الموضوع: تجربة وتقييم للانسر و الكاوتش الجديد(my-01)

بالنسبة لموضوع النقشة انا بحاول ادور على موضوع عالنت بس مش لاقى حاليا
انا فاكر انى شفت 3 انواع واحد منهم اسمه flat ودا كان الكاوتش نازل كله حته واحدة وفارش عالأرض ماعرفش باقى الانواع ايه عموما انا بدور عليها ولما الاقيها هقولك

المشاركة الأصلية كتبت بواسطة elpasha009

أنا هحكلكم عن تجربتي مع الكاوتش الجديد وأداء العربية المختلف بعد تركيبه.
العربية لانسر 2007 عفشة سبور والكواتش اللي جاي معاها هو Bridgestone TURANZA ER30 مقاس 195-60-15 وده للناس اللي مش معاها العربية كاوتش رياضي جدا من الدرجة الأولى على حساب أي حاجة تانية.وفعلا هو الأداء بتاعة ممتاز جدا سواء من ناحية الثبات والتماسك والمشي بسرعات في المياه.بس للأسف كل ده على حساب الراحة والنعومة والسكون (بيصدر ضوضاء فظيعة).
المهم أنا عملت 50 ألف كيلو في 10 شهور وده طبعا إستهلاك قاسي نوعا ما للعربية والكاوتش.صحيح النقشة بتاعته تقريبا زي ما هي بنسبة 70% وكل بتوع الكاوتش أجمعوا إنه يستحمل لحد 10 ألاف كيلو مرتاح كمان إلا إني فضلت إني أغيره دلوقتي لثلاث أسباب إني هسافر قريب مسافة كبيرة جدا بالعربية والسبب التاني إن بدأ يظهر في الكاوتش عوامل التعرية بتاعت بلدنا :) (بعض الشقوق والقطع الصغير).والسبب الثالث والمهم جدا في الموضوع ده اللي أنا عامله:
http://www.nilemotors.net/Nile/showthread.php?t=26399
المهم كان قدامي 3 إختيارات وهم :
1- أعمل تحديث للموديل اللي بعد بتاعي وهو TURANZA ER60 وهو نفس خصائص القديم بس زياده عليه إنه هادي.وسعر الفاردة (لو موجودة) 395.
2- أغير للنوع الجديد اللي هو MY-01 وهو تقريبا نفس خصائص TURANZA ER60 بس رياضي أكتر.وسعر الفردة 406.
3- أجيب الكاوتش التحفة TURANZA GR80 السوبر سايلنت والسوبر رياضي:) وكمان ياباني الصنع بس سعره 570 جنيه.
بس للأسف إستبعد الإختيار التالت علشان السعر لأن مش هينفع كل 10 شهور تقريبا أجيب فردة بالمبلغ ده.و على أساس إنها هتفضل بنفس السعر:).
فمكنش قدامي غير إختيارين وإخترت التاني علشان الموديل الأول مش موجود.
المهم بعد التركيب والمشي بالطقم لمسافة 300 كيلو حتى الأن إليكم الطقم والعربية في نفس الوقت:
1- الثبات: طبعا حدث ولا حرج نفس ثبات الطقم القديم مع ثبات العربية مع العفشة الإسبور عاملين كوكتيل محترم.ممكن أدي الثبات زيادة في التحسن عن الطقم القديم 5%.
2- التماسك: طبعا فيه فرق لصالح الطقم الجديد عن القديم في التماسك على الأرض بنسبة 10% .
3- الفرامل: طبعا ناس كتيير جدااااااااااااااا بتشتكي من فرامل الانسر وبتقول إنهم بيحسوا بضعف فيها مع إن ده إحساس بس (أنا شخصيا كنت حاسس كده لحد ماجربت الفرامل في موقفين وأثبتت كفائة تامة) لكن مع الطقم الجديد في تحسن رهيب في الفرامل بنسبة 20%.
4- الهدوء: يا جماعة أنا من أول الناس اللي مكنش عاجبني موضوع الدوشة الفظيعة بتاعت العربية ويمكن ده شكوى عامة من الانسر ومن أحد عيوبها وقولت ده في موضوع ليا قديم:
http://www.nilemotors.net/Nile/showthread.php?t=16382
بس المفاجأة بقى إن مع الطقم الجديد في تحسن ملوش حل في موضوع العزل والصوت وصوت الكاوتش عموما والتحسن ده بنسبة 60%.ويمكن أول مرة أحس بجد إني في عربية ياباني ومكنتش مصدق نفسي إن العربية فيها عزل وعزل محترم جدا بس للأسف إتظلم بسبب الكاوتش القديم.
5- النعومة والراحة: والله الطقم الجديد طبعا ناعم ومريح بس للأسف مش هيفرق الموضوع ده كتيير لأن العربية أصلا عفشتها إسبور وبالتالي إ حساس النعومة هتحس بفرق 10% بس.لكن فرق محسوس جدا.يعني أبسط مثال أنا بحط نظارة الشمس في المكان اللي تحت الكاسيت ولما كنت بعدي على مفصلات كوبري زي 6 إكتوبر كانت النظارة بتنط مع النطة بتاعت المفصلات بس طبعا على خفيف وكمان بسمع صوت خبط الحاجات اللي في خزنة التابلوه.مع الطقم الجديد العربية بتنط برده بس زي ماتقولوا كده في إمتصاص للصدمة نوعا ما مش بيخلي النظارة تنط هي كمان ولا أسمع صوت الخبط.ياريت أكون عرفت أشرح:).
6- الباور: في تحسن في الباور والعربية واقفة حوالي 5% عن الطقم القديم (وده كانت شكوى من أعضاء كتير إن الباور تقيل) .
الخلاصة إن بجد شركة ميتسوبيشي ظلمت العربية الانسر لما نزلتها بالكاوتش القديم.هو صحيح الكاوتش القديم بجد أداءه الرياضي خرافي وطبعا العربية بتوحي بالطابع الرياضي فكان لازم الشكل يدل على المضمون.بس خسرت كتيير جدا بسبب موضوع الصوت العالي والنشوفية بتاعت الكاوتش القديم في وجود العفشة الرياضية. وده خلاني أنا شخصيا مش برشح العربية ده للناس الكبيرة لأنهم مش هيستحملوا الصوت العالي جدا والنشوفية الزيادة عن الحد.
في الأخر أحب أقول إن اللي عاوز يجرب في أي وقت العربية أنا تحت أمره يبعتلي بس ونتقابل إن شاء الله.

ممكن اعرف جبتهم منين و ياريت تقولى بسرعة علشان انا مش لاقى خالص و محتاج فردة واحدة ضرورى

ممتاز جدا
ربنا يباركلك فيهم