رينو فلونس او هيونداي النترا

**Ahmed Selim** · 19-03-2012 03:42 PM

المشاركة الأصلية كتبت بواسطة devil_storm

باشا العربية بيكون معروف اصلها بغض النظر هى اتقفلت فين و عليها علامة اية
حديك امثاله علشان ميضحكش عليك:

الاكسنت كورى رغم انها متقفلة فى مصر
المرسيدس و ال bmw المانى رغم انهم متقفلين فى مصر
التويوتا يبانى رغم انها متقفلة فى كوريا او جنوب افريقيا
اللوجان رومانى من مصنع داتشيا رغم انها متقفلة فى المغرب و عليها علامة رينو
الفلوينس كورى من مصنع سامسونج رغم انها متقفلة فى تركيا و عليها علامة رينو
الكروز و الاوبترا كورى من مصنع دايو رغم ان عليهم علامة شيفرولية

الخلاصة سيبك من العلامة اللى على العربية و اعرف اصل العربية و متخليش حد يضحك عليك

الرينو الفلوينس هى samsung sm3 الكوريا
ذى ما الشيفرولية كروز هى دايو لاسيتى الكوريا.

فلو كانت الكروز امريكى من شيفرولية مش كورى سعتها نبقى نقول الفلوينس اوربى من رينو مش كورى

بص كدة الاوبترا بتسوق فى امريكا على انها suzuki forenza و عليها علامة سوذوكى هل ده معناها انها يابانى؟؟؟ و تسوق فى مصر على انها شيفرولية هل ده معناها انها امريكى؟؟؟

بص كدة على الصور دى و انت تفهم قصدى و ميضحكش عليك:

فى الصورة الجاية الاوبترا عليها علامة سوذوكى فهل ده معناها انها يابانى؟؟؟ و فى مصر عليها علامة شيفرولية فهل ده معناها انها امريكى؟؟؟

طيب و أيه المشكلة فى كده ؟؟؟؟؟

مجموعة شركات واحدة و بتتبادل مع بعض بعض الأجزاء........و دي حاجة طبيعية و لازم تحصل.....لأن لو محصلتش يبقى فيه مشكلة.

نفس القصة بتحصل مع مجموعة gm و مع كريسلر و مرسيدس قبل كده و مع فولكس جروب.

و دلوقتى فرضاً جدلاً كده أن الفليونس هى هى السامسونج.....مش مبنيه على شاسيه سامسونج.....مع أن الفرق كبير بين الأتنين.

أيه المشكلة فى عربية كورى ؟؟؟

هى الإلنترا مش كورى برضه ؟

بص يا زعيم......أنا غير أنى معايا ميجان.......أنا سوقت قبل كده رينو سافران موديل 2007 و دى عربية أكبر من الميجان و الفليونس بشويتين كده..........العربية كانت عبارة عن عربية سامسونج فعلياً مش مجرد مبنية عليها.........و هتلاقى فى قسم رينو تقرير أنا اللى عامله عن العربية دى و شوف رأيي فيها عامل أيه.........العربية مش عاجبانى و قولت كده...........عادى.

بس الفليونس لأ.......الفليونس مش كورى.........و السافران الجديدة برضه مش كورى.

**DarkMagician** · 19-03-2012 04:58 PM

المشاركة الأصلية كتبت بواسطة horas3000

لا يا زعيم اسمحلي اصحح معلوماتك

الرينو فلوينس اللي بتنزل مصر ملهاش علاقه بكوريا لا من قريب و لا بعيد
العربيه مبنيه كليا علي الميجان 3 و بتستخدم نفس المواتير و الجير و الشاسيه لكن الفرق الوحيد ان الميجان بتتجمع في فرنسا و الفلوينس في تركيا و برضه بتتجمع في الارجنين و الهند
و علي حد علمي كمان الفلوينس ZE اللي هي ال Hybird من الفلونس بتتجمع في فرنسا

اما السامسونج اللي انت بتقول عليها دي فدي مختلفه عن اللي بتيجي لينا في مصر و هي دي اللي بتنزل في الاسواق الخليجيه (تحت اسم رينو برضه) و دي بقي متورها و فتيسها من نيسان و هما عملوا الحركه لملائمه مواتير النيسان للاجواء الحاره اللي في الخليج و استراليا (اللي برضه السامسونج بتنزلهم تحت اسم رينو)

و لعلمك الفلوينس
و الليله اللي فاتت دي كلها عشان شركات رينو و نسيان و سامسونج ضمن اتحاد مع بعض من خلاله بيتابدلوا قواعد العجلات و المحركات و خلافه

و علي فكره
اعتقد ان معظم الاعضاء اللي كلموك بحده شويه ده نتيجه للتحيز الواضح من حضرتك للالنترا
و كمان بتقول انك مش من ملاكها و حتي موضحتش اذا كنت جربتها ولا لا عشان نعرف سر اعجابك الشديد بيها

في الاخر خليك عارف ان ده كله صاج
و ان جيت للحق سواء الالنترا او الفلوينس دول اول حاجه في العربيات و في حاجات اشد و اسخم منهم بمرااااحل و لو شفتهم و ركبتهم مش هتبص اصلا ناحيه اي من العربيتين دول
و الكلام ده مش موجه ليك بشكل خاص لكن لكل الناس اللي بتتحيز بشكل اعمي لعربياتها

رد عالمييييييييييييي
بالذات اخر سطرين مزيكوني

**devil_storm** · 19-03-2012 05:28 PM

المشاركة الأصلية كتبت بواسطة invensys2011

بس النترا الفولي لوديد ب 160.000 الف جنيه و نفس كماليات الفلونس اللي ب 142.000
في فرق سعر مبالغ فيه

انت عندك حق ... هو سعر الالنترا الفولى لودد مبالغ فى جدا جدا و ده اللى بيخلينى اوقات بقول الفلوينس افضل علشان تستاهل ثمنها, بس معتقدش ان الفلوينس اللى بى 142 الف فيها نفس كماليات الالنترا الفولى لودد!! يعنى هل الفلوينس اللى 142 الف فيها فرش جلد؟؟ او فتحة سقف؟؟
بس للامانة سعر الفلوينس تحفة و دى ميزة كبيرة لصالحها... و فى نفس الوقت سعر الالنترا مبالغ فيه, انا مقتنع بالفلوينس جدا و سعرها على امكانيتها تحفة انا بس بعترض على التعليقات اللى ذى عيب تقارن الالنترا بالفلوينس و عيب تقارن كورى باوربى و...و ...

**sadkoooi** · 19-03-2012 10:42 PM

نفسى افهم الناس اللى بتقول ان الالنترا وحشة اكيد بيتكلموا عن 128 العربية معايا بعد لف وعذاب فى السوق المصرى وباجماع كل الناس اللى بتاجر فى العربيات واللى بيفهموا فيها ماجدش يركب لا رينو ولا بيجو الجديد ولا ستروين افشل سيارات فى مصر

**mohamedkordy** · 20-03-2012 12:03 AM

المشاركة الأصلية كتبت بواسطة sadkoooi

نفسى افهم الناس اللى بتقول ان الالنترا وحشة اكيد بيتكلموا عن 128 العربية معايا بعد لف وعذاب فى السوق المصرى وباجماع كل الناس اللى بتاجر فى العربيات واللى بيفهموا فيها ماجدش يركب لا رينو ولا بيجو الجديد ولا ستروين افشل سيارات فى مصر

افشل ايه ؟؟؟؟؟؟؟؟؟؟ ههههههههه. بكره تشوف يا حبى

**Dawns_Mist** · 20-03-2012 01:59 AM

المشاركة الأصلية كتبت بواسطة devil_storm

... انا بس بعترض على التعليقات اللى ذى عيب تقارن الالنترا بالفلوينس و عيب تقارن كورى باوربى و...و ...

خلينا ندردش مع بعض بعيدا عن الفليوانس و الإلنترا ..
أنا كواحد مش بيفهم في البرمجة ، لما بشوف إبداعات أوراكل و مايكروسوفت في عالم البرمجيات .. و إن هما أول ناس تعمل أنظمة كذا و كذا و و و و إن ليهم تاريخ و حاجات كتير من دي ... طبيعي جدا إني مستحيل أحط على اللاب توب بتاعي نظام تشغيل غير مايكون من إنتاج مايكروسوفت ، و الداتا بيز بتاعت الشركة بتاعتي مستحيل أعملها بحاجة تانية غير أنظمة أوراكل ........ و حتى لو أنا فاهم في البرمجيات كويس .. لما الشركات العملاقة دي تنزل أي برنامج تافه ، لازم أخاف منه و أعمله ألف حساب .

ده شيء طبيعي جدا ....
هو تاريخ الكوريين في عالم السيارات كام سنة ؟؟
هما أصلا أنتجوا كام موديل في تاريخ حياتهم ؟؟
هما عمرهم اخترعوا نوعية جديدة من المواتير أو أنظمة الحقن أو أنظمة الفرامل أو أنظمة الثبات أو ثورة جديدة في عالم قواعد العجل أو أنظمة الجر و الدفع أو أي حاجة ميكانيكية عمرهم اخترعوها ؟؟
ده حتى الكماليات و الرفاهية عمرنا ما سمعنا إنهم أول من يعمل أي حاجة فيها ... يعني مثلا العربية اللي بتركن لوحدها دي على حد معلوماتي تقريبا و الله أعلم كانت ليكزس أول حاجة يعني ياباني ، أما نظام الآي بي إس فده لمرسيدس يعني ألماني ... و هكذا .......
الكوريين دول بقى علميا كده .. وزنهم إيه ؟؟
عملوا إيه في حياتهم غير إنهم ياخدوا فتات جينرال موتورز أو يعملوا اتفاقيات مع بعض الشركات الأوروبية و اليابانية علشان يشتروا منهم حق الانتفاع بالابتكارات الجديدة و يعيدوا تصنيعها .. و ولو كانوا مرة عملوا حاجة .. فهما عملوها كام مرة ، و مدى قيمة اللي هما ابتكروه ؟؟؟
يعني لما أقولك إن شركة رينو دي مثلا عملت سوبر اسبورت كار بتوصل من سرعة 0 إلى 100 كم في أقل من 3 ثواني و بتفرمل بمنتهى الاتزان من 100 كم إلى 0 في أقل برضه من 3 ثواني ..... فلازم نسأل سؤال منطقي جدا .. هي بقى شركة هيونداي دي عملت إيه في حياتها ؟؟؟
أعتقد أقصى ابتكار وصلوله هو العربية 2010 جينيسيس اللي أقل شركة أوروبي أو ياباني عملتها من زمن الزمن ... اللي هما فرحانين أول إنها بتطلع تقريبا 400 حصان من 4500 سي سي .. مع إن فيه شركات أوروبية إحنا لسه ماسمعناش عنها في مصر عملت موتور 6000 سي سي بيطلع 1000 حصان .
أنا مهندس ميكانيكا .. و على قد حالي يادوب عرفت اشتري لانسر بالعافية و مش بقول إنها أحسن عربية ، لكني بحاول أتعلم في الميكانيكا على قد ماقدر ... و عندنا كمهندسين دايما بنقول على الكوريين و الصينيين دول في مجال الميكنة إنهم تلاميذ و عمرهم ماحاولوا يبقوا أساتذه .. ليه ؟ لإنهم كده مستريحيين بيكسبوا فلوس كتير و زي الفل .. لكن علميا مالهوش عندنا وزن ...

فالطبيعي اللي يحصل عند أي حد فاهم كان أو مش فاهم في العربيات إنه لما يشوف عربية عليها ماركة رينو و عربية عليها ماركة هيونداي .... لازم يتشد للرينو أكتر .. حتى لو كانت الهيونداي دي أحسن منها مليون مرة .. لكن هو على المستوى النفسي مقفول من ناحية هيونداي لإنه لما بيشوف منهم خطوة بيكون الرينو سبقتها بـ 100 خطوة ...

أنا ممكن أشتري كوري و أكون فرحان بيه .. و ممكن أجيب عربيتين من نفس الفئة و أقول الكوري دي أحسن من الأوروبي أو الياباني أو الأمريكي دي ....... لكن ... يفضل على المستوى العلمي الأوربي ليه وزنه المعروف و الياباني و الأمريكي و الكوري ... كل واحد محتفظ بوزنه و قيمته و ماينفعش تساوي أي حد فيهم بالتاني ....

بعيدا عن تقييم إلنترا أو فليوانس ...... انت بتقول إنك مضايق من اللي بيقول إن الأوروببين أحسن من الكوريين و ماينفعش تقارن ده بده ...... دلوقتي انت اللي مطالب إنك تثبتلنا الكلام ده ... هاتلي أي دليل يقول إن الكوريين أحسن من الأوروبيين في أي حاجة في الميكنه .. أو على الأقل اللي يثبت إن دول زي دول بحيث إن منتهاهم العلمي زي بعض.

**Dawns_Mist** · 20-03-2012 02:36 AM

عفوا في مشاركتي الأخيرة .. تعديل .. الشركة اللي عملت السوبر سبورت كار كانت سيتروين اللي ناس متير بتستهزأ بيها .. ماكانتش رينو .. تعديل بسيط معلش كنت بتكلم و انا مستعجل..

**abdulkhaleq** · 20-03-2012 02:39 PM

السلام عليكم ورحمة الله وبركاته
متابع مع حضراتكم النقاش البناء
وعشان كده فكرت انقل موضوع انا كنت كاتبه بناء على رأيي الشخصي في منتدى تاني
وأرجو ماحدش يزعل من أسلوبي الساخر, رأيي مش ملزم لأي حد ياخد بيه او يسيبه
.................................................. ..............................................

المختصر المفيد في الإلانترا الجديد
هذا الموضوع بناء على خبره شخصيه من اليومين اللي فاتو دول
وده بسبب ان احد اصدقائي (اتهف) في عقله وقرر انه يشتري العربيه الفاشله دي
وبعد محاولات مستميته لاثنائه عن القرار الفاشل ده
فضلت اني ابحث في السوق اكتر عنها يمكن نقدر نجيبله الفئه ال fully loaded
بدل ما ينضحك عليه اكتر ما هيتضحك عليه إن شاء الله

وجدنا الاتي
طبعا زي ماهو معروف العربيه وكيل و خليجي
سوق الهيونداي بيعمل ايه في مصر (غير انه مقرطس الناس بعربيه فيها حوالي 60 الف جنيه زياده على اللي تستحقه) ؟؟
اعتمد على جهل الشعب للأسف وعلى انهم بيشترو عمياني وآخر اللي يعرفوا يفرقوا فيه الفتيس أوتو ولا مانيوال
ماعلينا انا لو تاجر وعندي المستهلكين اللقطه دول اكيد كنت هقرطسهم برضه

أولا
الموتور ال gdi ماشوفتوش ولا في الخليجي ولا في المصري
الاتنين نازلين بموتور mpi عادي

ثانيا
العربيه ال fully loaded المفروض يكون فيها بلوتوث وكروز كنترول
و نافيجيشن سيستم
لكن طبعا لا الخليجي فيها ولا الوكيل فيها

ثالثا
ودي بقى مفاجأه لوز الجوز
العربيه فرامل ديسكات قدام بس حتى في أعلى فئه في الخليجي والمصري
ولما كنت بسأل عن الموضوع ده اكتشفت ان مش بس المستهلكين اللي مش عارفين لأ ده حتى البياعين
والله العظيم جالي احساس انني بشتري خروف العيد وبكلم واحد جزار
والله حتى في غبور نفسه لما سألنا عن الموضوع ده طبعا الباشا حب (يتفزلك)
تخيلوا يرد يقول ايه ؟؟؟؟
قاللي
(اصل العربيه دي طويله ولو فيها ديسكات ورا وجيت تفرمل العربيه هتعوم منك)
بصراحه ماقدرتش استحمل وضحكت في وشه وحسيت للحظه ان الناس فعلا بتحب اللي يشتغلها
على اساس اننا ماركبناش عربيات ومستنيين مهندس ناسا قصدي غبور ده يكشفلنا المفاجأه اللولبيه دي

(على فكره موضوع الفرامل ده مش هزار, لما تكون العربيه ديسكات قدام وورا زي معظم العربيات الجديده بتكون الفرامل اقوى بكتير من لما تكون ديسكات قدام بس)

اه نسيت اقولكم ان انظمة الامان الخرافيه فيها abs بس
ومش في كل الفئات كمان يعني اللي ب 135 تقريبا او ب 140 مافيهاش مش فاكر بالظبط
يعني مافيهاش أي انظمة تحكم خالص epd, مثلا يعني مافيش
رابعا
العربيه بلاستيك
والله خامات رديئه جدا جدا ومفيش أي اوبشن يذكر ولا حتى سيفتي بس كتر خيرهم فيها اير باج واحد يعني الناس هتقطع نفسها ؟؟
واللعبه دي بكام بقى ؟؟ بحوالي 160 تنقص الف في بعض الاحيان لو هتدفع كاش

فكرة السوق عندنا هنا إيه ؟؟
زي فيلم الكيف كده
(ننزلها شعبي ولما يبقالها سوق نغليها)
ومش كده وبس استنوا مفاجئات قطع الغيار ان شاء الله

مع العلم ان العربيه ال fully loaded انا شفتها فعلا ماشيه في الشارع
لكن ماعرفش صاحبها جابها منين او موجوده عند مين هنا في مصر
ولا زال صديقي يبحث عن هذه السياره ولا زلت شايف ان اخرها 100 ألف للكامله بجد مش الكامله اللي بيقرطسوا الناس بيها

(اضافه للموضوع بعد كتابته, الحمد لله صديقي اتعالج نفسيا وجاب بنفس المبلغ جيتا 2010 كانت ماشيه 20 ألف وهي فئه أعلى من الهاي لاين كانت بتنزل بالطلب وكان اسمها كمفورت)

وكمان في اثناء البحث عن المدعوه هيونداي الانترا اللي كام شهر وهتبقى تاكسي زيها زي الفيرنا لقيت حد بيبيع اللي بموتور gdi بس منغير فتحة سقف وديسكات قدام وورا
والسعر
حزروا فزرو
175 ألف جنيه
كل جنيه ينطح اللي قبله

ولا عزاء لبلد الفهلوه والاشاعات

-

الموضوع: رينو فلونس او هيونداي النترا

LinkBack

أدوات الموضوع

عرض

-

-

-

المواضيع المتشابهه

رينو فلونس ام بيجو408

رينو فلونس ولا بيجو 408

رينو فلونس و لا النترا و لا ايه؟

رينو فلونس او هيونداي النترا

رينو فلونس او هيونداي النترا

الكلمات الدلالية لهذا الموضوع

المفضلات

المفضلات

ضوابط المشاركة