محتاره ومحتاجه مساعدتكم

**Khaled Seif** · 28-03-2012 01:35 PM

المشاركة الأصلية كتبت بواسطة aushoforget

طيب حضرتك كاتب إن توقف إنتاجها 2001 إزاى والعربيه اللى أنا جربت سواقتها كانت موديل 2005
وألف شكر لإهتمام حضرتك

أنا آسف جدا لحضرتك , والله ده خطأ مطبعي , آخر موديل للماتريكس 2011

**just4fun** · 28-03-2012 11:46 PM

بجد مفيش حاجة هتستحمل البهدلة زى الصنى كفاية انها يبانى و صاج متين و موتور قوى 118 حصان و عفشة رياضية عشان طرق مصر الحلوة و عوامل امان ,و متقلقيش من ناحية التقفيل هو كويس جدا و لو فى اى مشاكل بتتحل على طول فى اول صيانة عشان توكيلها محترم جدا و دى ميزة هايلة للعربية , بالنسبة للصوت ده عشان سير الكتينة جنزير اعتمادية اكتر و فى اعضاء عملولها عزل متكلفش 300 جنية والنتيجة كانت هايلة , و استهلاك البنزين زى باقى العربيات اللى فى فئتها ممكن اختلاف حاجة بسيطة و بيعتمد على السواقة هادية ولا جرى و حرق ,فعلا مش هتندمى على العربية المحترمة دى , و ممكن بردو تشوفى الصنى الشكل الجديد هتنزل فى شهر 7 .

**midobond** · 29-03-2012 01:25 AM

ارشحلك نيسان صنى فعلا تعتبر احسن اختيار فى الشريحة السعرية دى و استهلاك البنزين اعلى اه بس مش لدرجة الاوبترا 2008 يعنى مش سفاحة بنزين اعتمادية جدا و موتور قوى و ثبات رائع و كماليات مش قليلة ابدا لولا انى بكره العربية دى و بكره شكلها بس كلمة حق للامانة :) الاكسنت rb شكل جديد و جميل و كعادة كل الهيونداء موتور جبار ثبات مفيش و على فكرة الصنى مش ضيقة من ورا اوى يعنى انا طولى 178 سم كنت قاعد فيها من ورا مش هقولك مرتاح و مش هقولك هموت و انزل منها برضه بس اهى ماشية يعنى :)

**Manchestrawy** · 29-03-2012 06:26 PM

بما انك سيده يبقى قبل ما تفكري في نوع العربيه فكري في التوكيل بتآعها ..
عشان حضرتك اكيد مش حابه تجيبي عربيه وكل ما يحصل فيها حاجه التوكيل يضايقك وكدا
عشان كدا انا برشحلك النيسان صني .. بغض النظر انها افضل عن كل الي حضرتك ذكرتيهم في الموضوع
الا ان توكيلها محترم ويعتبر من الافضل في مصر .. بخصوص موضوع الاتساع
حضرتك ممكن تشوفيها بنفسك وتحكمي .. هيا نسبياً ضيقه بس مش لدرجه انه يكون عيب فيها ..
صوت الماتور العالي بيعوضه قوة الماتور 118 حصان والعفشه الرياضيه ..
وكفايه انها يآبآني .. يعني تكيف تلاجه بقى .. الكلام ده كله على الصني الـ EXsalon
يا سلام لو تشتري الـ Supersalon .. وتآخدي بقى كل الكماليات ووسائل الامان

موضوع البنزين الـ 40 لتر مبيعملش اقل من 500 كيلو تخيلي بقى
وبنسبه لقياده سيده ممكن يزيد كمآن .. التقرير ده في الرد الوافي والكافي عن استهلاك الصني
تقرير استثنائى عن استهلاك البنزين فى الصنى على مدار سنة ونصف ... حصريا

متنسيش تخدي لفه على قسم كل عربيه وتشوفي عيوبها والكلام على التوكيلات بتاعتها
وتشوفي تفاعل اعضاء الاقسام دي ايه لانك هتحتاجيهم ان شاء الله مستقبلياً

الصني سوبر صالون اختيـآآر مينفعش تقارنيه بأي حاجه من الي ذكرت في بدايه الموضوع

**aboyehya** · 02-04-2012 10:10 AM

رأيي بصي على البونتو ايفو
107 اوتوماتيك و كماليات رائعة و عربيةمريحة و ادائها كويس جدا من كلام ملاكها
اما ام شاء الله ناوي اجيب واحدة لأني لقيت انها الأفضل في رينج السعر ده
الريو عربية تبدو كويسة بس ازاي نازلة من غير abs or ebd !!
ده اللي خلاني اروح للايفو :)

**mostafa53** · 03-04-2012 07:28 PM

المشاركة الأصلية كتبت بواسطة hany63

ياسلام لو النترا الشكل القديم تبقى في الجون

:018a1d~146::018a1d~146::018a1d~146:

**bobozoro** · 09-04-2012 06:15 PM

ايه رأيكم في البروتن بيرسونا hl ب 96000

**Dawns_Mist** · 09-04-2012 08:19 PM

بداية هبدأ باحتياجات حضرتك للعربية ( زيرو - مشاكلها قليلة - تستحمل - عائلية - شكلها حلو - عملية في السفر ) .. إلفئة السعرية لا تتخطى 110 ألف جنيه ...

اختيارات حضرتك المبدئية ( ماتريكس -أكسينت - أفيو - فيرنا ) و أنا هساعد حضرتك و هدخلك في المقارنة كمان باقي العربيات الكويسه في الفئة السعرية دي حسب ذاكرتي ( نيسان صني - دايهاتسو سيريون - بروتون جين2 - فيات بونتو إيفو - رينو سانديرو ستب واي - كيا ريو الجديدة ) ...

هبدأ بالمقارنة بين اختيارات حضرتك المبدئية :
- الفيرنا تخرج خارج المنافسة تمام .. هي الاقل في الكماليات ، الأقل في الثبات و عوامل الأمان ، غير مريحة في السفر ..

مشاكل قليلة و تستحمل : الأفيو هي الأسوأ في النقطة دي و الماتريكس هي الأفضل
عائلية : الماتريكس هي الأفضل في النقطة دي
الأداء : الأكسينت أداء أفضل نسبيا
الراحة الداخلية و النعومة : الماتريكس تتفوق على الأكسينت و الأفيو ...

بالتالي بالنسبة لمتطلبات حضرتك مقارنة بالاختيارات المبدئية ... الماتريكس هي الأفضل .. و هي لسه بينزل منها زيرو إنتاج 2011 في بعض المعارض ...

- هضيف آراء المشاركين و رأيي في بعض الإضافات على اختيارات حضرتك و هنقارنهم بالماتريكس كمان يبقى معانا : ( ماتريكس - صني - جين2 - سانديرو - إيفو - سيريون - ريو )

الإيفو هي الأنعم و شكلها بناتي أكتر و هي الأفضل في الكماليات و الاوبشنز و الأمان .. لكن حضرتك بتقولي هتتعلمي عليها ... بالتالي بلاش إيفو علشان قطع غيارها مش منتشرة و التوكيل سيء ... و نفس الكلام ينطبق على الجين 2 مع إنها تعتبر ممتازة برضه ليكي لإنها اعتمادية و عائلية و تستحمل السفر و شكلها جميل و تابلوه شيك ..

كل العربيات دي كويسه و أي واحدة فيهم هتشتريها هتبقى صفقة رابحة إن شاء الله من رأيي ... و من غير مقارنة طويلة تفصيلية تقنية .. هقول لحضرتك نقطة قوة كل عربية فيهم و نقطة ضعف و في النهاية هيكون الحكم لحضرتك :

- الماتريكس هي الأنعم ، هي الأكثر راحة ... يعيبها ثباتها قليل على السرعات العالية و فقر كمالياتها مقارنة بسعرها
- الصني هي الأكثر عملية على الإطلاق ... هي الأكثر اعتمادية في السفر و التحمل .. هي الأفضل في قطع الغيار .. أفضل توكيل .. أسهل صيانة .. و هي الأقدم في الشكل الخارجي و الأفقر في التابلوه ... و العفشة ناشفة نسبيا ..
- الريو هي الأكثر كماليات مع شكل ثوري جديد .. سعرها الاغلى مقارنة بالإمكانيات الميكانيكة و الأداء .. مازالت قطع غيارها لم تتوفر بكثرة خارج التوكيل لكن التوكيل جيد .. و هواجس عدم ثبات الريو على السرعات العالية ..
- سيريون هي الأفضل في الأداء مع شكل خارجي بناتي أكتر و قطع غيار متوفرة و صيانة سهلة ، و ثبات و تحمل .. لكنها أضيق من الداخل و ليست بنعومة الماتريكس أو السانديرو .. واطية نسبيا على الأرض ..
- سانديرو ستب واي ... نعومة مناسبه ، راحة داخلية و عزل مناسب ، توكيل محترم ، قطع غيار سعرها مناسب ، شكلها جديد ، أفضل سعر مقابل القيمة و الأداء ، ثبات و أمان جيد جدا ... الأجمل في السانديرو أنها جمعت زهرة من كل بستان .. يعيبها عدم توافر قطع الغيار بوفرة خارج التوكيل .. لكن سرعان ماتحل هذه المشكلة خلال شهور لإنها انتشرت كتير ، و أدائها أقل نسبيا من السيريون و الصني .. لكن توكيلها ربما يغنيك و يكفيك تماما ..

* الاختيار يتوقف على حضرتك بعد ما شوفتي نقطة قوة و نقطة ضعف كل اختيار .... و أنا لو مكان حضرتك و هشتري عربية لنفسي هختار الصني بدون تردد ، ولو هختار عربية لأختي أو زوجتي هختار سانديرو ستب واي بدون تردد ...

بالتوفيق ..........

**SonaSteel** · 09-04-2012 08:54 PM

المشاركة الأصلية كتبت بواسطة semsem kane

ال rb اضيق من النيسان صنى على فكرة فى الكنبة الخلفية وفى الامام تقريبا الاتنين واحد

بالنسبة للتقفيل النيسان صنى فيها مشاكل مع التقفيل عموما لكن كعربية كويسة جدا واعتقد يعنى انتى مش هتجرى بسرعة او تعملى حركات شبابية يعنى هتبقى سواقتك هادية اخرك 100 مثلا

الهيونداى عموما فى ال budget اللى حضرتك قايلة عليها هتكون فاضية تماما وطبعا الهيونداى ليها ميزة انها بتبقى محركها هادى جدا قبل ال2500 لفة بعد كدة بيعلى + ان بيبقى العزل فيها كويس + والاستهلاك بردة بيبقى معقول يعنى بتعمل تقريبا 180/190 داخل البلد

قطع غيار الهيونداى غالية مش رخيصة وخصوصا الفوانيس والزجاج والكلام دة

بالنسبة لعيوب هيونداى انها مابتنزلش بمانع سرقة الا فى اعلى فئة فقط وساعات مابيبقاش فية فحضرتك لازم تحطى فى اعتبارك ان العربية تتركن فى جراج او ماتتسابش برة فى اماكن مجهولة عشان انتى عارفة ان السيارات الجديدة بيبقى عليها العين اكتر

النيسان صنى فيها كل عوامل الامام + immoplaizer+ abs - 2 airbag - ebd - ba system

الكيا ريو محدش جربها بس انا ركبتها هية واسعة من من الخلف مش ضيقة العربية كويسة كمجمل لكن كعيوب بقى والكلام دة مابيبانش دلوقتى بعد اول 5000 الاف كيلو بتبدأى تقييم العربية صح

طبعا الشكل لصالح ال rb + شكل العدادات + شكل ال cd كل دة بيدى منظر للعربية + العربية ناعمة وبتجرى بس بعد 120 مانحكيش تجرى اكتر من كدة لان الثبات هيكون بيضيع

دية كدة مقارنة سريعة مابين الاتنين اللى فى نفس الفئة وعمليا الصنى امان اكتر لكن الrb انعم الكنبة الخلفية فى نظرى الصنى اوسع منها قليلا

فية كمان مشكلة فى الrb ان ابعدها صعبة جدا وكمان مجال الرؤية الخلفى يكاد يكون معدوم لان الزجاج صغير جدا ودية كمان مشكلة فى ال ريو 2012

وللحديث بقية عشان ماطولش عليكى

+1111111111111
ماشاء الله رد مممتاز ومقارنه طيبه :))