاخد جمارك يعني كانوا صلحوا بيها الطرق و لا عملوا بيها حاجة عدلة و لا كان كل مسئول بيكبش شوية فلوس و يحطها في جيبة و خلاص دا إحنا لسه مخلصناش من قضايا الفساد و الفلوس اللي بالمليارات اللي مسروقة و متهربة بره, أية عايزين تزودولهم الفلوس كمان علشان يهربوها علي بره تاني ..

كمان ممكن نحل الزحمة بإننا نعمل زي بره و نشجع ال Car Pooling اللي هو إنك بدل ما إنت و صاحبك تاخدوا عربيتين تركبوا في عربية واحدة و بيتعملهم برة طرق مخصوص بتبقي فاضية بس لازم العربية يكون فيها 2 أو 3 علي حسب الطريق و لو مشيت فيها لوحدك بتاخد مخالفة

الحل عمره ما كان في الجمارك أنا لازم أصلح من جوا الأول زي اللي عنده مرض بيسببله ألم, يعالج المرض و يرتاح و لا يزود جرعة المسكن و المرض يفضل ينخر فيه لحد ما يموت .. هو حد قالهم يسيبوا البلد خرابه ما يصلحوا الطرق و يعملوا طرق جديدة نمشي فيها ماهم بياخدوا مننا فلوس قد كدة سواء في الضرائب أو في أي حاجة تانية, و كده كده العربيات بتزيد أهي و أهم بياخدوا جمارك حد شاف تزبيط طرق أو شاف أي تحسن في البلد و أنا مش واخد بالي