الموضوع: من كان يعبد محمدا فإن محمد قد مات

مع احترامى لمثل الاخت بتاعة كرداسة الله يرحمها الا اننا يجب ان نضع الامور فى نصابها الصحيح و لا نخلط الاوراق.... يعنى دى جريمة جنائية قام بها اشقاء المجنى عليها بسبب الجهل و التقاليد البالية الذى جعلهم يتصورون ان القتل هو علاج للمسائل لانهم اعتبروها زى ما تكون جريمة شرف لان اختهم فى تصورهم جابتلهم العار كعيلة و بالتالى كان العلاج فى نظرهم هو القتل مع ان الكتاب المقدس يقول صراحة "لا تقتل"، يعنى حتى هم مش متدينين و الا كانوا سمعوا كلام الكتاب المقدس الذى يقول صراحة لا تقتل.....و بالتالى هى جريمة جنائية عادية، لا حد من الكنيسة حرض عليها و لا حتى حد من المسيحيين عمل مظاهرات و قعد يقول عايز اختى و يشتم فى الناس و يغلط فيهم بلا داعى..... يا ريت نشوف الامور بالمنظار الصحيح لان اسلوب المسيحيين عمره ما كان العنف و لو لا قدر الله كان العنف هو الاسلوب لكانت اندلعت فى مصر حرب اهلية من سنة 1972 يعنى من اربعين سنة منذ اول حرق لكنيسة فى تاريخ مصر الحديث، بالمخالفة لوصايا الاسلام المتسامحة بأقباط مصر و المواقف التاريخية المعروفة التى تمت فيها التوصية خيرا بأهل مصر......و البلد كان زمانها اتقسمت من زمان بسبب تدخل القوى الدولية، اللى البابا كان دايما بيقول لهم خليكو فى حالكو شأن الاقباط شأن مصرى داخلى و هو ده اللى كبره قدام الكل فى الداخل و الخارج الى الحد الذى جعل بيان البيت الابيض يقول عنه انه قائد وطنى حريص على الوحدة الوطنية..... و الناس هنا بتذكر للبابا الراحل حكمته لانه كان دايما بيهدى اولاده و يهدئ من مشاعرهم و لا يزيد النار اشتعالا لان كان ممكن بكلمة واحدة منه مش فى محلها البلد تولع..... لكن حكمته التى يفتقدها الجميع الان هى التى جعلته دائما يكون صمام امان بدلا من فتيل اشتعال للازمات الطائفية...... اى منصف قارئ للتاريخ الحديث او القديم سيرى ما اقول بعقل و تعقل بغض النظر عن مشاعر الحب او الكره...... الشهادة الحقيقية على عظمة الانسان هى التى تأتى للانسان من اعداؤه..... و اعتقد لما البيت الابيض و حتى رئاسة الوزراء الاسائيلى توصفه بالقائد الوطنى الذى حرص على وحدة بلاده يبقى مفيش شك ان الموضوع ده هم شافوه منه فى مواقفه المختلفة على مر السنين......

المشاركة الأصلية كتبت بواسطة human

حضرتك عارف قالوا ايه عن مبارك

لما الناس ديه تقول كده اعرف ان الكلام فيه كلام

وبرضه احنا مش عايشين فى وطن منفصل ولا فى منطقه تانيه عشان نعرف ان الاستقواء بالغرب تم فى عهده وعلى طريق ممنهج
شوف رجال الدين الغربيين اللى جايين بيقولوا انه بيدافع عن حقوق الاقليات المضطهده وانه بيحارب لنشر السلام فى مكان يشن عليهم هجوم ممنهج على الاقليات
الكلام ده مثلا بيحلموا بيه ولا ده الكلام اللى بيتقال ؟؟
انا كنت متابع العظات وفكتير منهم كان بيتم تشبيه الوضع الحالى زى اضطهاد الرومان ويجب ان يصبروا ومن اول الاكليل لغاية اخر الموضوع اللى اكيد حضرتك عارفه

اكتر حاجه تضايق ان التاريخ اللى عشناه يتغير واحنا لسه عايشينه
اومال لما الزمن يعدى هيتقال ايه

لأ معلش تشبيهك قياسه غير صحيح.... يعنى مبارك هم عارفين كويس كانوا بياخدوا منه ايه و هو بيمصلح منهم ايه..... لكن البابا كانت ايه مصالحه عشان يستقوى بيهم؟ و كان هيستقوى بيهم على مبارك حبيبهم اللى فى جيبهم اصلا؟ مش واسعة شوية دى؟ ثم ايه هى الفوائد العظيمة اللى عادت على الاقباط و تم تحقيقها اذا كان هذا الاستقواء المزعوم قد حدث؟ هل القتل اللى كانوا بيتقتلوه وقف؟ و لا خدوا قانون موحد للاحوال الشخصية طبقا لشرائعهم زى مشروع القانون اللى اتقدم بيه البابا من سنة 1979 و نايم فى ادراج مجلس الشعب بقاله اكتر من 30 سنة..... القانون اللى اى دولة محترمة ممكن تسمح بيه لفئة من مواطنيها عشان فى الحقيقة تنفذ بيه تعاليم دين الاغلبية نفسه يعنى تنفذ بيه تعاليم الاسلام..... و لا قانون دور العبادة الموحد عشان نمنع الفتن الطائفية و لا ولا ...... اما موضوع الاضطهاد، هو كان ايه المطلوب من البابا و هو كل شوية بيشوف ولاده بيتقتلوا كل شوية؟ يعنى الراجل كتر خيره كان من الحكمة بحيث انه عمره ما هيجهم حتى ولو بكلمة..... مش عايزه حتى يصبرهم بكلمة تهدى نفوسهم؟ مش عايزه يقولهم كلمة تصبرهم على القتل لمواطنيهم و الحرق و الهدم لكنائسهم..... حتى دى مستكترها عليه؟ اومال كان يعمل ايه بالظبط اذا كده مش عاجب و كده مش عاجب؟ الراجل لما كان بيزهق و يحس باليأس من ان تأتى العدالة من البشر كان بيصمت صمته المعروف و يروح الدير و يقول اصمت انا لكى يتكلم الله من خلال تدخله سبحانه و تعالى فى مسار الاحداث..... كان ايه المطلوب بالظبط من راجل فى مكانه..... قليل من الانصاف يرحمكم الله.....

المشاركة الأصلية كتبت بواسطة human

كلامك بيأكد كلامى ... شكرا لتوضيح الفكره والمكنون للجميع وما يخفى وراء الكلام المعسول والمنمق و مايخفى فى الصدور

شكرا

لأ يا طارق بيه و انت الصادق الحقيقة زى ما قال فرويد هى اللى بتطلع فى الكلام بدون قصد اول مرة..... يعنى انا قلت ان الشهادة للرجل جاتله من (اعداؤه)..... يعنى اعتبرت من البداية و قبل ما نوصل للنقطة دى من الكلام ان امريكا و اسرائيل اعداؤه و اعدائنا كلنا..... و معتقدش لو هم مش اعداؤه كان لقى صعوبة فى انه يركب الرايجة اثناء عصر السادات و كان يروح القدس زى كل اللى راحوا و ما اكثرهم و ماله مش سيادة السيد الرئيس عايز كده..... لكن الانسان مواقف و اصعب المواقف هى المبنية على مبدأ يقف به الانسان فى وجه الدنيا كلها و بالتحديد السلطة فى اعلى مستوياتها ممثلة فى رئيس الدولة..... و ان يعانى الانسان فى سبيل موقف اخذه بناء على مبدأ.......

خلاصة القول..... اى حد ممكن يحب حد من الناس او يكرهه.... دى مشاعره و هو حر فيها..... لكن الامانة مع النفس تقتضى ان يرى الانسان المواقف على حقيقتها بعقله الذى ميزه الله به سبحانه و تعالى عن كافة المخلوقات..... هذا العقل لا ينبغى ابدا ان يتأثر بضباب المشاعر سواء بالكره او الحب المتغيرين حسب حالة الانسان و نفسيته وقت الاحداث المختلفة.....

فى الجيش...... القادة ذوى القدرة العسكرية العالية يؤدى لهم اعداؤهم التحية العسكرية حتى لو هزموهم.... زى ما مونتجومرى عمل امام تمثال روميل رغم ان مونتجومرى هزم روميل و خلاه ينسحب و ده اعترافا منه ببراعة روميل كقائد عسكرى فذ و غير عادى..... و فى الشطرنج لما بتلاقى اللعيب اللى قدامك من البراعة بحيث انك شايفه خلاص هيهزمك بعد كام خطوة، بتروح موقع الملك بتاعك كاعتراف منك ببراعته..... رغم انه خصمك.....

تحياتى للجميع و ربنا يديم علينا المحبة جميعا مسلمين و مسيحيين فى بلدنا كلنا اللى كانت و هتفضل ما نتفق عليه جميعا و ما يجمعنا كلنا.....