الموضوع: الشرع و لا العرف ؟ فى خدمة الزوجة فى بيت زوجها !

يا جماعة من المعروف فعلا ان الشرع لا يلزم الزوجة بأعمال المنزل ولكن يلزم الزوج بأن يحضر لها من يخدمها. و اللي بيقول سنة النبي احب اقول له ان الرسول عليه الصلاة و السلام كان يساعد زوجاته في اعمال المنزل, يعني ما كانش بيلزمهم بيه. انتو ليه الموضوع ده بتبصوا له على انه حاجة غريبة؟ ربنا سبحانه و تعالى عدل و اعطى للرجل امتيازات كتيرة كلنا عارفينها في الميراث و القوامة و التعدد...الخ. لكن مقابل كدة وضع عليه جميع الاعباء المادية بحيث ان المرأة مش ملزمة بأي واجبات مادية حتى الخاصة بيها هي شخصيا زوجها أو والدها أو اخوها هم اللي ملزمين بيها. و من الواجبات المادية دي وجود خادم للقيام بأعمال المنزل. زي برضه ما هو من حق الزوجة ان الزوج يدفع لها مهر مناسب ثم يقوم هو بكل تجهيزات الزواج مش المهر يتحط في تجهيز الشقة و تكمل عليه كمان زي ما بيحصل دلوقتي وده برضه يعتبر تنازل من الزوجة.
الكلام اللي فوق ده مش معناه اني بأقول ان الستات مايعملوش حاجة في البيت, بالعكس انا شخصيا باشتغل و دخلي كبير الحمد لله و رغم كدة باحاول على قد ما اقدر اني ما اقصرش في شغل البيت ورعاية زوجى وبنتي على قد ما بقدر و لو قصرت غصب عني باكون شاعرة بذنب كبير و باحاول دايما اني ما خليش زوجي يعمل حاجة لنفسه. و هو في نفس الوقت بصراحة بيقدرني و دايما يشكرني و يحسسني انه حاسس بيا و دي عندي بالدنيا كلها.
انا طولت اوي في الرد بس باختصار الحياه الزوجية مودة و رحمة و حب و تعاون, ده اللي بيفتح البيوت و يعمرها. يعني لازم كل طرف يعمل كل اللي يقدر عليه عشان يريح التاني و يسعده الموضوع ما يتحسبش بالورقة والقلم.

اسف حصل تكرار للرسالة و معرفتش احذفها اللى يعرف بتتحذف ازاى يقولى