الموضوع: دعوة للمطالبة بتجربة القيادة قبل الشراء .....حقك ما تتنازلش عنه

الموضوع ده ليه شقين

الأول سؤال ...إيه توكيل السيارات اللي بيتيح لعملائه تجربة السيارة قبل الشراء .....كذا موضوع الناس قالت إن فيه تست درايف متاح في التوكيل الفلاني فيا ريت نجمعهم كلهم هنا و يبقى معروف للكل

الشق الثاني دعوة لجميع الأعضاء الكرام لطلب عمل تست درايف قبل شراء أي عربية مهما كانت و إسمحولي ببضع ملاحظات :

- العميل المصري بيدفع تمن أكتر من أي حد تاني في عربيات أقل في المواصفات و الكماليات من أي سوق تاني
- العميل المصري لا يحق له تجربة قيادة السيارة حتي لو حيدفع ١٠٠ و لا ٢٠٠ ألف .......حتى كان في موضوع عن صاحب معرض مش عايز العميل يدخل العربية و لا يلمس أي حته فيها ..لا و بيزعق فيه كمان
- جزء كبير من مشكلات الناس في العربيات الجديدة إن العربية طلعت مش بالمستوي المطلوب سواء في القيادة أو الكماليات ...أشهر مثل حاليا الكورولا الجديدة و الفتيس ال-MMT اللي الناس شارية العربية على إنه أقرب للاوتوماتيك و أصابهم خيبة أمل بعد التجربة العملية
- تجربة القيادة حق أصيل للمشتري و للاسف مسلوب منه و ما فيش حل غير إننا نطالب بيه لأن ما فيش جهة حتى الآن ممكن تطالب بيه لينا

...أخر حاجة أحب أحكيلكم على تجربتي في شراء عربية في كندا .....بعد حوالي سنة و نص من تأجير عربيات مختلفة قررت اشتري عربية ... و لأني مش متأكد أني حاقعد في كندا كتير كنت عايز عربية اعتمادية و صيانتها سهلة و توكيلها محترم و كمان تبقى سهلة في إعادة بيعها لو قررت أسيب كندا ......استقريت على كورولا ..حجزت ميعاد تست درايف بالنت ...يوم التجربة قابلني الموظف المختص ...سمع احتياجاتي كلها .....طلعت جربت الكورولا ..لما لقاني مختار أعلي موديل في الكورولا طلب مني (هو اللي طلب !!) اني أجرب الكامري لأن سعر الموديل الأساسي قد سعر الكورولا اللي أنا مختارها .....طلعت جربت الكامري 2.4L ما عجبتنيش طلب مني (تاني ) أجرب الموديل الاعلي 3.5L بتجهيزات رياضية .. بعد التجربة قولتله كويسة بس ما تناسبش احتياجاتي دلوقتي ...قالي إنه عارف إن الكورولا مناسبه ليا لكن هو عايزني أجرب عربيات تانية عشان لما أغير الكورولا أجيب تويوتا برضه!!!!! و عنها طلب مني أجرب ال-FJ cruiser و ال-RAV 4 (أعلى موديل فيها ) قعدت يومها من ٨ الصبح لحوالي ٦ بليل أجرب في عربيات لحد ما المدام زهقت و قالتلي كفاية..... فاضطريت أمشي ؟!!! على فكرة مواعيد العمل يوميها كانت لحد خامسه و التوكيل كان فاتح مخصوص عشاني ...و أنا شاري كورولا .... يعني مفيش أقل منها غير الياريس ؟!!!!!
أنا مش بقول نبقى زاي كندا بس على الأقل نحصل على الحد الأدني من حقوقنا ..و لا إيه ؟!!!!!!!