الموضوع: دردشة في كتيب أرشادات اليارس ؟ لفقهاء التويوتا يارس

المشاركة الأصلية كتبت بواسطة me_medoo

مساء الخير جميعاً ... انا بعد عدت سنين قررت أقرء الكتاب المرمي في شنطة العربية ولقيت في قسم منو بالعربي ... وبالصور بس في حجات مقدرتش افهمها ... ايه رأيكم لو كل واحد يجيب الكتيب ارشادات مالك العربية بتاع اليارس ونقعد نزاكر سوى ...




النقطة الاولى : يعني مثلا ً في صفحة 88 من الكتاب :

بيقولك عجلة القيادة قابلة للإمالة وضبط الطول ... قم بإمالة عجلة القيادة إلى الزاوية المرغوبة ، وادفع أو أسحب عجلة القيادة لضبط طول عمود القيادة المرغوب به .

انا جربت الكلام ده لكن منفعش معاية لقيت ان الدريكسيون مبيتقربش للصدر او يتبعد عن الصدر نهائي لكن لقيت فقط بيتعلى ويتوطى ... فهل الدريكسيون بتاع اليارس اربع حركات ام حركتين فقط ... يعني بيطلع وينزل فقط ولا كمان ممكن يخش لجوى ويطلع لبرة زي العربيات الفخمة . ولا الكلام ده مش لينا للعربيات الخليجي فقط .

والله الدركسيون اعتقد انه حركتين اتنين فقط فوق وتحت

ولو حد يعرف عنده معلومة غير كدة ياريت يفيدنا

المشاركة الأصلية كتبت بواسطة me_medoo

النقطة الرابعة :

موضوع زيت العربية أي أحسن زيت أستخدمتموه .. أنا شفت موضوع زيت لوكي مولي بس مجربتهوش ... وشفت موضوع عن فافيون وكمان لسه مجربتهوش ... مين جرب الزيت ده ومين جرب الزيت التاني ... وكمان لقيت في زيت بيتباع في شارع دمشق اسمو تويوتا ... وفي كتيب العربية بيقلك بننصح بزيت تويوتا وهو صناعة امراتية يعني خليجي ... يعني الظروف الصعبة والشاقة والحرارة الي على حق . وتمنو 250 جنية ... ده غير اني لقيت زيت اسموو لكزيس كمان تابع لشركة تويوتا . فأيه رأيكم يا فقهاء اليارس مين أحسن زيت للعربية .

انا كنت بستخدم زيت موبيل 1 ... بس لمن تابعت موضوع الزيت لقيت اني في كزا موبيل 1 في السوق ... وانا كنت فاهم انو كلو موبيل ... ففتحت المنيوال بتاع العربية لقيتهم كاتبين ننصح بأستخدام ثلاث أنواع .

الاول : 20w50
الثاني :15W40
الثالث :10W30
واضاف كتيب العربية وبيقول زيت محرك متعدد الدرجات تصنيفAPI من فئة SL
''Energy-Conserving''
أو ''Energy-Conserving'' SM
أو ILSAC

ده الي مكتوب في الكتلوج ... المهم تنصحوني بايه بحيث الاقي العربية ملبن تحت رجلايا كده ونعمة وهدية وبنت حلال وشكراً ليكم ياشباب .

انا من ساعت ماجبت العربية بحط موبيل 1 وزي الفل مافيش فيه اي مشاكل

لحد اخر تغييرة دي زي الزفت بصراحة

من ساعت ماحطيته وفيه خشونة وصوت الماتور عالي نسبيا !

قلت من فلتر الهوا غيرته بفلتر رياضي برضوا لسه فيه خشونة في صوت الماتور !

مش عارف بقى ده من الزيت ولا من ايه بس ارجح من الزيت لاني اول ماحطيته بدات احس بالخشونة ودلوقتي عامل بالزيت حوالي 3000 كيلو وبفكر انزله عشان اتخنقت فعلا منه

المشاركة الأصلية كتبت بواسطة AmAAmAs

النقطة الثانية صحيحة
دور العربية
شغل من دراع الاضاءة نور التبلورة
دوس على زرار Trip
الاول :OOOO ده بتاع المسافة المقطوعة
الثاني :TRIP A ده بتاع الرحلة رقم 1
الثالث : TRIP B ده بتاع الرحلة رقم 2
الرابع بأه : ----------
-----------------------
--------------------------
الرابع دة دوس عليه ضغظة طويلة النتيجة الشرط الكتير دى هاتقل+نور التبلوة هايقل وكل ماتزود وقت الضغطة النور يقل لغاية بيبقى اضعف حاجة وبعدين يرجع اقوى حاجة تانى

معلومة جديدة بصراحة انا ماكنتش عارف الشرط الكتير دي بتعمل ايه لكن هجرب واقولكو

انا كنت عايز استفسر عن حارات الاتوماتيك ايه فايدتها و حارة 3-d نخلى عصاية الفتيس لبره والا جوة .. هل غسيل الموتور وتشحيمها عموما بياثر على حاجة فى الياريس يعنى فى حاجة اقول للراجل يخللى باله منها والا عادى وشكرا ..

شوف يا باشا بالنسة لفتيس الياريس الاتوماتيك

فهو مكون من التالي <<< قبل ده لازم تبقى عارف ان العربية 4 نقلات فقط !

P : ده يستخدم لما تيجي تركن العربية وبيفرمل العربية وبيمنعها من الحركة وطبعا المفتاح مش هيطلع من الكونتاكت الا والعربية على الوضع P

R : ده يستخدم عشان ترجع لورا ! معروفة

N : يستخدم عشان تحط العربية على المور يعني بتمور العربية " بتفصل الماتور عن العجل" بحيث لو زودت بنزين العربية ماتمشيش وفي حالة العربية وهي على المور ممكن تتزق عادي !

D: ده Drive المفروض ان طول مانت سايق يكون الفتيس على الوضع D وده بيسمحلك بالسواقة العادية مابين الغيار الاول والتاني والتالت والرابع بدون اي مشاكل

3 : ده هتلاقيه على شمال حرف D او بالاخص (D- 3) كدة المقصود انك لو وديت الفتيس للحارة الشمال هيكون على الوضع 3 ولو وديته للحارة اليمين هيكون على الوضع D مش مقصود انه ثري دي ولا حاجة

يعني انت لو حركت من ال N ونزلت لتحت كدة انت بقيت على ال D

لو وديته حركة شمال هتبقى على ال 3

طيب ال 3 ده بيعمل ايه ؟ ؟

ده بيخلي العربية ماتنقلش للغيار الرابع يعني يكتفي للغيار الثالث فقط

يعني العربية هتمشي معاك عادي جدا اول وتاني وتالت بس استووب مش هتدي الرابع !

ننزل بالفتيس تحت شوية من 3 الى 2

2 : ده يبقى العربية هتنقل معاك اول وتاني فقط ! مش هتدي لا التالت ولا الرابع

L : يبقى العربية هتفضل على الغيار الاول فقط !

طيب امتى نستخدم L ,2 ,3

دول تستخدمهم عموما لما تبقى محتاج عزم قوي او تسارع قوي للعربية واكنك بالظبط قلبت العربية مانويل لو هتحول الفتيس الى L يبقى لازم بعدها تنقل بايدك الى 2 ثم الى 3 ثم الى D عشان لو مانقلتش هتحرق الفتيس والعربية هتجيب وش سلندر ! !

ايووووووة حصلت مع واحد زميلي كان طالع على الصحراوي وميعرفش انه المفروض يسوق على ال D وسايب العربية على وضع 3 ! !

وفضلت العربية على الغيار التالت مانت مش سامحلها انها تروح للغيار الرابع

وبعدين ! ! التالت في الياريس اخره 160 ! بعد كدة هتبدا تدخل في الريد زون والماتور يفصل ولازم ياما تخف السرعة ياما تحول الفتيس على ال D عشان تروح على الرابع !

المعلم سايب العربية ودايس ! والماتور عمال يفصل منه وهو مش واخد باله ! اللمبة اللى المفروض لونها بيبقى اخضر وعليها Cool قلبت احمر ! وطلعلته لمبة الحرارة وهووب العربية جابت جوان وش سلندر ! !

يعني بإختصار انت كسواقة عادية خليك على ال D

حبيت تجري وتشد ممكن تسقط نقلات وتحول العربية على المانويل بس تخلي بالك من ال RPM مايدخلش منك في الاحمر عشان انت قلبت العربية مانويل ! ! فلازم تنقل بنفسك

برضوا عشان الغيارات دي بتدي عزم قوي للعربية فبينصح انها تستخدم في المطالع الجامدة

وفي نفس الوقت ممكن تعزز بيها ثبات العربية ! ! ازاي ؟ ؟

مثلا كنت من حوالي اسبوعين راجع من طريق الواحات وداخل على ملف على سرعة 140 ! حسيت العربية خفت مني خاصا ان كان المفروض اخد الملف في حارتي عشان فيه عربيتين على يميني وشمالي

رحت محول الفتيس ال 3 ! كدة انا سقطت تالت طبعا ماينفعش احوله الى 2 وانا ماشي على 140 ! كدة انا بحرق الماتور !

العربية كلبشت والعزم اداها ثبات وخدت الملف بدون مشاكل ! !

انت جرب بنفسك خليك مثلا ماشي في شارع على سرعة 60 على سبيل المثال وبعدين سيب رجلك من على البنزين وحرك الفتيس من ال D الى 2

دوس بعدها بنزين وسيب رجلك من على البنزين بص على ال RPM هتلاقي لسه عالي ! مانت محولها مانويل ! !

دوس بعدها بنزين تاني واستمتع باقوى عزم للعربية ! ! بس ماتنساش تنقل بعدها ل 3 ثم D

ويفضل لو انت مالكش في الجري والحرق يبقى تخليك علطول على ال D ولما تحب تتجاوز عربية تقل رجلك على البنزين حبتين وده انسب حل عشان تحافظ على العمر الافتراضي بتاع الفتيس وزيت الجير بوكس

المشاركة الأصلية كتبت بواسطة me_medoo

في صفحة 117 من دليل اليارس :
بيقولك ياسيدي ناقل الحركة التلقائي في سيارتك مجهز بنظام قفل تحويل لتقليل احتمالات التشغيل الخاطئ . هذا يعني أنه يمكنك تحريك الذراع ناقل الحركة خارج وضع الانتظار p فقط عندما تكون دواسة الفرملة مضغوطة والمحرك يعمل .

P: وضع الانتظار بدء تشغيل المحرك ونزع المفتاح
R : الرجوع للخلف .
D : وضع القيادة العادية (تحويل الى وضع السرعة الزائدة ممكن )
3 : فرملة المحرك (التحويل الى وضع السرعة الزائدة غير ممكن ).
2 : فرملة المحرك أقوى .
L: فرملة للمحرك قصوى .

أيه بأه ياسيدي حكاية فرملة المحرك دي ... يعني بيتقلك حركة المتور وبالذات لمن تكون نازل نزلة زي بتاعت جبل المقطم كده او مثلا لورحت الاردن او لبنان او حتى في السعودية حته اسمها حقل في الشمال ... وفي حته اسمها المجمعه كده قرب الرياض ... دي حتت بتلاقي الشارع منزل منزل يعني العربية بتجري منك لوحدها فعلشان متحرقش الفرامل فبتحط الثري او التو واذا كان المنزل جامد قوووي ومنحدر بتحط على حرف الال .

وتقريباً انو بيخلي العربية تمشي على التيرس او الغيار رقم 3 والاثنين كزالك بيخلي العربية كأنها ماشية على التاني .

لكن ملحوظة هنا في صفحة 119 :
بيقلك اقصى سرعة تقدر تمشي فيها على 2 لغاية سرعة 99 كيلو
وال ''L'' أقصى سرعة تمشي فيها عليها 54 كيلو .

وبالنسبة لل D 3 بيقلك استخدمهم عند صعود تل أو عند القطر الشاق يعني بتقطر عربية .

واللهي الناس دي محترمة جداً حتى كاتبلك هنا في صفحة 120 بيقلك السرعات بالنسبة للمنوال متزودش عنها بيقلك :
الترس الاول أقصى حاجة 44 كيلو

يفضل عدم استخدام ال L لكن الاول عموما اخره 55 او 60 !

الترس التاني أقصى سرعة 82 كيلو

ده اخره 100 بالظبط من غير ماتدخل في الاحمر ! ومرة جبت 110 عليه بس دخلت سيكا في الاحمر ونقلت عند 7 !

Toyota Yaris Acceleration 0-100 1.3 L 11sec ! - YouTube

بص هنا هتلاقيني جايب 110 على التاني بس ال RPM كان دخل في الاحمر

الترس التالت أقصى سرعة 120 كيلو

يا كبير 120 ده انت لسه يدوب بتقول يا هادي في بداية الترس التالت ! !

اخره 155 يا كبير ! ومرة جبت 160 عليه على الصحراوي والعربية ماكنتش دخلت في الاحمر

Toyota Yaris 1.3 L vs Lancer 1.6 CVT Drag Race - YouTube

بص في الفيديو عند الثانية 1:16 هتلاقي العربية نقلت من التالت للرابع ركز مع العداد هتلاقيه عند 155 - 160 تقريبا ! مع اني كنت مديها ال D من مدة ! يعني لو كنت سبتها على ال 3 كان ممكن اجيب اكتر من كدة على التالت

وأكتر من كده العربية هطلعلك لسانها ههههههههههههه

لاء مش هتطلع لسانها ولا حاجة طالما مادخلتش في الاحمر ! ولو دخلت في الاحمر الماتور هيفصل منك وتلحقه بنقلة على السريع والا هيبدا يحصل معاك مشاكل

لا بس بصراحة فعلاً احيانا انا بجمع السرعات دي بكون مطر اني احرق على الغيار علشان افادي حاجة ومشاء الله على العربية تستحمل . بسم الله مشاء الله عليها .