الموضوع: محتار بين فيرنا او لانوس او لوجان

هو كلام ساعتك معقول ... من ناحية أذا خليتك في الجديد علشان أمان ... ولرغم أن الامان برب العالمين ... لأن حتى العربيات الجديدة أحتمال تكون مخبوطة قبل كده أو أتقلبت من على الونش وهيا جية من المينا ويقوم مصلحينها ويالله أقلب ... وبيع يا وديع ... والي يشهد على كلامي انزل الحرفين واتفرج عربيات لسه بورقتها وبتتصلح علشان تتباع .

بس عامة انا أشتريت اللوجن ولقيت فيها حبت عيوب حبة صغيرة ... قد كدهوو علشان محدش يزعل ياريت تبقى تتطلع على الموضوع الي كتبو ... وعلى فكرة هنا في مصر هتلاقي الي عندو لانوس يبقى نفسو يخلي كل الناس تشتري لانوس زيو ... والي عندو فيرنا بيبقى نفس كل الناس تشتري زيوو ويبقى شارع مصر كلو فيرنا ... كزالك الي عندو لوجن بيبقى نفسو كل الناس تشتري لوجن ويبقى الشارع كلو لوجن في لوجن ويفرح قوووي لأنو لقى عربيات الاتاري نزلت لوجن هههههههههه ... ورغم انو أحياناً يبقى موقن ان العربية نازلة في التوكيل معيوبة بس يقنع نفسو وغيرو انها عربية ممتازة ... وعاوز كل الناس تدبس زيو ...

انا لاحظت مع احترامي للعربية اللوجن ك أنها واحد غير ثابته نهائي ... بس في ناس قالو عليها دي طيارة .
حرارة طالعة من تحت التابلوة ... بتسخن الكبينة ... والمتريل بتعها مش قد كده ... بالنسبة للجودة هيا من جواها شوية بلاستيكات ... ده غير أزعاج المتور بعكس العربيات الكوري ونعمتو ... البور يكاد يكون معدوم يعني كده وكده ... تيل الفرامل بيخلص بسرعة قوي 10.000 كيلو وكده ... مسحات العربية مبتمسحش كل قزاز العربية وتعبانين ... يعني في المطرة كان الله في العون ... نوعية الكوتش بتعها بيلملك كل فتفوتت طوب وزلط وطول مانتا ماشي تك تك تك تك ... لأنو مصمم للتلج ، حتى قزازها مصنوع من النوعية رديئة ...
غير كده مميزتها تكيفها بأمانة قوي قوي وجبار ... ولو قدرت تشغلو على واحد يبقى انتا جدع ... عربية عائلية ووسعة ... وشنطتها توازي شنطة المارسيدس ... ولمسة رينو ونيسان عليها وبصامتهم واضحين . وفكر أنتا كده وأختار وربنا يوفقك ... أهم حاجة صلي صلاة أستخارة ... ووقت ماتنوي متخدش برأي حد غير نفسك ... أكتر عربية عجباك .داخلياً
وياريت حد كمان يتفضل ويذكر عيوب ومميزات الانوس والفيرنا بالتفصيل ... لأن حرام دي فلوس بتدفع شقى عمـــــر الواحد . ومش كل يوم الواحد هيشتري عربية . وربنا يوفقك يارب .

المشاركة الأصلية كتبت بواسطة _hema

اخى الكريم

السلام عليكم ورحمه الله وبركاته

المبلغ اللى مع حضرتك ممكن تجيب بيه نيسان صنى 2012 تدفعهم مقدم لسياره وتقسط الباقى لو عند استطاعه للتقسيط

لان حضرتك اكيد تعبان فى الفلوس فمش هينفع ترميهم فى عربيه وخلاص
واتمنى ان يهديك الله تعالى الى الرأى الصواب

لك كل الود

1111111+
وعلى فكرة انا مش من هوات النيسان ... بس بصراحة النيسان حتى لو كانت مستعملة برقبت الجديد (لانوس فيرنا لوجن) من حيث الجودة والمتريل ... وكفاية أنها يباني ... حتى لو كانت تقفيل مصري ... الركوبة تختلف ياخي ... عمر الافتراضي لقطع الغيار يختلف ... عربية محترمة ... وبرستيج ... وعملية .

المشاركة الأصلية كتبت بواسطة me_medoo

حبيب قلبي ... أنتا مشاء الله عليك حاطط أربع أختيارات وكلهم أوحش من بعض انا جربت العربيات الي دي كلهم وخدتهم من التوكيل يعني زيرو ... ومع أحترامي للعربيات دي ولمالكيها ... دي عربيات انا بسميها
عربيات على ماتفرج ...

طيب هتقولي أعمل أيه : هقولك المبلغ الي معاك ممكن تجيب عربية نيسان صني مستعملة موديل حديث 2010 او 2009 .
ممكن تجيب عربية تويوتا يارس 2008 او 2009 .
ممكن تجيب ديهاتسو سيريون 2009 او 2010 وأتوماتيك كمان.
ممكن تجبلك عربية رينو ميجان حاجة نضيفة كده .ويانوراما كمان .
وممكن تجبلك عربية افايو كسر زيرو كمان لو حبيت .

العربيات دي حتى لو كانت مستعملة فهي برقبت العربيات الحديثة من حيث الركوبة والصلابة وتوفر قطع الغيار ... ومن حيث الوسع الداخلي والسحب بتاعها ... ومش لازم تاخود وش القفص زي مابيقولوا ... وأفرح بأكياسها .. والاستيكر الي عليها ... أهم حاجة تاخود عربية نضيفة ... وكويسة ... ألله هو أنتا هتعيش كام يوم ... ولا نتا هتشتري كل يوم ... دي هيا كل فين وفين لمن تفكر تشتري عربية .

والمثل بيقول ان سرقت اسرق جمل وأن عشقت أعشق قمر وأن ركبت أركب همــــــــــــــر ... وتحياتي .

مع احترامى لكلام حضرتك ..والدى معاه صنى 2008 EX Saloon ..اللوجان اوسع منها بمراحل وموفرة عنها فى البنزين ..بس كشكل داخلى وخارجى ..مافيش مقارنة ..الصنى تكسب طبعا
واتنين اصحابى معاهم الميجان من اجمل العربيات اللى ركبتها فى حياتى ثبات وسرعة وامكانيات ورفاهية تبهرك لكن اصحابى دول واحد منهم باعها واشترى لانسر بومة( اللى شايفها اقل من الميجان )والتانى عمل مشكلة مع والده عشان يبيعها ووالده مش راضى ..الميجان اكتر عربية باشوفها بتعطل فى العربيات الحديثة وغير كدة معقدة والعطل فيها بيكلف مبلغ محترم ودا سر نزول تمنها مستعملة ل 50 الف واتوماتيك كمان ...ابعد عن العربية دى خالص لاننا لما رحنا التوكيل قابلنا اصحاب العربية دى صدفة وبردو اشتكوا من كتر اعطالها ..وتقريبا فيها عيب تصنيع والله اعلم
الافيو ...بردو شايف ان مقارنتها باللوجان مش لصالحها واللوجان احسن منها بكتير وسع وثبات
وبالنسبة للخامات نفس الخامات بالظبط وعيوب الصناعة فى الافيو حدث ولا حرج وتوكيل حراااااااامى
ودايما يطلع العيب فيك مش فى العربية

انا اتكلمت عن الانواع اللى جربتها فقط ...بكل حيادية لانى اصلا معايا نوبيرا :)
ولو عايزين نتكلم بأمانة فأى عربية تقفيل مصرى عمرها ماهتكون زى العربيات المستوردة ..خامات النوبيرا اللى معايا دى انضف بكتير من خامات الصنى اللى مع والدى مع ان الفرق بينهم 11 سنة ..النوبيرا مو1997 كورى والصنى مو 2008 تقفيل مصرى
وحاسس ان الشركات المصنعة اول مابتعرف ان اجزاء العربية رايحة لمصر بيبعتولنا اسوأ الخامات
يعنى من الاخر كل العربيات اللى فى الرينج دا هتلاقى التابلوه بتاعها بلاستيك لو دقيت عليه بشاكوش يتكسر عكس المستورد اللى تحس ان التابلوه لين او مطاطى شوية
وبردو حضرتك شوف الانواع اللى نفسك تشتريها بنفسك واقعد جواها كدة وقارن بين خاماتها وشوف القاعدة مريحة ولا لأ وزوايا العربية هاتريحك فى السواقة ولا لأ
ولو فكرت فى مستعمل فزى ما الاستاذ me_medoo قال .. لو لاقيت تويوتا ياريس نضيفة اشتريها وانت متطمن وبردو عن تجربة :)

المشاركة الأصلية كتبت بواسطة me_medoo

وعلى فكرة هنا في مصر هتلاقي الي عندو لانوس يبقى نفسو يخلي كل الناس تشتري لانوس زيو ... والي عندو فيرنا بيبقى نفس كل الناس تشتري زيوو ويبقى شارع مصر كلو فيرنا ... كزالك الي عندو لوجن بيبقى نفسو كل الناس تشتري لوجن ويبقى الشارع كلو لوجن في لوجن ويفرح قوووي لأنو لقى عربيات الاتاري نزلت لوجن هههههههههه ... ورغم انو أحياناً يبقى موقن ان العربية نازلة في التوكيل معيوبة بس يقنع نفسو وغيرو انها عربية ممتازة ... وعاوز كل الناس تدبس زيو .

ههههههههههههههههه كلام مظبوط على فكرة وعشان كدة ماتعتمدش اوى على كلام حد يمتلك العربية لانك هتلاقيه حاببها اوى ومخليها احلى من البى ام او كارهها اوى ومنزلها تحت فئة العربيات الكارو
وبالنسبة لعيوب اللوجان فمافيش عيب شفته فى اللوجان اللى باتكلم عليها غير حتة التيل دا وماعرفش انه عيب صناعة لكن باحسب عشان اصحاب العربية بيستخدموا الفرامل بعنف
لكن فعلا التيل ماقعدش كتير والباور بتاعها اتقل من العربيات التانية بس بردو تبقى تجربه بنفسك والعربية دايرة

كلامك سليم جداً وانا بأيدوو 11111111+
وهتلاقي شيء أحسن من شيء ... وهتلاقي حتى نيسان صني خليجي ... موجودة في السوق ... وواللهي لعظيم لولة اني متعود على الشنطة كنت جبت سيريون 2009 وهتلاقيها كمان ممكن 1500 glx وبالسعر دهو
وعن كماليات حدث ولا حرج وعن جودة تكسب ... وحتى وهيا مستعملة
بتلاقيها واقفه على حيلها فرس ... ومفيش عربية خالية من العيوب ... بس في عيوب تقدر تبلعها وتتغاضى عنها لأن العربية مكيفاك وشايف نفسك فيها ... وفي عيوب بسيطة لايمكن التغاضي عنها لأن اساساً اساساً العربية مش مكيفاك ... وفي عيوب لا تغتفر في العربية حتى لو كانت العربية عجباك ... فبتطر تبيعها حتى لو على رقبتك هبعها يعني هبعها .