الموضوع: تبديل العجل

المشاركة الأصلية كتبت بواسطة zeznia

لالالالالالالالالا
يارجاله انا اعتقد ان اللي قدام يرجع ورا والورا قدام بس مش كروس x
السبع كان دايما بيعمل كده في عربيتي (65000)كلم

الكتالوج بيقول حرف x يا باشا

والله الموفق والمستعان

يا جماعة تبديل حرف X دا فى العربيات 4*4 فقط اما الجر الأمامى فبيكون التبديل كالآتى العجل الأمامى كل واحد تتبدل مع اللى وراها مباشرة والخلفى يطلع ادام بالعكس
Car Bibles : The Wheel and Tyre Bible Page 3 of 4
tyre rotation اول رسمة على الشمال
اتمنى اكون افدتكم وصححت المعلومة

مساء الفل على كل رجالة نايل موتورز،
معلش يا رجالة إعزروني لتدخلي في مناقشتكم بس إتنو عارفين بقى الكار بيحكم و ربنا ما يوريكم ذل الكيف
أعرفكم بنفسى الأول - انا / محمد يسري - "بتاع تسليح الكاوتش اللي إتجابت سيرته فوق" و كمان انا صاحب معرض Tire Mania و هو مكان متخصص في كل ما يخص الكاوتش ما عدا الجنوط و الزوايا. و انا أقدر أقول إننا او "علشان إبقى متواضع" بنحاول نوصل اننا نكون مركز الخدمة الأول في مصر -من حيث المعلومات و الخبرة و التجهيزات و شياكه"

المهم سيبونا من الكلام دة و خلينا في المهم.

شوفو بقي يا رجالة انا شايف كلام كتير صح في الكلام إللى فوق بس برضو في شويه معلومات غلط ف إسمحولي أصلح شوية الغلط و أعيد صياغة الصح "و ده على أد معلوماتي المتواضعة طبعاً"

أولاً خلينا نتفق إن في فرق كبير جدا بين تبديل الكاوتش و الترصيص و الزوايا
و كمان نتأكد إن مافيش أى علاقة بينهم ولا من بعيد ولا من قريب
بمعني إن الترصيص ما ينفعش يبوظ أو يصلح الزوايا أو البتديل ولا أي حاجة فيهم ممكن تبوظ التانية إلا في حالات محددة جداً ها نبقى نتكلم فيها لوحدها.

بالنسبة لتبديل العجل خلينا نعرف الأول إحنا ليه بنعمله؟؟؟؟؟
بشكل بسيط و بدون دخول في تفاصيل كتير ها نلاقي دايماً العجلتين إللى قدام مظلزمين علشان دايماً شايلين الموتور فوق دماغهم و لكن العجلتين إللى ورا مريحين على الأخر
كمان العجلتين إللى قدام يا عيني عليهم مسئولين عن توجيه العربية يعني عليهم الحمل زيادة في الملفات يمين و شمال و لكن العجلتين إللي ورا أخر روقان
و النقطة الأخير إن دايماً العجلتين إللى مسئولين عن دفع العربية (سواء دفع امامي او خلفي) بيكون عليهم أحتكاك أكتر بالأرض علشان بيبقوا هما المسئولين عن حركة العربية من الصفر - و دي علمياً و عملياً بتبقى صاحبة أكبر عزم حركة مطلوب اكتر من التاني إللى قاعد بيتزق و بس و ما بيعملش حاجة مفيدة غير إنه بيلف و خلاص - حاجه في منتهى الدلع يعني:)
و الشكل الصحيح للتبديل بيكون زي ما هو في الصورة االمرفقة و من المفضل أنه يتم التبديل كل 10000 كم


بالنسبة للترصيص : ف ده وسيلة لظبظ توازن العجل و الجنط بس و مالهاش أي علاقة بالزوايا و بنحتاج نعمله لما نلاقي رعشة في الدركسيون أو كل حوالي 10 أو 15 الف كيلو علشان مع الإستخدام الكاوتش بيتاكل ف بنحتاج نظبط التآكل ده - و يفضل إننا تنأكد منه و إحنا بنعمل التبديل علشان نوفر وقت "ما إحنا كده كده فكين الكاوتش"

أما الزوايا: ف دي وسيلة لظبط العفشة نفسها و التأكد إن العجل ولا فاتح لبرة ولا قافل لجوه و كمان تكون زاوية التعامد بتاعته مع العربية 90 درجة بالظبط.
و بنعملها برضو كل 20 أو 25 ألف كيلو للتأكيد و ممكن ما نعملهاش غير لما نحس فعلاً إننا محتاجنها علشان العربية بتحدف

أما بقى بالنسبة للحالات إللي بيأثر فيها التبديل مع الزوايا بتكون نتيجة وجود تآكل في الكاوتش من جنب معين ف بيخلى العربية مش موزونة و بتحدف ناحية التآكل.
و الحل في الحالات إللى زي ديه بيكون تغيير الكاوتش هو الحل الصح و لكن علشان طبعاً العين بصيرة و الأيد قصيره ف بيكون الحل التاني إللي بنلجأ ليه اننا نحط الكاوتش إللى فيه مشكلة ورا أو يعنى نغير مكانه بقدر الإمكان علشان نخلى العربية تمشى موزونة و ساعات ما بنعملش تبديل إصلاً بسبب الموضوع ده.
بس على فكرة إحنا لو واظبنا على تبديل العجل كل 10000كم مش المفروض إننا نوصل لمشكلة زي ديه إن شاء الله.

و على فكره كمان إحنا شارحين كل الكلام ده على ال web site بتاعنا
Home Page
جوا القسم الخاص بعلم الكاوتش tire-ology يس للأسف الترجمة العربي للموقع كله لسا في مرحلة التجهيز و قدامها حوالي 5 أيام كده و تبقى جاهزة.

و لكن انا عامل حسابي و هتلاقو كل الموضوعات إللى إتكلمنا عليها فوق موجوده في ال Facebook بتاعنا بالعربى و الأنجليزي
TireMania | Facebook

و كمان إحنا كل يوم تقريباً بننزل معلومة جديدة عن الكاوتش "مع شوية معلومات متنوعة بسيطة تانية عن العربيات و الحياه كمان" لكل الناس إللى دخلت على الصفحة بتاعتنا و عملت like.

أنا بعتزر على الإطالة بس حقيقي أنا حاولت إختصر بقدر الإمكان بس وانا ضامن إن المعلومة وصلت.

مع تحياتي

محمد يسري
01006541113
01120011222