الموضوع: ما هو اكثر موقف مضحك وهو سايق او له علاقه بالسيارات

بحى كل اللى اشترك فى الموضوع الثورى دة وليا موقف

كنت فى ثانوى وعايش لوحدى فى البيت المهم كنت متعود اصحى الصبح كل يوم اروح المدرسة
المهم فى يوم من الايام صحيت اوتوماتك على الحمام وبعد الحمام لبست ونزلت رايح على المدرسة المهم لقيت عيال صحابى واحد منهم مسلك عربية 132 من ابوة ومتجمعين على اساس يخرجو بيهااا بس العربية مش راضية تدور وعمالين يزقوهاااا
انا بصراحة قلت هزق معاهم عشان طبعااا الشهامة والجدعنة ثانيااااا عشان لما تدور يوصلونى المدرسة بالمرة ويوفرو عليااا المشى لحد المدرسة
قعدناااا اكتر من نصف ساعة نزق فى العربية لحد مانفسنااا اتقطع مش راضية تدور ابداااا
وكنت عاوز اخلع منهم عشان اتأخرت على المدرسة بس قلت ياواد شكلى هيبقى وحش ولازم افضل معاهم
قووووووم فى النهاية نكتشف ان العربية مش راضية تدور عشان مفيهاش بنزين
طبعاااااا انا اتنرفزت من العيال المسطولة دى وقلت اروح الحق المدرسة
رحت جرى على المدرسة الاقى الباب مقفول ...ناديت على البواب عشان يفتحلى
بيقولى انتا اية اللى جابك ؟؟؟؟؟النهاردة شم النسيم واجازة رسمى


اكتشفت انى انا اللى مسطوووووووووووووووووووووو ووووول

موقف تانى بأه مع العربية البيجو بردو 504 ..
العربية دى كانت واكلاها البرومة ومخرومة من كل النواحى .. المهم انا فى يوم كنت رايح بيها مشوار ومستعجل .. وماشى فى امان الله ورجلى على البنزين ..لقيت فار على رجلى

وانا بكرررررررررررررررررره الفيران جداااا وبتأرف منهم جدااااااااااااااا ... انا طبعا اول ماشفت الباشمهندس ده طرت من العربيه وهى ماشية والحمد لله ان العربية كانت ماشيه براحه جدااا والحزام مكنش مربوط عشاان الحزام لو كان مربوط انا كان اغما عليا من الارف ..

المهم مركبتش العربيه ساعتها واتصلت بالناس اللى انا رايحلهم وقلتلهم فى فار فى العربيه وانا مش جااااى .. وفضلت اخبط على الكرسى بتاع السواق لحد ما الفار طار من العربيه ( اول مره اشوف فار بيطير) ..
ودى كانت احدى حكاياتى مع الفيران اللى هى كتير .

هى حاجات صغيرة
الأول : كنت رايح اخد اخت مراتى من بيتها وانا فى الطريق مراتى رنت عليها علشان تنزل الشارع وانا وصلت وركنت لقيتها نزلت وراحت عند عربية اكسنت بنفس لون عربيتى ولقيتها بتقول افتح الشنطة ولقيت شنطة العربية اتفتحت وحطت اللى معاها وقفلتها وراحت ركبت فيها واحنا بنتفرج وبعد ما ركبت لقيتها نزلت ولونها مغير وجابت حاجتها من الشنطة انا ضربت كلاكس خدت بالها منى وجات عندنا
هى اتلخبطت فى العربية ولما ركبت لقت واحد غيرى هو اللى سايق والراجل ما علقش

الثانى : كنت لسه واصل اسكندرية انا وأولادى وبادور على شقة أؤجرها للمصيف لحد ما وصلت ميامى ربنا كرمنى بسمسار دخلت معاه بالعربية شارع من شارع المهم الشارع يا دوب يعدى عربية علشان العربيات راكنة على الصفين وبعد ما دخلت لقيت طابور عربيات جاى على وكان على يمينى منزل جراج
المهم البيه السمسار قالى انزل لحد ما العربيات ما تعدى انا نزلت ووقفت على المنزل بوشى وبعد كده لقيته بيقول ارجع ارجع طبعا انا على منزل وراجع أطلع المنزل بضهرى يعنى مش شايف اللى ورايا وكبست بنزين وفجأة سمعت دب بصراحة اتخضيت نزلت تانى ووقفت على منزل الجراج وشديت فرامل اليد ونزلت اشوف ايه اللى حصل وعينك ما تشوف الا النور لقيت حضرتى دخلت فى عربية اقل ما يقال عليها لسه بشوكها (باكياسها) والباب الخلفى خلف السائق فى خبر كان - بصراحة الراجل طلع محترم مسك السمسار بهدله وطلع على عينه القديم والجديد وما فتحش بقه معايا بكلمه وانا طبعا ماليش دعوة واقف اتفرج
بعد كده ركبت العربية وفكيت فرملة اليد قبل ما دور الموتور وفى ثانية لقيت عربيتى لابسة فى عمود البرج اللى تحتيه الجراج (حوالى 15 دور) الناس اتلمت وزقت العربية ونزلوها فى الجراج - سربنتينة التكييف اتعوجت وخزنة الرادياتير اتكسرت وقعدت اصلح فيهم 10 ساعات (اول يوم مصيف)

الثالث : كنت منتظر زميلى فى العمل فى شارع فيصل بالجيزة كنت انا ومراتى وكنت من غير سيارتى - الباشا حضر ونزل سلمت عليه وبالحضن ولقيته ركب يمين وقالى سوق (لسه متعلم جديد) دورت وسوقت وروحت اول مشوار نزلنا قضينا مشوارنا ورجعت انها تدور لا يمكن دورنا على كهربائى قعد يعك فدارت وقال محتاجة كتاوت للمارش غيرناه ورحنا مشوار تانى فى شارع الهرم طفيت وجيت اجرب ما رضيتش تدور ولقيت الكاوتش لقط مسمار وريح قلت بالمرة غيرت الكاوتش لقيت الاستين مهوى (علشان تكمل) المهم رحنا لكهربائى تانى جبناه اشتغل دارت العربية المهم ظبطنا الكاوتش وقلتله خلاص انا هاروح وانت روح من هنا اقرب ليك (ساكن فى امبابة) وانا رايح عند حدائق الأهرام بعد ميدان الرماية الراجل اصر انه يوصلنا بالعربية - المهم وصلنا ولفتله العربية فى اتجاه العودة وتصحبك السلامة المهم انا وصلت الفيوم ورنيت عليه لقيته العربية عطلت منه فى شارع الهرم وبيلف على كهربائى لحد ما وصل بيته بعد انا ما وصلت الفيوم بساعتين الحوارات دى ابتدت الساعة 2 بعد الظهر خلصت الساعة 1.5 صباحا تقريبا المهم مراتى كل شوية تقولى الراجل هيقول انك نحستله العربية رحت قولتله الكلمتين وهى دلوقتى بقالها اربع شهور شغالة عطلت منه مرة واحدة بس وبرضه كانت فى شارع فيصل

طولت عليكم واعذرونى اسلوبى ركيك فى الكتابة.