[QUOTE=windows9x;3874134400]السلام عليكم،
معلش هاتقل عليكم و خاصة ان دى اول مشاركاتى بس اكيد مش اخرها، فا استحملونى و الاجر و الثواب عند الله :)
عندى شوية اسئله ارجو منكم الأجابه عليها للى عارف:
- بالنسبه لقطع الغيار الأستيراد اللى فى الحرفيين و عزبة شلبى و الوكاله بتبقى قديمه و متقطعه من عربيات المانى و اسبانى من بره اصلا؟ ولا استيراد جديده و بتتباع؟ ولو قديمه اتأكد ازاى انها شغاله؟ ولا ده من المصدر اللى بشترى منه؟ وهلى الصينى كويس؟
__ قطع الغيار الإستيراد بتكون مستعمله طبعا مش جديده ، وبتتأكد منها لما بتركبها بيبقى ديما عليها ضمان مثلا يومين تلاته شهر حسب الاتفاق مع البائع ، ابعد عن الصينى الله يكرمك
- عايز اعرف سعر الرداخ او ترمبة البنزين للابيزا ال94 ال clx وسعر سير الكاتينه و المرايه الشمال و اليمين و هل ممكن اجيب االشمال بس؟
__ سعر طربمة البنزين استيراد فى حدود 350 جنيه ، سعره جديد عند فتح الباب 700 جنيه ، سعر سير الكاتين عند فتح الباب 60 جنيه.
- انا جبت العربيه لسه من يومين و دى اول عربيه فى حياتى ولسه بتعلم سواقه، المفروض اعمل ايه من فحص علشان انضف العربيه من اى حاجه فيها زى مكونات ممكن تكون بايظه بس مش هاتظهر دلوقتى ولازم اغيرها علشان ارتاح بعد كده؟
__ تغير كل الفلاتر ( بنزين وزيت وهواء) ، تغير الزيوت كلها ( موتور وفتيس وفرامل ) ، تغير السيور كلها ( دينامو وكاتينه ) مش لازم كلهم مره وحده يعنى وحده وحده
- بالنسبه لكوتشات ال94 بتبقى تيوبلس ولا تيوب؟ و اكشف علي الشنابر من جوه بس ولا اجيب 4 كوتشات تيولبس وخلاص؟ وسعرهم كام؟ مه العلم انهم 13 تقريبا
__ مش عارف الكوتش اللى عندك ظروفه ايه بصراحه ، بس غالبا هيكونوا تيوبلس طبعا ، نصيحه هات أربع فرد جداد لو فيه امكانيه عندك وشيل انضف فرده عندك الوقتى اعملها استبن ، سع الفرده فى حدود 350 جنيه جديد.
- الفتيس بيعمل صوت خبطه كده كائنك بتخبط حديدتين فى بعض لما اجى اموور، دا عادى ولا محتاج ابص عليه؟
__ طبعا كده مش عادى لازم تكشف عليه ، مش عارف أقولك فيه ايه عشان مش شايفه
- عايز اغير الزيت، احط 5000 ولا 2000 و احط زيت ايه اصلا؟ مع العلم ان الموتور حالته مش حلوه بس مش هاعمره دلوقتى
__ مدام الموتور خفيف يبقى هات زيت تقيل شويه يعنى ممكن تجيب شيل الاصفر 5000 كم
- بالنسبه لفلتر البنزين و الزيت اجيبهم اى حاجه؟ و هل كل الفلاتر بتركب على كل العربيات ولا كل موديل وله فلتره؟ و اجيب صينى و كده ولا برضه اجيبه استيراد؟
__ هات نوع اسمه توبران من عند فتح الباب ( ده انا مجربه عندى ) مينفعش تجيب فلاتر استيراد طبعا حرام عليك.
- يعنى ايه بالضبط العفشه؟ يعنى ايه تتربط؟ و اربطها فين؟ بنزينه ولا ميكانيكى؟ و تقريبا بتتربط بكام؟
___ يعنى تربط العفشه وتزيتها وبتتعمل عند عفشجى أو بنزينه حسب ما تحب وترتاح نفسيا
- سؤال اخير عبيط، هو الصح انى اسوق و اتدرب وسط العربيات بحرص علشان اتعلم سواقه ولا اقضيها سكك فاضيه؟
__الصح ياباشا لو معندكش اى فكره اساسا انك تمشى تدرب نفسك فى مكان فاضى الاول لحد لما تاخد على العربيه وتروح الرهبه منك وتعرف تملكها كويس ،وبعدين وحده وحده تدخل فى زحمه ، الموضوع بسيط جدا
* يارب أكون قدرت أفيدك_ دى أول مشاركه ليا من شهر _ كان عندى ظروف قهريه وتحت أمرك فى أى حاجه تانيه
المفضلات