الموضوع: دردشة في كتيب أرشادات اليارس ؟ لفقهاء التويوتا يارس

النقطة الثانية :
عندك في اللوحة الديجتال بتاعت البانزين الي على اليمين فيه أربع أختيارات
الاول :OOOO ده بتاع المسافة المقطوعة
الثاني :TRIP A ده بتاع الرحلة رقم 1
الثالث : TRIP B ده بتاع الرحلة رقم 2
الرابع بأه : ----------
-----------------------
--------------------------

ده بتاع ايه ... في الكتلوج بيقولك انك بتقدر تتحكم بدرجة الاضائة بتاعت التابلوة حد يعرف ازاي ومنين ؟؟؟؟

طبعاً النقطة الثانية مذكورة في صفحة رقم 104 .

النقطة الثالثة : في ص 52 .
بيقولك بالنسبة للأيرباج مبيتفتحتش لا لو قدر الله العربية اتقلبت او اتخبطت من الجنب او حتى من ورى ... ولا حتى الناس الي بتقلك اصل في حساسات في الكرسي والي يقلك بيفتح اذا كنت رابط حزام الامان ... مذكور في الكتاب

يمكن لأكياس الهواء srs ألأمامية أن تفنتفخ إذا تعرضت المنطقة السفلية لسيارتك لصدمة قوية . ويضيف ايضاً الكتيب قائلاً : تنتفخ أكياس الهواء srs الامامية إذا كانت شدة الصدمة أعلى من المستوى الإطلاق المصمم ، أي ما يقابل تصادم بسرعة حوالي (25 كيلو) عند الارتطام باستقامة بجدار صلب لا يتحرك ولا يتشوه شكلو .

يعني من الاخر اذا لبست في عمود مثلا من قدام او كلت مطب ونزلت العربية على بوزها فينفتح الايرباج ... طيب هما ليه مسمينها srs مش أيرباج ... فخلي بالكم محدش ياكول مطب جامد او ينزل في حفرة .

وهنا ايضاً في الكتاب فيه تحذير : أن يجب ترك مسافة بين صدرك وبين الدريكسيون مسافة 45 سم علشان قوة الانفجار بتاع الوسائد الهوائية ... يعني الي قاعد بيسوق ومقعد ابنو على حجرو ... والاخت الي بتسوق وحضنة الدريكسيون ومنزلة الكرسي تحت الدريكسيون تبعد شوية والا ممكن يسبب لها تهشم القفص الصدري .

افتح يا سمسم قصدي أفتح يا أيرباااااااااااااج

النقطة الرابعة :

موضوع زيت العربية أي أحسن زيت أستخدمتموه .. أنا شفت موضوع زيت لوكي مولي بس مجربتهوش ... وشفت موضوع عن فافيون وكمان لسه مجربتهوش ... مين جرب الزيت ده ومين جرب الزيت التاني ... وكمان لقيت في زيت بيتباع في شارع دمشق اسمو تويوتا ... وفي كتيب العربية بيقلك بننصح بزيت تويوتا وهو صناعة امراتية يعني خليجي ... يعني الظروف الصعبة والشاقة والحرارة الي على حق . وتمنو 250 جنية ... ده غير اني لقيت زيت اسموو لكزيس كمان تابع لشركة تويوتا . فأيه رأيكم يا فقهاء اليارس مين أحسن زيت للعربية .

انا كنت بستخدم زيت موبيل 1 ... بس لمن تابعت موضوع الزيت لقيت اني في كزا موبيل 1 في السوق ... وانا كنت فاهم انو كلو موبيل ... ففتحت المنيوال بتاع العربية لقيتهم كاتبين ننصح بأستخدام ثلاث أنواع .

الاول : 20w50
الثاني :15W40
الثالث :10W30
واضاف كتيب العربية وبيقول زيت محرك متعدد الدرجات تصنيفAPI من فئة SL
''Energy-Conserving''
أو ''Energy-Conserving'' SM
أو ILSAC

ده الي مكتوب في الكتلوج ... المهم تنصحوني بايه بحيث الاقي العربية ملبن تحت رجلايا كده ونعمة وهدية وبنت حلال وشكراً ليكم ياشباب .

المشاركة الأصلية كتبت بواسطة amaamas

النقطة الثانية صحيحة
دور العربية
شغل من دراع الاضاءة نور التبلورة
دوس على زرار trip
الاول :oooo ده بتاع المسافة المقطوعة
الثاني :trip a ده بتاع الرحلة رقم 1
الثالث : Trip b ده بتاع الرحلة رقم 2
الرابع بأه : ----------
-----------------------
--------------------------
الرابع دة دوس عليه ضغظة طويلة النتيجة الشرط الكتير دى هاتقل+نور التبلوة هايقل وكل ماتزود وقت الضغطة النور يقل لغاية بيبقى اضعف حاجة وبعدين يرجع اقوى حاجة تانى

تسلم ياباشا هجرب وهشوف ... صحيح مقلتلناش أخبار نوع الزيت معاك أيه جربت حاجة محددة ولا زي حالتنا موبيل 1 .
ومرسي قوي على مشاركتك يا غالي .

انا كنت عايز استفسر عن حارات الاتوماتيك ايه فايدتها و حارة 3-d نخلى عصاية الفتيس لبره والا جوة .. هل غسيل الموتور وتشحيمها عموما بياثر على حاجة فى الياريس يعنى فى حاجة اقول للراجل يخللى باله منها والا عادى وشكرا ..

المشاركة الأصلية كتبت بواسطة bakroov

انا كنت عايز استفسر عن حارات الاتوماتيك ايه فايدتها و حارة 3-d نخلى عصاية الفتيس لبره والا جوة .. هل غسيل الموتور وتشحيمها عموما بياثر على حاجة فى الياريس يعنى فى حاجة اقول للراجل يخللى باله منها والا عادى وشكرا ..

في صفحة 117 من دليل اليارس :
بيقولك ياسيدي ناقل الحركة التلقائي في سيارتك مجهز بنظام قفل تحويل لتقليل احتمالات التشغيل الخاطئ . هذا يعني أنه يمكنك تحريك الذراع ناقل الحركة خارج وضع الانتظار p فقط عندما تكون دواسة الفرملة مضغوطة والمحرك يعمل .

P: وضع الانتظار بدء تشغيل المحرك ونزع المفتاح
R : الرجوع للخلف .
D : وضع القيادة العادية (تحويل الى وضع السرعة الزائدة ممكن )
3 : فرملة المحرك (التحويل الى وضع السرعة الزائدة غير ممكن ).
2 : فرملة المحرك أقوى .
L: فرملة للمحرك قصوى .

أيه بأه ياسيدي حكاية فرملة المحرك دي ... يعني بيتقلك حركة المتور وبالذات لمن تكون نازل نزلة زي بتاعت جبل المقطم كده او مثلا لورحت الاردن او لبنان او حتى في السعودية حته اسمها حقل في الشمال ... وفي حته اسمها المجمعه كده قرب الرياض ... دي حتت بتلاقي الشارع منزل منزل يعني العربية بتجري منك لوحدها فعلشان متحرقش الفرامل فبتحط الثري او التو واذا كان المنزل جامد قوووي ومنحدر بتحط على حرف الال .

وتقريباً انو بيخلي العربية تمشي على التيرس او الغيار رقم 3 والاثنين كزالك بيخلي العربية كأنها ماشية على التاني .

لكن ملحوظة هنا في صفحة 119 :
بيقلك اقصى سرعة تقدر تمشي فيها على 2 لغاية سرعة 99 كيلو
وال ''L'' أقصى سرعة تمشي فيها عليها 54 كيلو .

وبالنسبة لل D 3 بيقلك استخدمهم عند صعود تل أو عند القطر الشاق يعني بتقطر عربية .

واللهي الناس دي محترمة جداً حتى كاتبلك هنا في صفحة 120 بيقلك السرعات بالنسبة للمنوال متزودش عنها بيقلك :
الترس الاول أقصى حاجة 44 كيلو
الترس التاني أقصى سرعة 82 كيلو
الترس التالت أقصى سرعة 120 كيلو
وأكتر من كده العربية هطلعلك لسانها ههههههههههههه
لا بس بصراحة فعلاً احيانا انا بجمع السرعات دي بكون مطر اني احرق على الغيار علشان افادي حاجة ومشاء الله على العربية تستحمل . بسم الله مشاء الله عليها .