الموضوع: صوت تسقيف بعد مشكلة في دورة التبريد

المشاركة الأصلية كتبت بواسطة محمد الشامي

السلام عليكم ورحمة الله وبركاته يا شباب

عندي ملاحظه صغيره لاحظتها مؤخراً على اداء الموتور عندي

الحكايه ببساطه اني من اسبوعين كنت راجع من مشوار طويل وقبل ما اوصل البيت حسيت ان العربيه فيها رعشه مش طبيعيه على السلانسيه , ولما اكبس بنزين احس كأن العربيه متلته
ابطل العربيه واجي ادورها احس كأنها شغاله على 2 بوجيه مثلا , والموتور مش مظبوط خالص وسامع زي صوت تخبيط على خفيف

نزلت وفتحت الكبوت لقيت المراوح شغاله على السرعه العاليه والهواء طالع منها بارد جدا كأنه هوا تكييف !!! ومؤشر الحراره في التوقيت ده كان طبيعي جدااااااااااا للاسف

المهم بفتح غطاء القربه لقيتها فاضيه تماماً (مع اني الصبح دايما ببص على الميا والزيت) فجريت على شنطة العربيه وجبت ميا وبدأت احط في القربه والميا بمجرد ما دخلت دورة التبريد المراوح طلعت هواء سخن جدااا , وطبعا ببص تحت العربيه لقيت الميا بتنزل من تحت

عشان مطولش عليكم هو كان عيب في دورة التبريد وخلاص صلحته , بس الملاحظه اللي عندي من بعد الحوار ده اني بقيت بسمع صوت تسقيف في المكنه , وده عمره ما حصل عندي !!!

انا بحط بنزين 92 وظابط فيشه الاوكتين على 95 , ومغيير فلاتر وسلك بوجيهات وبوجيهات قريب
سحب العربيه تمام جدا والحمد لله , ومفيش اي مشاكل في الميكانيكا بشكل عام

هل صوت التسقيف ده معناه ان في حاجه حصلت في الموتور بسبب السخونه الزايده اللي حصلت دي ؟
ولا التسقيف ده ممكن يكون ايه ؟؟

الحمد لله على السلامة استاذ محمد زمان ما شفناك في المنتدى
ان شاء الله تكون المشكله بسيطة و الاخوه الافاضللا يفيدوك
تقبل مروري و عاش من شافك

المشاركة الأصلية كتبت بواسطة mic2keen

الحمد لله على السلامة استاذ محمد زمان ما شفناك في المنتدى
ان شاء الله تكون المشكله بسيطة و الاخوه الافاضللا يفيدوك
تقبل مروري و عاش من شافك

الله يسلمك يا صديقي العزيز :)
ومعلش كنت مشغول شويه عن المنتدى لظروف الشغل والحياه , بس بحاول اتواجد قدر المستطاع :)

تحياتي لحضرتك واتمنالك دوام التوفيق بإذن الله

والله ياخوانا مشكلة المية دى بقت حاجة تقرف، بعد إذن أستاذ محمد الشامى طبعاً، الواحد كان دايخ على الميه الأسبانى علشان المية نقصت تانى عندى ومش عاوز احط مياه عادية، دوخت المنير يقولى المستورد بطل يجيبها وابو الحسن معندوش إلا الحمراء تركيز 10%، وبعد كل دا الصبح النهاردة ببص الاقى كوعة المياة من ناحية وش الموتور ومن عند الخرطوم فيها اثار مياه خضراء... عليه العوض

المشاركة الأصلية كتبت بواسطة mailo

هو كلام من بره كده المفروض المشكلة دي متاثرش كده
بس جرب كده رجع الفيشة على بنزين 92 وشووف التسقيف ده هيفضل موجود ولا لأ
للتجربة بس وبعدين نشوف إيه اللي ممكن يتعمل بعدها

والله ياريس انا مظبط فيشه الاوكتين من اكتر من سنه و الحمد لله مفيش اي مشاكل ظهرت خالص بسببها , عشان كده انا مستبعد الحكايه دي شويه

المشاركة الأصلية كتبت بواسطة tarek_2005

تاكد انه تسقيف مش صوت كستبانات يفضل تغير الزيت لان ارتفاع الحرارة ممكن يكون اثر علي خواص الزيت بتاع المحرك غيير الزيت والفلتر وجرب لو اختفي الصوت يبقي كانت الكستبانات هيا الي عملاه لو لم افتح واكشف علي الكستبانات اول حاجة بتتاثر بالحرارة العالية للمحرك

المشكله اني حاطط زيت موبيل 1 عشرة الاف كم , وهو حاليا لسا ماعملش 1000 كم :) يصعب عليا انزله دلوقتي ,, هههههههه

لكن بخصوص الكستبانات اعتقد لو الصوت منها كان يستمر طول ما العربيه دايره في اي وضع سواء واقفه او ماشيه , لكن صوت التسقيف اللي حصل عندي مع الكبس او النقل بدري , بس بيحصل لثواني وبيختفى

طيب بما اننا جبنا سيرة الكستبانات , مش دي اللي تخلي صوت الموتور عالى ويعمل تكتكه ؟؟

ممكن يكون البنزين مش كويس

أو عليه مياة

فضى التانك للآخر و شوف بنزينة كويسة

و إن شاء الله تحل مشكلة التسقيف

المشاركة الأصلية كتبت بواسطة popahly

والله ياخوانا مشكلة المية دى بقت حاجة تقرف، بعد إذن أستاذ محمد الشامى طبعاً، الواحد كان دايخ على الميه الأسبانى علشان المية نقصت تانى عندى ومش عاوز احط مياه عادية، دوخت المنير يقولى المستورد بطل يجيبها وابو الحسن معندوش إلا الحمراء تركيز 10%، وبعد كل دا الصبح النهاردة ببص الاقى كوعة المياة من ناحية وش الموتور ومن عند الخرطوم فيها اثار مياه خضراء... عليه العوض

عندك حق والله , بس على كلامك الحمد لله الحكايه عندك بسيطه , يعني بس هتلاقي الكوليه اللي بيربط الخرطوم مفكوك او مقطوم وعايز يتغيير بس

وبخصوص الميا الخضرا , يوم لما تغلب وخلاص مش عارف تجيب الاسبانى هات العلبه المعدن الامريكي وحط ربعها على دورة التبريد مع الميا العاديه , وحط مثلا ربع كمان على الميا اللي بتزود منها , وخلي الباقى على جنب مع نفسه , كده هاتعمل نفس التأثير بتاع الاسبانى

انا حاليا عامل كده :)