مبدأيا كدة انا هستعرض امكانيات ال m11 ونتوا تعملوا المقارنة مابينها وبين سيارات فئتها
اولا الصاج :
كعادة الحديث الصاج خفيف بس كويس مش وحش
ثانيا : الشكل الخارجى
شكل العربية كويس وجيد جدا , بس من الامام افضل من الخلف وتحسها متناسقة من الجنب
ثالثا : الصالون
الصراحة كل اللى اقدر اقولة خسارة دة يكون صالون عربية صينى ( الخامات ممتازة + الشكل تحفة + وسع الصالون جميل جدا + لمسة ناقل الحركة + شكل العدادات والاضاءة كلها جيملة جدا وتحس انك قاعد فى عربية تمنها معدى ال100 الف بكتير لدرجة ان كان معايا واحد صاحبى لما ركبها قالى دية تعملها كام 150 الف جنية قولتلة دية صينى وتمنها مابيعديش 80 الف جنية طبعا اتصدم
* العربية الدركسيون بتاعها جميل ووضعيتة ممتازة بس يعيبة خاماتة نشافة شوية بس جميل يعنى مازهقتش منة + الكراسى جميلة ومريحة بدرجة كويسة جدا
* الباور مش خفيف اوى يعنى مش زى الكورى
* العربية عزلها يوازى عزل الكورى بالظبط
* السيارة فيها كل حاجة مش ناقصها حاجة بصراحة من الداخل يعنى ماتقدرش تعترض على حاجة
* التقفيل كويس جدا ومافيش حاجة بتعمل باستثناء حاجات هبقى اقولها
* رؤية العربية كويس الى حد ما بس من الامام احسن بكتير من الخلف يعنى من الخلف كويسة بس افضل بكتير من الكورى
* المرايا عيبها تحس انها صغيرة شوية بس معقولة
* العربية صوت محركها داخل المقصورة بعد ارتفاع الاربى ام عن 2500 لفة
* صوت السماعات كويس مش وحش وتقريبا نفس درجة نقاء الكورى
رابعا : المحرك
المحرك هو نقطة الضعف فى العربية دية انا مش حاسس ابدا ان دة محرك بقوة 118 حصان تقريبا على مااتذكر لانة فعلا استجابتة ضعيفة مش قوية وخصوصا فى الطلعة ولازم تضغط عشان العربية تجرى
* المحرك هادىء وانت ماشى بالراحة لكن لما بتضغط جامد بتحس بصوتة
* فية عيب فى المحرك انك لما بتوصل لمثلا عدد لفات عالى يعنى 4000 لفة على السرعة الثانية او الاولى وتيجى مثلا هتفرمل تلاقى مؤشر لفات المحرك فضل ثابت شوية عند 3500 لفة وطبعا دة بيخلى صوت المحرك عالى وبعد كدة يبدأ ينزل تدريجيا ودة كان عيب فيها
خامسا : الفتيس
العربية اللى انا جربتها فتيس مانيوال , وبجد كان فتيس كويس فى المشى الطبيعى ودية ملاحظاتى علية
* الفتيس نقلاتة قصيرة شوية بخلاف النقلة الاولى بحس ان مشوارها كبير
* الفتيس عمل حركة غريبة وانا ماشى على السرعة الاولى حرقت روحت مفرمل جامد شوية لحد ماوقفت ودايس دبرياج عادى للاخر كدة النقلة عادى متثبتة جيت اطلع تانى لقيت العربية مافيش استجابة المؤشر بتاع عدد لفات المحرك بيعلى ومافيش حاجة بتتحرك بشوف ناقل الحركة لقيتة رجع لوضع المور ودة كان امر غريب جدا وانا واثق تماما انى ماحركتوش
* الدبرياج خفيف جدا ملبن سواء هو ولا دواسة البنزين
* العربية لو طلعت على الوضع رقم 2 وانت ماشى بالراحة هتكركر منك ولازم تسمع صوت تسقيف
سادسا : نظام التعليق
* باور خفيف بس مش اوى
* عفشة ناشفة جدا
* ثبات متوسط بس لسرعة اعلى من الكورى
سابعا : الفرامل
* بدال الفرامل كويس وقوى بس ساعات ال abs ماكنش بيلقط معايا بس فى المجمل الفرامل كويسة حتى على سرعات عالية شوية يعنى مابدأش يخف معايا غير بعد 130
* البدال عالى ومشوارة قليل لحد مايقفش العربية بمعنى ادق نسبة البوش فية قليلة بعكس الrb
ثامنا : استهلاك البنزين
مقدرتش احسب استهلاك البنزين للعربية دية بالظبط بس اقدر اقول انها عملت اعلى من ال rb فى نفس المسافة تقريبا يعنى اوفر شوية منها
تاسعا: التقيييييييم
1- الصاج : 7.5 /10
2- الشكل الخارجى : 7/10
3- الصالون : 9/10
4- المحرك : 6/10
5- الفتيس : 5/10
6- التعليق : 6/10
7- الفرامل : 8/10
8- الاستهلاك : 7.8 /10
9- الثبات : 7.5 / 10
التقييم النهائى 75%
ودة بسبب الاتى : عوامل الامان موجودة + العربية سعرها رخيص + الخامات ممتازة + واسعة + عالية عن الارض وثباتها كويس
عيوبها كلها فى المحرك + الفتيس + العفشة الناشفة
فى بقى حاجة كانت موجودة ان مقبض الباب بتاع السائق الداخلى كان بايظ
العربية : كانت عاملة 34500 كم
تختاروا مين ؟؟؟؟؟؟؟؟؟؟ m11/ rb
المفضلات