شكلها كده استقرار على الجيوك - مع إنها الوحيدة اللي ما عملتلها اختبار قيادة - وربنا يكرم في الإستخارة
وبناءا على طلب الأخوة - ده رأيي بعد قيادة كل واحدة منهم: (الترتيب من الأفضل للأقل - من وجهة نظري طبعا بس ده مش مقياس عشان المسافة صغيرة جدا ومعظم الأوربي هيتظلم عشان التجميع)
1- اللانسر 2012 - 1600cc: بسبب التعليق الخلفي الملتي لينك وكيك داون الرائع بعد الموتور الجديد - حسيت إني راكب الصاروخ في دريم بارك (باختصار طلقة) - عالية شوية عن الأرض فلما اخدت ملف واسع في الصحراوي على 80 كده حسيت إنها الشنطة ورا بتحدف والسوست بتطلع وبتنزل كده (فكترني شوية بالياريس)
2- الفوكس: ثبات علي تجميع معقول جدا - الفتيس ماكانش فيه مشكلة مع إني خايف منه - الطارة مع إنها شيك بس عشان محيطها صغير مكنتش عارف اتابع العدادات قوي - بس كت حاسس بالنقله التانية بس عشان كنت مركز معاها من واسواستي للفيتيس- بس اتزان علي وتقل على الارض بصراحة. تكيف حلو قوي على فكرة
3- الاسترا: من أول لما تدور الكونتاكت تحس إنك راكب مكنة محترمة (عدادات نورها مبهر - تروح للاخر وتيجي زي عربيات السباق - ليد ليزر أحمر في كل حتة في الصالون الداخلي ) - تبقى راكب جواها وحاسس بثقة في نفسك وكأنك راكب قطر على قضبان ملساء ومفيش عائق امامها - ثبات ولا اروع -الشاسيه والعفشة فعلا متحسش بحاجة - واطية شوية - الجنط 17 حسيت إنه مش ميزة.. التجميع مش هتكلم فيه عشان المسافة صغيرة والطريق زحمة. مشكلتي معها السعر العالي بصراحة من غير أي نوع من أنواع الحساسات + مفيش فتحت سقف - مفيش بلوتوث - مفيش زجاج مظلل ...الخ
4- ال C4 : تكيف تعبان جدا - الكيك داون اضعفهم كلهم - ثبات مقبول - بس مع المطبات والحفر حسيت إني راكب مرجيحة (مش عارف ده حلو ولا وحش) الناقلات مش محسوسة خالص - رؤيه العدادات الديجيتال في الشمس زي الزفت
طبعا ده تحليل هاوي جدا - ومش محترف وممكن مش يفيد أي حد - واعتذر على كده- أتمنى لو في سؤال بالتحديد قوللي عالية وأنا تحت الأمر...
المفضلات