الموضوع: حد مركب مروحة الشاهين على فليشيا

المشاركة الأصلية كتبت بواسطة mohammedaladel

على حد علمى ان البطارية دورها تشغيل العربية بعد كدا الدينامو بيتولى مسئوليته ويغذى العربية كلها كهربا ويعوض نقص الشحن فى البطارية لو كلامى دا صح يبقى البطارية حتى لو ضعيفة بمجرد تشغيل المحرك المروحة هتشتغل وهتحمل ع الدينامو إيه رأى حضرتك فى الكلام دا ؟

بالنسبة للبطارية دورها مهم وحيوي وفعال في تغذية الوحدات عالية الاستهلاك زي بلاور التكييف أو الدفاية، مروحة الردياتير والسربنتينة، آلية الؤازرة في بعض سيارات (نظام الباور ستيرينج الالكتروني)، ولو موتور العربية كهربا زي مابيقولو في بعض الماركات زي البورا مثلا.
ممكن حضرتك تجرب إنك تدور العربية وبعدين تفك البطارية (الطرفين) وامشي بيها ولاحظ درجات حرارة الموتور من الأمبير خلال المشي والجري وانت منور النور العالي مثلا أو مشغل التكييف. هتلاحظ صحة رأيي المتواضع، فعلا كلام سيادتك صح بس الدينامو مش هيلاحق ومش هيقدر يغذي كل الوحدات فتبقى كهرباء مروحة الردياتير ضعيفة.

المشاركة الأصلية كتبت بواسطة benmatar

بالنسبة للبطارية دورها مهم وحيوي وفعال في تغذية الوحدات عالية الاستهلاك زي بلاور التكييف أو الدفاية، مروحة الردياتير والسربنتينة، آلية الؤازرة في بعض سيارات (نظام الباور ستيرينج الالكتروني)، ولو موتور العربية كهربا زي مابيقولو في بعض الماركات زي البورا مثلا.
ممكن حضرتك تجرب إنك تدور العربية وبعدين تفك البطارية (الطرفين) وامشي بيها ولاحظ درجات حرارة الموتور من الأمبير خلال المشي والجري وانت منور النور العالي مثلا أو مشغل التكييف. هتلاحظ صحة رأيي المتواضع، فعلا كلام سيادتك صح بس الدينامو مش هيلاحق ومش هيقدر يغذي كل الوحدات فتبقى كهرباء مروحة الردياتير ضعيفة.

شكرا جدا للتوضيح من خلال شرح حضرتك يبقى أثناء تشغيل السيارة الدينامو والبطارية بيبقوا بيغذوا العربية مع بعض ولما نفصل البطارية مع تشغيل التكييف مثلا وعجلة مؤازرة كهربائية ونور عالى مؤشر الحرارة هيرتفع كلام معقول جدا بس هل دا حضرتك فى كل العربيات ؟

معظم العربيات كده طبعا لأن على فكرة الدينامو مش هو المصدر دايما وإنما البطارية والدينامو هو اللي بيغذيها مش أكثر، فلما تكون البطارية مصابة بأمراض مزمنة وعندها ضعف عام الحمل هيكون على الدينامو وهيصاب بالاجهاد والتعب والإعياء. وربنا يشفينا جميعا ويكفينا مشاكل العربيات وخاصة إننا داخلين على الصيف.

السلام عليكم
انا عايز اعلق على حاجه ماينفعش نغير فى تتصميم العربيه يعنى نغير طمبورة طرمبة الميه علشان انته كده عتغير فى سرعتها وهى ممكن تكون غير مصممه لسرعه عاليه وممكن تتكسر منك
وكمان تغير السير بقاس اصغر عيغير فى سرعه كل حاجه راكبه على السير ده

لا يا فندم موضوع التعديل وتغيير أقطار طمبورة السير بتاع الطلمبة أو أي تغيير في ريش الطلمبة هيكون أمر صعب جدا وممكن يديك نتيجة عكسية. الأمر ومافيه هو عدم التنازل عن قطع الغيار الأصلية في بعض الأجزاء الحيوية زي طلمبة المياه، غطاء القربة. ممكن حاجات تانية نسترخص فيها زي فانوس أو مرايا بس أنصح بطلمبة أصلي. وطالما الردياتير سليم ونظيف والخراطيم تمام والوصلات سليمة والطلمبة كويسة والسير مشدود مفيش مشكلة، ولازم نحط في الحسبان كام نقطة كدة وبالأخص في الحر زي:
- التاكيهات تكون مظبوطة،
- زيت الموتور نظيف (طبعا 20w50 وبالأخص في الصيف)
- فلتر الهواء مش مكتوم،
- الردياتير كل فترة يتنظف بكمبريسور هواء من التراب،
- الكربراتير يكون مظبوط.
- البطارية كويسة عشان مروحة التبريد تشتغل تمام

دي عوامل فعلا مؤثرة على الحرارة رغم إنها بعيدة عن دورة التبريد، وإن شاء الله صيف آمن لكل فرسان الفيليشيا بدون سخونة.

انا ركبت مروحة شاهين , تحب تسمع التجربه في سطرين ؟؟
المروحة الشاهين كانت مذهله في اول 6 شهور و لانها هاتشتغل طول مانت سايق بسبب تشغيلك التكييف مثلا او نتيجة ان درجه الحراره عاليه في الصيف , فنتيجة التشغيل المستمر عمرها بيقصر لسبب مهم و هو انها تقيله اوي و موتورها ضخم و ريشها قصيره , هي بتعمل تيار جامد اوك بس عمرها قصير اوي , من الاخر كدة السلوك ولعت لان المروحة دي الوات بتاعتها عالي اوي , بجد و الله حرقت لي الاسلاك اللي بتشغلها كذا مره من قوت كهربتها لكن مع الاسف تيارها كمروحة ضعف بعد شهور و كل مايضعف اداء المروحة كل ماسحبها للكهربا يزيد و تحميلها على الاسلاك يزيد , انا كنت حاطط سلك نضيف شعر 3 ملي و لا حوء معاها و برضه ولع , بص انصحك و انصح كل الناس اللي العربيه بتسخن معاهم بالاتي :
1 - من غير حوارات و افتكاسات , المروحة الاصلي الــ 6 ريشة بالقميص هي الافضل
2 - الرادياتير الصيني الالومنيوم رائع بجد و مش بيفرق عن الاصلي تقريبا هو بس عمره اقصر
3 - مياة خضراء اسبانية او ايطالية او اي نوع نضيف فيه نسبه زيت مانع للصدأ
4 - شراء غطاء قربه اصلي او شراء غطاء الدايو لانوس او غطاء الاوبل الاصلي ( لونه اصفر )
5 - اعرف قيمة عربيتك و قدراتها بمعنى انها من الاخر ضعيفه و مش هاتستحمل تكييف فاذا كنت ناوي على التكييف فياريت تحترم عربيتك و ماتهينهاش و تفتكر انها مرسيدس , يعني شغل التكييف في اوقات مائلة للحرارة مش اوقات جهنم الحمرا اللي مصر بقت تعيشها كل صيف , يعني لما تبقى درجة الحراره مثلا فوق الــ 40 بلاش تضغط على عربيتك و تشغل التكييف , استحمل انت الحر احسن ههههههه
6- لو حد قدر يعدل في الشبكه الامامية ياريييييييييييييييييييييي ت , لان فتحه التهوية الامامية في وش الاوكتافيا كبيرة فمشكله السخونة فيها اقل بكتير
7 - سواء كنت مركب تكييف او لأ لازم تركب مروحة صغيره امامية ( ورا الشبكة الامامية مباشرة )
8- ركب ترموستات في الصيف 68/82 و في الشتا ركب 80/90 و السبب بسيط , طبعا في الصيف هاتركب الواطي و السبب واضح انما في الشتا ليه هاتركب الترموستات العالي ؟؟ السبب هو انك تريح المروحة في الشتا و بالطريقة دي المروحة هاتشتغل قليل و عمرها يطول شوية و للعلم يعني تغيير الترموستات سهل جدا ( عايز مفتاح انبوبة البوتجاز بس ههههههه )
9- دورات غسيل رادياتير مستمره

يارب اكون قدرت اضيف 1 % كمعلومة لأي حد و شكرا

كلام رائع ومفيد، ربنا يكرمك...
- فعلا نقطة إن غطاء القربة يكون أصلي ده موضوع حيوي وناس كتير بتنساه ومجربه في عربية أخويا بورا وكانت هتولع بسببه.
- فتحة التهوية الأمامية في الفيليشيا فعلا ضيقة وفعلا عامل مؤثر، ولو حد فك الوش ومشي بالعربية مش هتسخن بتاتا، وممكن من على النت تجمع شوية صور وتعديلات لا بأس بها.
- لو سربتنتينة التكييف تم تركيب عدد 2 مروحة على ترموستات زي مروحة اللانوس أو النوبيرا أو الكورولا القديمة (مروحة خفيفة جدا، سريعة، معدل انسياب هواء عالي، تشغل حيز مناسب، سحب كهرباء معقول نسبيا) ... إنسى أي حرارة بتكييف أو بدون مع ردياتير 3 ماسورة.......... المعادلة تساوي ثلاجة.