الموضوع: رينو داستر الشكل الجديد - الآن في مصر

المشاركة الأصلية كتبت بواسطة bebo2000

الله يبارك فيكم جميعا والف شكر على شعوركم الطيب
بالنسبة للاداء فهو الى الان اكتر من ممتاز لاني كنت متوقع ان العربية هاتكون تقيلة قوي في الطلعة والسحب زي ما بيتقال عنها لكن فوجئت ان العربية زيها زي اغلب العربيات السيدان وده بعد مقارنتها بالافيو اللى معايا من 6 سنين هو الموضوع ببساطة ان النقلة الاولى دي المفروض تستخدم في المطالع ولما تكون محتاج عزم فقط والنقلة دى سرعتها زي ما مكتوب على موقع رينو 5 ك/ساعة على 1000 rpm يعنى بالبلدي كدة النقلة روحها قصيرة جدا وده المطلوب منها علشان لو بتعدى عائق او نازل منحدر جامد ما تحتجش تدوس فرامل لان العربية مش هاتجري اساسا ( الماتور بيفرمل العربية ) واى حد معاه دليل الاستخدام هيلاقي مكتوب فيه انهم بينصحوا بانك تطلع على الغيار التاني علطول في الحالات الطبيعية فلو اى واحد طلع على الاولاني لازم هايقولك العربية سحبها وحش وده شئ منطقي
طبعا بالنسبة للعفشة فحدث ولا حرج بسم الله ما شاء الله
انا طبعا بمشي في نفس الطريق من البيت للشغل كل يوم مع ذلك بحس اني ماشي في طريق تاني النقر اللى كنت بقع فيها بالافيو يدوب دلوقتي تحس كانك معدي على فاصل كوبري بعربية سيدان وخشانة الاسفلت وعين القط دول مابحسش غير بصوت الكاوتش عليهم
العزل اكتر من ممتاز يعني لو قفلت الازاز مابسمعش حاجة برة الا لو ركزت اوي ولو شغلت الكاسيت على اوطي حاجة مابحسش بالدنيا اللى برة تماما غير الافيو اللى كنت بقفل الازاز واعلى الكاسيت وبرده مفيش فايدة
طبعا انا هاعملكم تقرير تفصيلي عن العربية بس مش دلوقتي والا تقريري هايكون مش دقيق لان العربية لسة في التليين وماجربتش السرعات فوق 100 كيلو علشان احكم على التسارع بعد ال 100 وكمان موضوع الثبات على السرعات ولو اني اعتقد ان مفهوش مشكلة لان العربية مالتي لينك وده بيفرق في موضوع الثبات كتير
وطبعا اى سؤال انا تحت امركم

ربنا يبارك لك فيها يا غالي
والله إنت مشجعني جدا جدا على إني أجيب العربية دي وبإذن الله خلاص هي اللي في بالي
بس بالله عليك عايزين كام صورة على كام فيديو وتقرير مبسط كدة مش لازم تعدي التليين يعني
دا أنا بانتظر أي حاجة جديدة للداستر وخاصة التجارب الفعلية للأعضاء
علشان أنا ناوي بإذن الله

المشاركة الأصلية كتبت بواسطة الصيداح

ربنا يبارك لك فيها يا غالي
والله إنت مشجعني جدا جدا على إني أجيب العربية دي وبإذن الله خلاص هي اللي في بالي
بس بالله عليك عايزين كام صورة على كام فيديو وتقرير مبسط كدة مش لازم تعدي التليين يعني
دا أنا بانتظر أي حاجة جديدة للداستر وخاصة التجارب الفعلية للأعضاء
علشان أنا ناوي بإذن الله

علشان خاطرك وخاطر اخوتي في المنتدى جاري اعداد تقرير تفصيلي مع الصور والفيديو على وجه السرعة

المشاركة الأصلية كتبت بواسطة bebo2000

علشان خاطرك وخاطر اخوتي في المنتدى جاري اعداد تقرير تفصيلي مع الصور والفيديو على وجه السرعة

تسلم يا غالي ربنا يبارك لك فيها يارب

كما وعدتكم
الصور التفصيلية للداستر ال 4*4 اعلى فئة 2012

السيارة من الخارج







صالون السيارة من الداخل









طبعا مساحة الارجل للقاعدين ورا كويسة جدا جدا حتى لو مرجع الكراسي اللى قدام للاخر برضه بيفضل مسافة كويسة بس الموضوع ده يبان على الطبيعة احسن من الصور
انا حاولت اوضح في الصور دراع المالتي فانكشن اللى ورا الدريكسيون وقرص الدفع الرباعي اللى في الكونصول من تحت وزراير المرايات الكهرباء اللى تحت الهاند بريك والزرار اللى في جنب التابلوه ناحية الباب اليمين قدام ده زرار قفل الوسادة الهوائية التانية علشان لو حاطط كرسي طفل قدام لازم تقفلها
ولازم اكرر شكري لجينز كار والحاج/ احمد على النيولوك اللى اتعمل للعربية من جوة

ودلوقتي نروح على الشنطة






واضح من الصور مساحة التخزين الممتازة حتى من غير ماتقفل الكراسي اللى ورا ومع قفل الكراسي انت بيبقى معاك مساحة ولا صندوق عربية نص نقل
عاجبني جدا موضوع الكوريك اللى ليه مكان مقفول عليه واماكن التخزين اللى حوالين الاستبن بصراحة جامدة جدا لاني كنت في الافيو كل ما اجي استخدم الاستبن اقعد انزل العدة بتاعتي اللى معايا في الشنطة ( طقم مفكات على مفاتيح بلدي وشوية حاجات تانية ) بتبقى معايا للطوارئ لكن دلوقتي الواحد يحط الحاجات دي مع الاستبن وتفضل الشنطة فاضية ونضيفة

نيجي لاهم جزء في التقرير علشان الاخوة اللى سألوني عن الاداء والناس اللى بتشكك في العربية دي كل شوية بدون اي دليل

أولا: الماتور ال k4m الشهير بتاع الرينو ميجان والسينيك وغيرهم من الموديلا ال 1600 ال 16 صباب وده غير بتاع اللوجان علشان اللوجان 8 صباب بس


التصفيح اللى اسفل الماتور


ثانيا: عفشة "الاكس تريل" الجبارة المالتي لينك بجد مش لعب العيال بتاع الكارينز والصور تتكلم علشان المشككين وعلشان محدش يقول اني بشكر في العفشة علشان جبت العربية




اظن عفشة 4*4 بجد تستحمل الطرق بتاعتنا واللى اوحش منها كمان واعذروني لو الصور مش قد كده لاني كنت بنزل تحت العربية من جنب العجلة ومعرفتش اوضح كل حاجة بس في اول فرصة هارفع العربية في البنزينة هاصورها كلها من تحت وهارفعلكم الصور

واخيرا شوية صور ليها بالليل علشان التقرير يبقى كامل





وفي نهاية تقريري احب اشكر اصدقائي احمد سامي ومايكل ناجي اللى شجعوني اشتري العربية اللى مقتنع بيها وما اسمعش كلام الناس عن انها لسة جديدة ومحدش جربها وان الكوري احسن من الاوروبي والكلام الغريب اللى ما بنسمعهوش غير في مصر

واي استفسار عن العربية انا تحت امركم

حبيب قلبي أيوة كدة يا جدع
بس دي كانت محتاجة موضوع لوحدها إفرد لها موضوع خاص
ربنا يجازيك كل الخير يا غالي

بسم الله ما شاء الله
ربنا يحفظهالك بحفظه ويكفيك شر الطرق
تقرير جميل جدا وصور أجمل
بس صور الليل دي حلوة فعلا تسلم الأيادي

المشاركة الأصلية كتبت بواسطة الصيداح

بسم الله ما شاء الله
ربنا يحفظهالك بحفظه ويكفيك شر الطرق
تقرير جميل جدا وصور أجمل
بس صور الليل دي حلوة فعلا تسلم الأيادي

العفو يا باشا
ويارب اكون قدرت أفيد

الف شكر يا باشا على مجهودك العالى و الصور الجميلة التى اسعدتنى انا وأخوك الصيداح اكتر اتنين ح يموتوا على العربية - ناوى ابيع اللانسر بتاعتى الاتوماتيك 2008 علشان خاطر عيون الداستر فى اول ابريل ان شاء اللة.
قولى كمان لية ماجبتش المسند اللى بينك و بين الكرسى اللى جانبك و اية موضوع استيكر النيل موتورز و نجيبة منين و شكرا مرة تانية و السلام.