الموضوع: بالون فى الكاوتش ما العمل

المشاركة الأصلية كتبت بواسطة l0new0lf

البلالين بتحصل لما طبقات الكاوتش تبتدى تفك من بعضها
يعنى عيب صناعه
و مالهاش علاقه لا بضغط هوا ولا بنيتروجين
و الطرق الجميله فى مصر مش هى السبب فى ان الكاوتش يعمل بلالين بس هى السبب فى اظهار العيب لو كان موجود
زى لما يكون العجل محتاج ترصيص كل ما تزود سرعه تحس بغربله اكتر
الغربله سببها الترصيص انما السرعه بتظهر المشكله

مع احترامي الشديد لحضرتك الكاوتش بيكون ليه ظروف تشغيل معينه زيه زى اى حاجه بتشتريها و مش من ضمنها الحفر الكتير و النقر و المطبات و غطيان البلاعات و البلاوى التانيه و بتختلف حساسيه الاطار حسب حجم الجنط و كميه الهواء داخله و عندك موضوع البلالين ده حاجه منتشره فى الكاوتش ال low profile و بالذات مع جنط ١٧ هتلاقيه مع جنط ١٧ بيعمل بلالين مهما غيرت نوعه و بالتالى دى مش مشكله صناعه لانك لما بتركب نفس الماركه بره بتقعد على الاقل عمرها الافتراضى و لكن السبب هو الطرق فى الاساس اللى تترجم الى عيوب استخدام و مش صناعه و لو حد الكاوتش فضل شغال معاه كويس هتلاقيه ما بيقعش نقر و لا حفر و هو بيجرى على سرعات او مره و لا مرتين و مش كتير يعنى

المشاركة الأصلية كتبت بواسطة l0new0lf

مع احترامى الشديد جدا لحضرتك ياريت تفسر لى ليه مشكلة البلالين كترت جدا من سنه و نص تقريبا و اصبحت ظاهره واضحه جدا و قبل كده كانت مشاكل تعتبر قليله جدا مع ان نفس الطرق فى مصر متغيرتش و نفس المقاسات كانت بتستعمل هى هى اللى بتستعمل حاليا!! مع العلم ان البلالين حاليا بتظهر فى جميه مقاسات الكاوتش فى مصر ابتداءا من 13 و مش ال17 بس ولا اللو بروفايل!!!
و لما تقارن متقارنش مصر بخارج مصر
تقارن مصر بمصر مع اختلاف الفتره الزمنيه عشان تلغى عامل فرق كفاءة الطرق و نضافتها
الفرق الوحيد ان المستورد المصرى بيستورد فرز تانى و تالت و رابع اللى بيكون فيه عيوب صناعه عشان يكسب اكتر
بالضبط زى المنتجات الصينيه, اللى موجود فى مصر ردىء جدا و اللى بنشوفه بره مصر بيكون ممتاز جدا

الكلام ده ممكن يكون فى الماركات الرخيصه او الصينى مثلا لكن أنا باتكلم عن ماركات كبيره و غاليه و بيجيلها بلالين برضه و بعدين مين اللى قال لحضرتك ان الطرق زى ما هى؟ اكيد طبعا هى من سيء لاسوأ كل يوم و العربيات الجديده بتجرى جامد فطبيعى انها بتلبس فى المطبات و الحفر و ما بيلحقوش يفرملوا و أنا لما قلت بره مصر كان قصدى ابين بس ان فرق الطرق بيخللى الاطار اللى بيبوظ هنا بيعيش هناك سنين وهو هو مش فرز و لا رخيص و لا حاجه و ممكن تجرب تجيب اى نوع اطارات و تمشى به من غير ما تقع فى حفر و لا تدوس به على عين قط و لا بلاعات زى بره يعنى و شوف هيقعد معاك إد ايه و ده شبه مستحيل بس الأبسط من كده علشان تقتنع هتلاقى واحد راكب موديل عربيه و الكاوتش عامل بيه ٦٠ الف كيلو و الكاوتش بحالته وواحد تانى معاه نفس الموديل و راكب فيه نفس الكاوتش و ليغيره بعد ٥٠٠٠ كيلو فقط و اكيد الاتنين بنفس السعر علشان منقولش ده فرز و التانى فرز تانى و الاتنين ماشيين فى مصر بس فرق الطرق و طريقه القيادة هى اللى بتفرق

يا جماعة للامانة انا قولت انقل ليكم اللى حصل ادامى النهاردة وانا عند بتاع الكاوتش كنت بلحمه عشان فيه مسامير .. المهم جه واحد راكب سيراتوا وبيشتكى من بالونه فى الكاوتش الامامى يمين وكان بيقول انه لسه شارى ال 4 فرد جداد يعنى بقالهم شهر مثلا فكان بيسأل لو فيه حل للبالونة دى وكان رد بتاع الكاوتش انه عيب صناعة ومالوش حل والمفروض تتغير.

بصراحة انا مقتنع بالكلام ده لسببين من وجهة نظرى:

1. المفترض ان الكاوتش مصمم عشان يستحمل كل الظروف فلو كان عيب طرق يبقى مفيش كاوتش هيستحمل خالص فى طرق مصر
2. لو كان عيب طريق فكان من الابدى ان ال 4 فرد مع الوقت تلاقى فيهم البلالين دى او بعضهم مش كلهم .. او كنت تلاقى معظم العربيات فى مصر عجلها مليان بلالين ولكن انا اعتقد انه مش عيب متكرر يعنى مثلا ممكن تلاقى واحد عربيته ماشية 40 الف او اكتر ومعملتش ولا بالونة

ده طبعا من وجهة نظرى المتواضعة .. وعلى كل حال اعتقد ان فى حالة الاخ صاحب الموضوع لابد انه يغير الفردة على حسابه وخلاص لان ملهاش حل

انا عندي نفس المشكلة في فردتين و دلوقتي عامل 40000 كيلو ... رجعت الاتنين ورا للخلفو جبت الورا للامام لحد ما غيرهم خالص
في نظري اهم حاجة يكون الكاوتش الامامي قوي و سليم