الموضوع: مقارنة غريبة شوية بس فعلا محتار جدا ومحتاج مساعدة

المشاركة الأصلية كتبت بواسطة yalahwy2010

انا معايا سيفيك 2009 وبصراحة مش مستريح فى سواقتها...انا بحب العربيات اللى قعدتها تكون عالية
ومحتار ومش عارف أجيب ايه؟؟؟؟
محتار بين المازدا 3 ......والكارينز.........طبعا حيرة غريبة وأكيد بتضحكوا
بس أعمل ايه......الكارينز كبيرة ومنتشرة وواسعة اوى وقطع الغيار موجودة
المازدا طبعا عربية محترمة ويابانى نضيفة بس قطع غيار قليلة وغالية
المهم انا عايز حد يقوللى الأفضل فى الآتى:
1. القاعدة والراحة فى السواقة فى السفر
2. العزل وعدم سماع ضوضاء أثناء السفر
3. مش فارق معايا الموتور وقوته.....انا عارف طبعا ان المازدا تكسب
4. العفشة والاحساس بالمطبات
يا ريت حد يدلنى عشان انا هبيع السيفيك ان شاء الله وعايز أستقر

انا ماركبتش كارينز فمقدرش افتي واقول عنها حاجة ، بس هاكلمك عن العربية اللي معايا

انا معايا مازدا 3 هاي لاين 2011 لسه شاريها قريب الحمد لله
1- القعدة والراحة في السواقة : بص هي ضيقة شوية من ورا خصوصا لو هاتاخد راحتك وترجع الكرسي على الآخر هاتضايق اللي وراك ، و لو انت حجمك ضخم أوي( يعني لو جسمك مدملك وملياان) هاتحس ان دراعاتك مقفلة على جسمك شوية ، انا بالنسبالي رفيع فحاسس انها واسعة هههه ، بالنسبة للراحة في السفر هتريحك جدا ان شاء الله ، عايز اقولك بسوقها بالساعتين والتلاتة كل يوم الحمد لله مش بحس اني تعبان بس يمكن مقارنة بالسيفيك هاتكون السيفك غالبا مريحة أكتر منها انا ماجربتش اركب سيفيك

2- العزل : عزلها كويس بص صوت الموتور هو اللي عالي ( لما بقفل الإزاز مش بسمع الدوشة بتاعت العربيات والشارع خصوصا لو مشغل حاجة اسمعها ، بس صوت الموتور بتاعها ماشاء الله عالي بس مش مزعج ... صوته رياضي )

3- موتورها سحبه كويس وطلعته جبارة من الثبات لما تقرص عليه ( ويا سلام لو بعد صيانة ال 1000 كم تاخدها وتفتح الموتور بتاعها على طريق سريع هتلاقي الموتور وحششششششش بعد كده ... ولاحظت كمان ان تقريبا والله أعلم الكمبيوتر بتاع العربية بيسجل طريقة سواقتك في آخر 5 دقايق مثلا وعلى أساسها بيستجيب لدوستك على الدواسة يعني لو سواقتك هاااااادية ... تلاقيك ساعت اما تدوس جامد على الدواسة تمشي معاك بالراحة وتطنشك إلا إذا شلت رجلك وكبست تاني تفهم انك عايز تنطلق تلاقيها بقت عربية تانية وتطلع معاك جامد ، والعكس برضه لو سواقتك سريعة و معظم الوقت بتحرق ... هتلاقيها بعد كده اول ماتلمس الدواسة مش هاتستناك اصلا وهتلاقي الموتور بياخد العربية ويطير ) وبرضه مش هايكون زي موتور السيفك على حسب ما بسمع من الناس

4- العفشة والمطبات: اللي معايا جنوط 16 ، بص العفشة ماقدرش اقول عليها نااااعمة وفي نفس الوقت مش ها ينفع اقول عليها ناشفة !!! هي معمولة حاجة كده في النص .. وده كويس عشان يديك ثبااااات على السرعات ( العفشة من ورا multi-link ) وفي نفس الوقت والله أخدت بيها كذا حفرة بنت "ستين تيت" صوت الرزعة كان متوسط بس احساسي بيها جوة العربية ولا كأنها اترزعت ماحستش ان جسمي اتهبد او اتكدرت وانا قاعد ، بجد خلتني أعرف انها عفشة محترمة جدااا ( ممكن موضوع العفشة ده تجربه بنفسك بإنك تروح لمعرض مازدا في عمارات العبور في صلاح سالم وتطلب منهم تعمل test drive قبل ماتروح بيوم ... وخدها وعندك الحفر والبلاعات في كل حتة ماشاء الله :) )

وبمناسبة المطبات : الناس اللي بيقولوا بتحك في أي علبة كانز في الشارع وصيغة المبالغة اللي الناس غاوياها دي ... :) انا ماجربتش اسوق موديل 2009 في المطبات عشان أحكم عليه ... بس الموديل اللي معايا زي ماقولتلك 2011 ... والله العظيم باخد بيه مطبات بتاعت 6 اكتوبر اللي في ميدان جهينة ومطبات انيل منها وانا ماشي بالعربية عدل ولا بلف ولا بعرض جسم العربية وباخد المطب عاااااااادي من غير ماتحك وبيكون راكب جنبي واحد كمان ، هي للأمانة مرة واحدة بس كان معايا اتينين غيري في العربية ولما أخدت المطب عدل حكت حكة بسيطة ... استينت لما صاحبي اللي كان قاعد ورا نزل ورجعت خدت نفس المطب بصاحبي اللي قاعد جنبي والعربية ماحكتش :) رجعت قولت لصاحبي اللي كان ورا يخس شويه هههه :) )

يبقى الخلاصة هي مش واطية وخصوصا لو قارنتها بالسيفيك بس لو الطبيعي بتاعك انك هاتركب اكتر من اتنين دايما معاك في العربية وطريقك كله مطبات عالية وغشيمة يبقى هاتحك هاتحك ) :)

وبالمناسبة العربية متصفحة من تحت

آخر حاجة عايز اقولها : الثبااااااااااااااااااااا اااااااااااااات

ماشاء الله العربية ثابتة ثابتة ثابتة !! خدتها في مشوار على طريق مصر السويس ووصلت ل 185 كم في الساعة وعمال الف بالعربية يمين وشمال ( بس مش قوي قلبي ماطاوعنيش أعمل شغل غرز والكلام ده يادوب بس اني أغير الحارة يمين في شمال :) ) العربية راااااااسية جداااا الحمد لله و على فكرة هي بتيجي سرعتها مقفولة على 180 او 185 كم\س

وفي الملفااات مش طبيعية !!!! راسية جدا في الملفات حتى لو بتاخدها على سرعة

بس انا أخدت بالي انك بتكلم في حدود مبلغ 130 الف ، المبلغ ده ممكن تجيب بيه مازدا اوتوماتيك بيز لاين ، الهاي لاين دلوقتي ب 155 الف وممكن تلاقيها في معارض اقل من كده ب 154 او 153

فكر وشوف انت يهمك ايه في العربية وربنا يوفقك في اختيارك ان شاء الله ويباركلك فيه أيا كان :)

ولو احتجت أي حاجة او استفسار انا يسعدني اني أساعدك

راحة وعزل وعدم الأحساس بالمطبات وعربية حلوة
تويوتا كورولا 2007
هتبقي في حدود ال 90
أوتو 1600
الشيب الجديد انا محسيتوش مريح زي القديم