اتعجب بشده من تصرف بعد الناس من ذوى المؤهلات العليا التى يفترض فيها حسن الفهم الجيدة و حسن التصرف و الذكاء ......
يوم الاثنين الماضى .... جائنى المدير المالى و تعلو وجهه علامات الجدية المصطنعه و قالى : بص يا حس احنا عملنا اعلان عن طلب موظفين جداد محاسب و مسئول مبيعات و حطينا رقم موبايلك فى الاعلان و ان شاء الله هينزل الاعلان فى اهرام الجمعه القادمه .....!!!
فسألته انا و قولتله : طيب ايه الشروط المطلوبة ؟؟؟؟ فرد بلا مبالاة و قالى ... محاسب عادى يعنى و مسئول مبيعات عندة خبرة ييجى على دماغ صاحب الشركه ..... و سابنى و خلع ..
انا دماغى ورمت ... و حضرت علبيتن اسبرين علشان الصداع بتاع يوم الجمعه ده و انتم متعرفوش ايه قيمه يوم الجمعه ده بالنسبة لى .... المفروض ان كل مشاوير الاسبوع كلها بتتأجل ليوم الجمعه و زيارة اهلى و صيانه السيارة و كمان الاستحمام الاسبوعى ليه و العربية كمان ......
حاولت طبعا استمتع لانى مش عارف اقاوم .... الى ان جاء يوم الجمعه .... ملحوظه انا نمت الخميس الساعه 5 فجرا بعد رحله و معاناة البحث عن البنزين الى ان وفقى الله بعد دعوات خاشعه الى انى مونت و الحمد لله .....
صحيت الجمعه الساعه 11.30 و تناولت لقمه على السريع و نزلت صليت الجمعه و كان الموبايل صامت ..و خرجت من الجامع ببص فى الموبايل لاقيت 5 مكالمات فائته من ارقام مختلفه ؟؟ هم الناس ده مش عارفة ان ده وقت صلا ولا ايه ؟؟ المهم مع اول اتصال .....
صوت حريمى يقترب من الخمسين سنه : ايوة يا بنى انت عاملين اعلان عن محاسبين ؟؟
انا : ايوة يا امى ... فعلا
هى : طيب ايه الشروط
انا : هو مين يا امى اللى متقدم للوظيفه ؟؟؟...........هى : ابنى
انا : و هو حضرتك مكلمناش ليه ؟؟؟ ردت و قالت ... معلش يا بنى اصل هو نايم و انا بدورله على شغل ...... تخيلوا ....
انا و انا مفروس و بفتكر امى و هى بتبصلى شزرا لما اتأخرت فى احضار هدية عيد الام ... : خلية يا امى هو اللى يكلمنا علشان ياخد العنوان و يعرف الشروط ... المهم قفلت و هو بتدعيلى و بتوصينى علية .....
اتصال اخر : الو ايوة ... بخصوص الوظيفة و سكت ... رديت علية و قولت .. احنا منزلين وظفتين انهى واحدة ؟؟؟؟ هو طيب استنى دقيقه اشوف الاعلان !!!!!!!! انا جالى انهيار عصبى و قطعت الكلام و حسيت ان كابل الاديو اتخلع من دماغى .......
جالى اتصال بعدها بدقيتين : بخصصوصص الاعععععلان ببببتاع انهارده .؟؟؟ فقولتله... اقفل لو سمحت انا من ناقص لبخه فى الكلام .. انا اصلا بجمع بالعافية ... و قفلت
اتصال رابع : الو .. فى اهرام انهارده ... فكملت انا قولتله اوكيه ... انهى و ظيفه قالى ...محاسب ... فقولتله .. خد العنوان .. فرد عليه و قالى خليك معايا على الخط 5 دقايق لغايه ما اجيب ورقه و قلم .... فرديت عليه قولتله حضرتك بتهزر .. قالى و فيها ايه متستنى شوية و قعد يجعر على واحد عندة علشان يجيبله ورقه و قلم ...قمت رازع الخط و كان هاين عليه اعض التليفون من الغيظ .......
خامس اتصال : من واحدة بنت محاسبة ...هى : السلام عليكم ... انا رديت السلام .. هى : انا محاسبة .. ايه شروط الوظيفه ... انا بخجل : انا اسف هى الاعلان مطلوب محاسبين ذكور فقط ؟؟ هى : ليه بقى التفرقه العنصرية ده ؟؟ انا: معلش اصله هيشتغل فى المخازن .. هى : اه ... طيب و قامت ندهت لواحد عندها لسه صاحى من النوم ... و كان تقريبا الاحبال الصويته بتاعه لسه نايمه ...قعد يفح شوية فى التليفون و لا فهمت ولا سمعت ايه كلمه منه ...
و قولتله خش اتشطف و افطر كده و فاوء .. و بعدين كلمنى ......
اتصال اخر : الووووووووووو .. فقولتله خد العنوان ؟؟؟ 32 شارع ......كذا .. كذا ......
فرد : و قالى عنوان ايه يا عم ؟؟؟ هو انا يعنى مش عارف بيتكوا ؟؟؟ فقولت ايه الهطل دع ... هو الانترفيو هيبقى عندنا فى البيت ...
فرد و قالى : ايه عم حسام ...انت نايم و لا ايه ؟؟... انا سعيد ... نسيبك يا راجل .... انا جايكم انهارده علشان عيد الام ......!!!!!
فضحكت و وقعت على الارض و قولتله ... معلش يا سعده اصل فى اعلان عن شغل فى الشركه عندنا و فى ناس بتتصل تاخد العنوان و عاوزين محاسب ؟؟؟
فرد بسرعه و قالى : طيب ادينى العنوان بسرعه و مطلوب ايه !!!!!!!!!!!!!!!!! قمت رزاع فى وشه السماعه و قولت لامى ده ميخشش البيت عندنا خالص ...


اتصال اخر : واحد نايم على نفسه : الو .. الوه ..
انا : اللهم طولك يا روح ... ايوة سعادتك ... خير ..
هو : الاعلان هه الاعلان ... اللى فى الجرنان ... الجرانان ..؟؟
انا : يا عم انت ما سك علية ذله ... ايوه .. ماله بقى الاعلان ...
هو : المحاسب ... انتم مش عاوزين محاسب .. انا المحاسب .... و قام داخل فى غيبوبه ؟؟
انا : ايو ه ... خد بقى العنوان ..... كذا كذا ... المهم ... يرد و يقولى : هو انا يعنى لازم اجى ...؟؟؟ اه و الله العظيم تلاته!!!
انا : مرارتى ... خلاص انفقعت ... و جالى شلل رباعى ... فقولت لو تحب حضرتك اجيب المدير المالى و صاحب الشركه عندكم فى البيت و نعمل الانترفيو عندك ... ماشى ؟؟ فرد و قالى : طب خد العنوان !!!!!!!!
اتصال اخر يبدو انه من لهجته انه من اطراف مصر : الو... هو المرتب قام ؟؟؟ فرديت عليه و قولتله : 500 ساسونا و خمسين زباطه ..... ده العمله الجديدة بتاعتنا ..
فقالى : يعنى يبقى كام بالمصرى .... فقولتله يعنى حته بخماشر.. كده ... قالى .. لا كده جليل و الله.....طيب سلام ...
و خد على كده بقى : عاهات و الله عاهااااااااااااااات .....لغايه الساعه 10 بليل ...
و دخلت نمت و صحيت الصبح : لاقيت المدام عماله تجس دماغى و تقولى انت عيان ولا ايه ؟؟
فتحسست راسى ... و قولتلها خير فى ايه ؟؟؟ ردت و قالتلى اصلك عمال تخطرف طول الليل .. و بتقول كلام غريب .....
انا : كلام غريب ... فيه ايه بالظبط ...هو انا قولت ايه .... ؟؟؟
قالتلى : عمال تقول الو .. الو ... 32 ... و محاسب و اكسيل ... محدش يتصل بيا خالص .......
بصتلها كده ... و قولتلها .... لا انا طبيعى ... واضح انك كنتى بتحلمى .... مفيش الكلام ده خالص .........
اعزائى راغبى العمل ... برجاء فهم الاعلان جيدا و معرفه المطلوب جيدا و تحضير ورقه و قلم و عدم السئوال عن المرتب و الرحمه ثم الرحمه بالشخص الذى يقول بالرد عليكم ..........