الموضوع: محتار بين فيرنا او لانوس او لوجان

المشاركة الأصلية كتبت بواسطة car's sniper

انا جربت الفيرنا واللانوس واللوجان
الفيرنا واللانوس يخسروا جامد قصاد اللوجان
شوف متطلبات الاسرة المصرية للعربية ايه هتلاقيها فى اللوجان
واسعة جداا عالية جدا جدا ومع ذلك ثابتة جداااااااااااا..خدت بيها غرزة مش سهلة على 140 وكنت مستنيها تفلت منى بس لاقيتها ماسكة نفسها مع انى مابثقش فى اى عربيةعالية عن الارض فى السرعات العالية بس العربية دى غيرت تفكيرى خالص
عفشة نضيفة وقطع غيار ماقدرش افيدك لان كل اللى جابها مازال فى فترة صيانة التوكيل بتاعها
التوكيل بقى ..هاتنبهر لما تدخله حاتحس انك داخل توكيل مرسيدس ..بى ام حاجة كدة مش توكيل عربية ب 70 الف خالص
نضيف جدا جوة وبيهتم فعلا براحتك وغير كدة مابعد الصيانة بيتصل بيك ويتابع معاك لو واجهتك مشكلة
عيب العربية الوحيد ان شكلها مش عاجبنى خالص وخطوطها وحشة جداا والفيرنا او اللانوس احسن منها بكتييير (ودى مسألة اذواق )
وفعلا صوت ماتورها مش صوت عربية موديل 2010 بس مش عالى اوى ..
وعيبها من جوة مش عيب تقفيل لأ ممكن تقول عليه افتقاد للذكاء مش اكتر ..يعنى لما قارنتها بالنوبيرا حسيت ان الزراير والامكانيات فى النوبيرا اذكى بكتير من اللوجان
يعنى مثلا فى اللوجان راميين زراير الازاز الورانى ورا دراع فرامل اليد !! وطبعا دى حركة غبية لان كل اللى بيقعد ورا حاطط رجله عليهم
والحاجة الوحيدة اللى حسيت فيها بعيب تقفيل هو الكاسيت اللى تحس انه مش مظبوط فى مكانه او فيه حاجة غلط
عموما مشاكل اللوجان ممكن حضرتك تشوفها بنفسك فى اى معرض عربيات ..تفتح العربية من جوةوتفصصها حتة حتة
اما بخصوص الحاجات اللى محتاجة تجربة العربية برا المعرض فباطمنك من ناحيتها لانها عشرة على عشرة وربنا يوفقك

رأيي من رأيك تماما مضايقني فيها مكان زراير الازاز والكلاكس بس احسن بكتير من الفيرنا واللانوس يا راجل بدون مقارنة طبعا ولو اني ناوي علي البريليانس عشقي الا اني بحترم اللوجان اوي