الموضوع: إلحقوني الكلاب كرهتني في عيشتي

المشاركة الأصلية كتبت بواسطة windofchange

,,اللي اعرفه ان الكلاب بتطلع عالعربية بسبب الغطا عشان بتنام فوقه وتدفي يبقي شيل الغطي كده كده العربية بتبهدل تراب ولو كل يوم ولا يومين فوطة زفرة من البواب يعملها مش هتشوف التراب,
,,,ايهاب

أخي العزيز إيهاب ...
السلام عليكم ..
من غير الغطاء بيطلعوا فوق العربية وموش بيناموا فقط .. لأ بيعملوا حفلة وعراك وتنطيط .. والنتيجة النهائية خرابيش لا حصر لها ..
موش بقول لك إتخنقت ..
وإللي مزود خنقتي إن عربيتي عزيزة على جداً .. لأني ربنا يعلم أنا تعبت جداً لغاية ما ربنا كرمني بيها ....!!!
وماتقوليش هو دة السبب ( إني قلبي متعلق بيها والكلام دة ...!! )

المشاركة الأصلية كتبت بواسطة hossam99

متغطيش العربيه أبداً
هم بيطلعو يدفو و يلعبو علي الغطا يبقي بلاش الغطا

ما أنا بقول لكم
إني أغطيها موش مشكلة مايهمنيش تترب .. يارب حتى تتطين .. أبق أغسلها يا سيدي
لكن من غير الغطاء الخسارة أفدح
بيطلعوا عليها برضوا .. وإتفرج على الخرابيش بقى ( موش قلت لكم رشيتها بسبب الخرابيش دي )

المشاركة الأصلية كتبت بواسطة elmahdy

الرد بسيط ومجرب من سنين عن طريق والدي
بص ياسيدي... لا تسم ولا تحرق ولا تكهرب... انت هاتجيب دبابيس مكتب تحطها في الغطا بالعكس من جوه... ولما هاتفرد الغطا اي ابن كلب هايحاول يطلع على العربية هايتشكشك جامد... وهايقوم معوص وواخد بعضه ونازل جري... على فكره لو اتفرجت عليهم وانت واقف بعديها هاتهلك من الضحك... انت ممكن تصورهم كمان
وبكده تبقى ما قتلتش حد ولا اذيت حد وحافظت على ممتلكاتك
اهم حاجه لما تركب الدبابيس ما تكترش... شويه على السقف وشويه على الكبوت وشويه على الشنطه
وثبتها كويس اما بلزق او انك تخيط عليها من تحتيها طبقه تانيه من القماش عشان تضمن تثبيتها... وانت بتلم الغطا خليك حريص عشان ما تجرحش العربية
تحياتي للجميع

والله فكرة جامدة جداً ..
إن شاء الله هأجربها .. خاصة بع فشك كل المحاولات ( تحديد منطقة النفوذ _ الفلفل الإسود ..... إلخ )
إصل كلاب منطقتنا مالهاش حل ..!!
هي دي فايدة النقاش المجدي ..
والكل يستفاد

المشاركة الأصلية كتبت بواسطة moumen_hs

بص ياباشا فى حل كان بيتعمل بشوفى تجيب ربع لوح كونتر يكون مغطى السقف تقريبا وتدق فى مسامير كتير بحيث راس المسمار تكون لاسفل وسن المسمار لاعلى زى فرشة الشعر توضعة فوق السقف وشكرا ولو حابب يكون على الكبوت والشنطة لو امكن

شكراً على مرورك ومشاركتك ..
فكرة جامدة برضوا وممتازة وفكرنا فيها ( أحد جيراني قال لي عليها ) لكن للأسف موش هتنفع ..؟؟
قول لي ليه ؟؟
هيتسرق بعد وضعه على العربية بساعة ...
أه والله .. هيتسرق

المشاركة الأصلية كتبت بواسطة د.محمود صلاح

انا اخدت ولد بيربي كلاب واتفاهمت معاه .. وامسكهم كلب كلب وركبته العربية ورحت لحتة زراعية بعيدة ومقطوعة ورميتهم فيها واحد واحد

هههههههههههههههههههه
حلوة يا دكتور ....!!!

المشاركة الأصلية كتبت بواسطة syd

رسالة لكل الي بيحرموا القتل او التعذيب
زي استاذ محمد minicooper واعلم حبه للحيوانات الأليفة والأستاذ ايهاب windsofchanges

رأيك ايه في ترويع الأمنين ؟؟؟

يعني انا طلعت من يومين جري من البلكونة علي صوت صويت واحدة
قولت تلاقي حرامي نتش شنطتها ولا اعوذ بالله حد اتهجم عليها ولا حصلها بلوة ولا ولا ولا
ببص لقيت طلعلها القطيع الي بالك فيه ...
طبعا شافتهم اتفزعت وجه واحد جارنا من الشارع الي ورانا عشان يعديها

وانا احيانا لما اجي خارج ولما بفتح باب البيت الاقي كلب اسود نايم علي العتبة بهشه وبقول الحمد لله ان انا الي اتكعبلت فيه لأن لو واحد من ولاد اخويا الي قابله اكيد كان هيتفزع

،
،

أنا ربنا كارمني بولدين توأم ( 8 سنوات ) ....
وفي يوم نزلوا يشتروا حاجة من السوبر ماركت إللي تحت البيت
وكنت نايم ( كان يوم جمعة ) وصحيت مفزوع على صراخهم على باب الشقة !!!!!
والسبب كان إيه ؟؟
الكائنات المقرف دي جريت وراهم وكانت هتعقرهم
أنا إتخيلت المشهد وهم بيحكوا وهم باكيين ومفزوعين
وحلفت ببالله لأنزل أقتلهم كلهم ( 8 كلاب ) لولا إن زوجتي هدأت من ثورتي وأقنعتني إني لن أستطيع عمل ذلك ( موش بالسهولة دي !!!!)
إيه رد حضرات الزملاء الأفاضل بتوع مبدأ التحريم وحقوق الحيوان ( مع إحترامي لسيادتهم طبعاً )