الموضوع: العربية اللى حيلتى باظت ياحلوللى

العربية اللى حيلتى باظت باظت باظت ده مش اعلان دى الحقيقة المرة اللى انا لغاية دلوقتى مش عارف سبب للمشكلة اللى هيا بقى ايه:
العربية فليشيا 97 عاملة 190000 كيلو وبحطلها بنزين 92 يعني مش حارمها من حاجة وكمان بحطلها مية خضرا من النوع الغالى عشان متقولش حرمتها من حاجة العربية كانت كويسة ومفيش فيها اى حاجة من حوالى 6 شهور كده والعربية على السلانسيه لقيت المؤشر بتاع الار بى ام مرة يعلى لوحده ومرة ينزل لغاية 5 واحس ان العربية هتبطل رحت انا معلى العربية بنفسى قلت عشان متبطلش منى بس طبعا بقى صوتها عالى اوى انا قلت لغاية لما اروح للميكانيكي المهم رحتله قاللى البوابة التانية فى الكربراتير مش عارف مالها المهم قاللى انا هاظبطلك الهوا والبنزين وبص على المؤشر لما يبقي على 8 قوللى المهم ظبط على كده وقلتله الحركة دى لو حصلت معايا اعمل ايه قاللى بدل كابل البوجيه التانى والتالت اعكسهم ودوس بنزين وبعدين رجعهم زى الاول الحركة دى هتطرد وساخة البنزين المهم خلصت ومشيت والعربية بقت تمام جيت من فترة لقيت كابل البطارية الارضى مملح ومش مربوط كويس فكيته خالص ونظفت ورجعت ربطته تانى وقرطت عليه وتمام التمام معلش انا طولت عليكم بس لازم اقول تسلسل المشكلة ايه المهم كل فترة الاقى الكابل عايز يتقرط عليه مع العلم ان لمبة البطارية مش بتنور دلوقتى مشكلة العربية من يومين بقيت لما ادوس بنزين جامد جدا واجرى بيها واجى اهدى لاى سبب اسمع صوت ترزيع قلت دى علبة الشكمان فيها مشكلة رحت لبتاع الشكمانات قاللى العلبة سليمة روح للميكانيكي عشان المكنة صوتها عالى والكهربة بتاعة العربية مش مظبوطة قلتله طيب روحت وركنت وجيت ادور العربية النهاردة الصبح دارت وسخنت ومشيت بيها بتاع 3 كيلو وبهدى عشان مطب راحت مبطلة رحت مدور تانى وكملت بيها بتاع 5 كيلو وراحت مبطلة تانى قلت يمكن كابل الارضى عايز يتقرط عليه نزلت وقرطت وحلفت ماهى دايرة طبعا اتاخرت على شغلى وفضلت واقف جنبها واحاول ادورها مش راضية المفتاح فى الكونتاكت والفه وتروح قاطعة المهم دورتها بالزق دارت ومشيت بيها وانا عينى على مؤشر الار بى ام عشان متبطلش غاية ماوصل مشوارى الاقى حاجة عجيبة الا وهى ان مؤشر الار بى ام بيرقص مرة يطلع عند 5 وشوية يرجع على 2 وحركات غريبة كده روحت وركنت العربية وقلت اجرب ادورها مارش تانى مادارتش دلوقتى انا راكنها عند البيت والنهاردة الاحد ومش عارف اعمل ايه وكمان انا مش عارف كده المشكلة من ايه هل البطارية باظت ولا فعلا الكهربة بتاعة العربية مش مظبوطة ولا ده عيب كربراتير ولا ايه ياريت حد يفسر لى عشان لما اروح للميكانيكي ميجربش فيا واقوله المشكلة سببها ايه وشكرا واسف انى طولت عليكم