الموضوع: نقطة سوداء اخرى تضاف الي سجل السيراتو !!

المشاركة الأصلية كتبت بواسطة medo111

المشكله الاساسيه في الفرامل لو دوست عليها في لحظه معينه وانت ماشي سرعه كبيره لازم هيحصل حاجه بس محدش عارف ظروف الحادثه وربنا يصبرهم

ما انت لو بتسوق في مصر يبقي اكيد قابلتو

فعلا استخدام الفرامل علي السرعات العاليه لازم يكون بحرص شديد

المشاركة الأصلية كتبت بواسطة mody100

حصلت معايا مرة فى راس السنة اللى فاتت كنت سهران مع صحابى فى العجمى و راجع بليل على حوالى الساعة 2 و معايا اتنين صحابى و انا كنت راجع من على الدولى و بجرى تقريبا كنت 160 ايام لما كان معايا الدايو الرايسر و قافل الازاز و مشغل الكاسيت و الدنيا زى الفل و فجاة لقيت نفسى لبست فى السقف و العربية طارت بمعنى الكلمة اترفعت من على الارض بجد لدرجة انى قمت من على الكرسى و لبست فى السقف بس ساعتها كل اللى عملته و اللى جى فى دماغى ساعتها انى حتى لما العربية طارت كل اللى عملته مسكت الطارة جامد بايدى الاتنين عشان لما العربية تنزل تانى متحدفش و طبعا مدستش فرامل نهائى و لا حتى تهدية بالعكس اول لما نزلت فضلت دايس بنزين عادى لانى عارف طالما العربية فى خط مستقيم حتى لو طارت و انت ماسك الطارة كويس فى العدل عمرها ما حتلعب الا بقى لو الطريق مش مظبوط عجلة ضربت حاجة فى العفشة باظت و عموما هو كله قدر بتاع ربنا
و ربنا يستر طريقنا جميعا .........
و ربنا يرحم الطفلة و يصبر اهلها يارب

امين يارب

المشاركة الأصلية كتبت بواسطة elawany13

عارف لما تكون طالع كوبرى بسرعه وبعدين تنزل من عليه ... أو العكس تحس ان العربية عاوزه تطير وتلاقى قلبك هيفط من مكانه وكل اللى معاك فى العربية بيشهقوا كده ... اعتقد ان هوه ده مطب الهواء
بس طبعا مش هتطير بالعربية الا لو كانت سرعتك عالية قوووووووووى
انما الملتزمين بالسرعه القانونية مش هيحسوا بيه قوى

على فكرة مرة واحد زميلى طار بالفيرنا فى مطب هواء ودماغه اترزعت فى سقف العربية ونزل اتهبد فى الأرض وكمل طريقه عادى

أعتقد انه مش عيب عربية بقدر ما هو تهور وسرعه زائده على طرق مش مستحملة أصلاً ولا تناسب هذه السرعه
يارب الناس تتعظ
وربنا يرحم الطفلة ويصبر أهلها

+111111111111
كل ما السرعه بتاعتك بتكون اعلي وانت بتعدي مطب الهواء كل ما العربيه بطير بغباء من فوق المطب ولو ماشي علي مهلك مش هتحس بيه اساسا

المشاركة الأصلية كتبت بواسطة eyadmorsy

التوريشن بيم مفيد فى توازن العربية خصوصا فى الملفات والمنحنيات كما قرأت .. وعن رايى الشخصى فى مطب الهواء اذا حسيت بيه تهدى بالفرامل قبليه واما تنزل سيب العربية بدون فرامل واما تثبت دوس فرامل اتهدىء السرعة

كلام حضرتك مظبوط بس اعتقد التورشتن بيم مش مفيد اوي في موضوع الثبات والاتزان وان المستقل او المالتي لينك افضل منه ولا ايه ؟!

المشاركة الأصلية كتبت بواسطة حماده المصري

مهو احنا اتكلمنا مليون مره في الموضوع ده خصوصا موضوع التورشن بيم والاكسات والقصه دي

كيا وهيونداي عندها عيب تصنيع ده انا متاكد منه مليون في الميا

لان انا شوفت كل التورشن بيم بتاع كل العربيات الصني والكورولا الجديده والقديمه والنيو اكسنت والسيراتو

اماكن وضع المساعدين والسوست وحجمهم غريب اوي بصراحه محطوطين في اعلى مكان ممكن يتحطوا في تحت الشنطه ده في النيو اكسنت بس في النيو اكسنت مش جايين بميل جايين ب زاويه راسيه على الارض علطول

في السيراتو محطوطين في بس ميل غريب جدا مش عارف ليه


بالنسبه للكورولا ف ال 2009 وحش ثبات انا قريت موضوع الحادثه بتاعتها بس انا مقتنع انها سوء تصرف او في الاول وفي الاخر قصاء وقدر انا سوقت الكورولا كانت ممتاززه جدا جدا جدا لحد 160 لدرجه انها غيرت فكرتي اي حد كان معاه 160 كنت بنصحه بالاوكتافيا دلوقتي بنصح ب الكورولا لان اخيرا تويوتا جمعت بين الثبات الجيد لحد 160 وبين العفشه الممتازه في النعوميه بصراحه


الصني برضو اماكن المساعدين والسوست كويسه جدا لانها محطوه في اقرب مكان من الشنطه من تحت للارض


انا صديق ليا معاه سيراتو اتقلب بيها واخد فلوسه من التامين وجاب سيراتو تاني ورجع برضو عمل بيها حادثه تانيه

انا مش فاهم الناس ليه مش مقتنه ان السيراتو فيها حاجه غلط فعلا زي ما النيو اكسنت فيها حاجه غلط

وبعدينر في اعضاء تقولك خدت مطب وطارت والعربيه ثابته جدا ايه يا جماعه هو في كده هو في عربيه ثابته جدا تاخد مطب هو تطير ده النوبير عمرها ما عملتها اساسا

هي العرييات دي تصميمها انها بتترفع شويه على مطبات الهوا ف لو اتافور عليها في السرعه هتطير ودي مش من علامات الثبات انها لما تطير تنزل تكمل دي من علامات الستر والحمد والشكر لله

انا كان معايا نيو اكسنت ف النترا 2005 ف صني 2006 وفي النص كده دخلت لانوس لمده شهرين

الالنترا العربيه الوحيده اللي لايمكن تطير على اي مطب هو ومره كنت في الصحرواي على 180 والفوارق الي بين الحتت الي مش متزبطه والحتت الي متزبطه في الطريق بتبقى عامله زي مطبات الهوا وبتبقى خطيره جدا جدا جدا الي سافر على الطريق ده كتير وهو بيتصلح يعرف خطوره الي عملوه انا سافرت بالنيو اكسنت وبالالنترا
كنت بالاكسنت اشوف الطريق النضيف بيخلص اهدي وانزل ل 90 لاني عارف اني هلاقي جبل قصادي

بالالنترا والمصحف 180 ولا الهوا كانها نقره عاديه وكان بيجري معايا عريبات كتير اوي كلهم بيهدا خوف وانا كنت بكمل عادي جدا طبعا انا كلاميع لى النتلرا 2005

+111111111111111111
كلام حضرتك مظبوط جدا
وفعلا الفواصل اللي بتبقي موجوده في الطرق اللي بتترصف بتبقي عامله زي مطبات الهواء وممكن لقدر الله لو ماشي بسرعه العربيه تعوم منك
180 بالانترا بسم الله ماشاء الله دي علي كده ممتازه ربنا يحفظها

المشاركة الأصلية كتبت بواسطة amdd

ياباشا ممكن ال400الف كم يكونوا فى طرق انت حافظها كويس بمطباتها ونقرها كمان اكيد حضرتك بتسوق بسرعات منخفضه مش عالية

+1111111111
لو حتي طرق وحشه بس ماشي بسرعات منخفضه مش هيحس بمطبات الهواء

المشاركة الأصلية كتبت بواسطة Elawany13

من سنة بالظبط الأستاذ شريف منير كتب عن حادثه بسبب مطب هواء
بالعملاق الأمانى
BMW
هذا هوه رابط الموضوع ده

http://www.nilemotors.net/Nile/215438-a.html






المشكلة ياجماعه مش مشكلة عربية قد ما هيه مشكلة اساءة استخدام العربية
إحنا اللى بنحول النعمة إلى نقمة
[img2]http://img546.imageshack.us/img546/7641/81ad1.jpg[/img2]
بدل ما تكون وسيلة لإسعادك وإسعاد أسرتك وقضاء حوائجك
اتحولت إلى آلة لقتل نفسك وغيرك
بسبب الطيش والتهور والرعونة

كلام مظبوط

المشاركة الأصلية كتبت بواسطة formulator

ربنا يرحم الطفلة, و يصبر والديها, ويجازيهم عنها خير isA
بس فـ السفر والسرعات العالية: الأطفال اللى عمرها شهور دى.. لاااااااااازم الكرسى الـIsofix ويتثبت كويس فـ الكنبة اللى ورا بالأحزمة, والطفل يتثبت فـ الكرسى.

لو طفل من سنة لسنتين: بتاخده على حجرك, وتربطه معاك بالحزام بتاعك.. ويفضل أصلا تقعد بيه ورا, أو تقعده لوحده ورا وتثبته بالحزام لو أكبر سيكا.
دى أساسيات..؟!!

بالنسبة لمطبات الهواء:
- المفروض ان العربية ماتطيرش من عـ الأرض؟؟!!! يعنى أيه الـ4 عجلات يفقدوا التماسك؟؟
- ولو طارت.. المفروض أول ماتنزل تكلبش فـ الأرض تانى (لو انت ماعملتش حاجة غلط, زى انك تدوس فرامل)..!!

دوسة الفرامل بتخلى العجلتين اللى قدام يمسكوا فـ الأرض (طبيعى عشان هما اللى بيعملوا Landing الأول)...
فـ الكارثة بتيجى من ان العجلتين اللى ورا بيبقوا لسه طايرين وماتماسكوش فـ الأرض..؟؟!!!
فـ بيحصل Oversteer بالضبط زى الـSnap-Oversteer وللأسف بيخلى العربية تـSpin حوالين نفسها.. أى حركة دركسيون غلط... بتتقلب.
الصح انك أول ماتنزل عـ الأرض تكمل بنزين, عشان تحافظ على الـTraction بتاع العربية..
العجلتين اللى قدام يجروا العجلتين اللى ورا معاهم على نفس الـTrack, ومايحصلش Ovesteer أو Spinــات.

شكرااا علي التوضيح يا باشا

المشاركة الأصلية كتبت بواسطة formulator

جزئية السيراتو عفشتها فيها مشكلة ولا لأ.. اتناقشت 100 ألف مرة فـ المنتدى,
أنا رأيى ان كل العربيات اللى بالـSetup ده (تصميم التورشن عند هيونداى-كيا, مش نظام تعليق الـTorsion-beam نفسه) فيها كارثة مش مشكلة بس..!!
يعنى: سيراتو-النترا 2012 (نفس الشاسيه)-سول-أكسنتrb (الشاسيه الأصغر)...وكده, يمكن الوحيدة اللى فلتت هى الكارينز عشان ملتى-لينك.

وبالدليل والورقة والقلم والصور (والتجربة) سواء فحصنا العربيات من تحت.. أو تجربة سواقة:
(تانى عشان اللى معرفش يعرف, واللى عارف يفتكر).. هههههههههههههه

قولنا كل الأوروبى (والهوندا فقط من اليابانى).. بتعتمد الـSetup بتاع الـEurope's Best Handling GTi's,
دون الدخول فـ تفاصيل كتير, الـSetup ده بيدى هاندلينج وثبات + تحكم فـ النعومة والراحة بتغيير السوست..

1- الـSetup الأوروبى: (رينو-بيجو-فيات-ستروين-أوبل-VW-فورد) بعضهم بيطبقه فـ B, C والبعض الآخر بيطبقه فـ B-Segment بس.

الرينو-ميجانIII




الفيات برافوII



بصوا يا أساتذة على مكان (وضعية) السوتة على الدنجل/القنطرة.. ومكان المساعدين.
السوستة للداخل, المساعد للخارج... Ok
فيه كمان Stabilizer/Anti-Roll bar ماشى جوا القنطرة كدا..
بعض الشركات بتغير فـ تصميم ووضعية البار ده.. لمزيد من الثبات, زى الأوبل/فوكسهول فـ الأسترا J/والانسجنيا.. الأسترا H/الفكترا C عادى زى الرينو والفيات والبيجو.




ده اسمه Watt's Link أو Z-Link, لكن يظل التعليق Torsion-beam بالـSetup الأوروبى زى الكتاب ما بيقول.

2- الهوندا فقط من اليابانى:
وبقول الهوندا فقط لأن التويوتا والنيسان ليهم Setup مختلف عن الأوروبى.. فـ تصميم الـTorsion/Twist-Axle نفسه؟؟

برضه دى عفشة الـEuro Civic Hatchback (أيوه السيفيك هاتش بتنزل أوروبا تورشن-بيم, مش زى السيدان عندنا):




للتوضيح أكثر فـ الهوندا.. دى عفشة الـCR-Z اللى المفروض انها أحد أفضل سيارات هوندا فـ الهاندلينج والثبات:




أفتكر كده بقت واضحة جدا, كل العربيات اللى فاتت دى.. ولا كلمة فـ الثبات؟؟!!!

نشوف السيراتو بقى:


طبعا نفضوا للبار الأبيض بتاع Ultra-Racing ده, اعتبره مش موجود (أو موجود عند عادل وجدى ومابيعملش حاجة)؟!! ههههههههههه

أيــــــــــــه ده؟؟؟!!

ايه اللى خلى المساعد يدخل لجوه أوى كده؟؟
وليه السوستة هى اللى برا؟؟ أيه أصلا السوستة الغريبة دى؟؟ (و مكان تثبيتها فـ فردة الشاسيه)!!!

وليه أصلا زاوية ميل المساعد لجوه جسم العربية؟؟؟!! المفروض يبقى مايل لبره (زى الميجانII مثلا)؟؟؟!!!
البار اللى ماشى جوا القنطرة.. ليه متثبت فيها بلحامات؟؟!! ليه مش Sliding على Bushes؟؟!!!
مين الغبى اللى عمل الـBull Sh*t ده؟؟!!!!!!

طبعا الكلام ينطبق بالمللى على الألنترا الجديدة, مع فرق ان السوست انعم سيكا.. (اللى ركب وجرب هيعرف الفروق البسيطة دى) لكن الثبات نفس الـSh*t

فـ الآخر ده رأيى (و رأى ناس كتييييييير) من Enthusiasm لـ ميكانيكية لحد مهندسين فـ توكيلات..
والكلام مدعوم بالصور وتجارب السواقة, اللى عنده حاجة غير كده يقولهالنا..
بس ياريت محدش يدخل يقولى احتقار الصناعة الكورى, وهيونداى-كيا مش عاف أيه؟؟!!!
طب ومصر فين وكوريا فين.. والكلام ده.

أنا ياعم مستهلك.. بس بفهم فـ الحاجة اللى بشتريها, وعارف أيه المضروب من الأصلى..

أنا مقولتش حاجة مش فيهم, هما لسه بيتعلموا صناعة عربيات.. (بس عشان بدأوا بـMentality غلط.. هيفضلوا أغبياء).
وبيطلعوا شغل Below Bar, وده مش فـ العربيات بس.. ده فـ كل الـMachines عموما..!! واللى دخل مصانع كبيرة هيعرف مين رقم 1, 2 و3.. ومين رقم 20, كـ أداء وجودة صنعة وProductivity مش كـ رقم مبيعات.

والله ياباشا اضافه جميله جداا وشكراا علي توضيح الفرق بين ال Setup الاوروبي والكوري
ومشاركات حضرتك فعلا بستفاد منها جدا ونورت الموضوع

المشاركة الأصلية كتبت بواسطة syd

اولا ربنا يرحم الطفلة ويصبر اهلها ويجازيهم خير عنها ويجعلها شفيعا لهم يوم القيامة

ثانيا
بصراحة السيراتو من اكتر العربيات الي عليها علامات استفهام والناس بتطلع فيها عيوب اكثر ما بتتكلم عن المميزات

عربيات كيا كانت عادية زيها زي اي عربية كوري تانية
باعت كتير من البرايد والسيفيا
نزلت الاسبكترا ومن وجهة نظري كانت ناجحة جدا رغم ان مبيعاتها قليلة مقارنة بالسيفيا والبرايد
اول لما نزلت في 2005 كانت نازلة تحل محل السيفيا والسبكترا وكانت عادية جدا جدا بردو زيها زي اي عربية كوري
لما نزل الجيل التاني منها (الشكل المنتشر جدا) ماعرفش ايه الي حصل للناس
تهافتت عليها بشكل غير عادي لدرجة خلت الناس ماتستناش لما تشوفها عملت ايه مع الناس الي اشتروها
وجايين النهاردة يقيموها ويكتشفوا عيوبها

عموما

شكرا علي التحذير

ثالثا
بالنسبة لمطبات الهواء
المفروض العربية ماتطيرش من علي المطب حتي لو علي سرعة
كل ماهونالك المساعدين بتفتح للأخر وبعد المطب بترجع تتقفل للأخر وبالكتير العربية لو اكصدامتها واطية او فيها عتب بتحك - ليس اكثر
ودة السبب انها لما بتعمل كدة انك بتحس ان روحك اتخطفت زي بالظبط لما تركب اسانسير وينزل بيك من دور عالي بسرعة كبيرة
بتحس نفس الأحساس

بيتدخل في الموضوع دة حاجات كتير كلها تابعة لتصميم الشاسيه وتصميم العفشة ووزن العربية

فعلا ياباشا كلام حضرتك مظبوط بس بالنسبه للجزئيه بتاعة الطيران من فوق مطب الهواء لو سرعة العربيه عاليه اوي احتمال كبير ان العربيه تتطير من فوق المطب مش ترتفع بس

المشاركة الأصلية كتبت بواسطة د.محمود صلاح

انها السرعة الزائدة .... وليس السيارة او عيب فيها

فعلا يا دكتور السرعه الزائده هي اساس اغلب الحوادث والمصايب اللي بتحصل
ربنا يستر

المشاركة الأصلية كتبت بواسطة donzi

لا حول ولا قوة الا بالله ربنا يصبر اهل البنت و يعوض عليهم خير ان شاء الله

بس معلش يا جماعة مش كل واحد يجيب عربية زيرو و امكانياتها 1 و 2 و 3 و 4 و ....... و يقول لنفسه خلاص انا كدا امااااااااان و يمشي على سرعات عالية و يخاطر و هوا متخيل ان العربية هاتأمنوا او هاتوفرلو الحماية اللازمة

لان في عيوب طرق عندنا بالهبل دا غير اخطاء الاخرين و في الحالة دي على سرعة عالية بيكون تفادي الحوادث صعب جداااااااااا و التحكم في العربية مهما كانت مش سهل و خاصة لو كان اللي بيسوق شخص عادي مش محترف سرعات و سباقات و عربيات

و بعدين نرجع نلوم على العربية لأ طبعا مش صحيح

كلام حضرتك مظبوط يا مدام دونزي
الطرق بتاعتنا متستحملش السرعات العاليه والعربيات اللي بتنزلنا اصلا عربيات تعبانه
ياريت كل الناس تاخد عظه وتلتزم وربنا يستر

أعتقد أن أغلب الحوادث اللي بتحصل في مصر سببها الاساسي و الأصلي
هما ال 85 مليون شوماخر

واحد قريب واحد صاحبي في أسيوط
طالع يجري على طريق زراعي هناك و بيبرطع زي العادة (المصرية الأصيلة - برطع زي %@#^&#$ )

المهم الطريق كان فاضي تماما
الكاوتش فرقع
نزل في ترعة لأنه كان معدي 140 و معرفش يتحكم في الكاوتش
مراته و بنته ماتوا
هو و أبنه عاشوا ......... أبن كان في الجبس و هو الوحيد اللي فيه خرابيش بسيطة لأنه كان مركب الحزام و الباقي مش معترف به .

هي بلد و لو مؤخذة %@^#&@#*$^%#%^#$
أحنا آخرنا شوية حمير بعربيات كارو و هو ده اللي يليق بعقليتنا

إنما عربيات حديثة و بتاع ............... مش لينا .... خليها للناس اللي بتسوق في حارات ..... مش أحنا فاكرين نفسنا على حلبة سباق
و لك يوم مئات بتموت على الطرق المختلفة
من أول أسوان لغاية أسكندرية .............. يمكن فيه حاجة في مياه النيل جايبة جنان للمصريني بتخليهم يكرهوا الصبر
مش عارف

المشاركة الأصلية كتبت بواسطة mazagngi2010

هو ده انهى نوع لانى بصمجى فى القصه دى؟

ده اللي هو العفشة المتصلة الخلفية و تُسمى بالانجليزية torsion beam