الموضوع: ما هو اكثر موقف مضحك وهو سايق او له علاقه بالسيارات

العفو يا استاذ mbassal بس كنت بلغت البوليس علي الحرميه الجدعان دول بس انا لو مكانك كنت اتغديت معاهم واهو بتمن السبعين جنيه الي دفعتهم
ولا كنت اضرب معاهم صحوبيه وكل محد محفظته تتسرق اتصل بيهم قلهم المحفظه الي انتو لقيتوها دي بتاع واحد يخصني وحقكو محفوظ يا رجاله ههههههههه
لا بس بجد كنت تبلغ البولييس
جامد حوار منعم الي فجر الفزبا ده ههههههههههههههه

لا بس بجد كنت تبلغ البولييس

لو عايز الحق ، طبعاً كلامك سليم اللى يسرق لازم يتعاقب علشان ميعملش كده تانى ، "ولكم فى القصاص حياة"

بس كان لو كنت بلغت عن أساميهم ، وعلى م الشرطة تتحرك ، يكوانوا هربوا وأنا اللى كنت هدوخ على الحاجات اللى راحت مع المحفظة ، خد بالك أنهم كانوا مراقبينا من غير م نعرف ، أمال "فاعل الخير" طلع لنا ازاى؟

أنا حصلي مواقف كثير افتكر منها اثنين

الأول كان في زفة أخو صاحبي وكانت في طنطا بس كانت العروسة من القاهرة فأهلها كلهم جايين وماشيين في الزفة مش عارفين حاجة في طنطا وماشيين ورايا لأن عربيتي كانت ملاكي جيزة وافتكروني تبعهم المهم الزفة ماشية لقيتها عدت جنب البيت بتاعي فقلت كفاية كده بقا على الزفة ولفيت من شارع جانبي علشان اوصل البيت لقيت كل العربيات اللي ورايا لفت معايا وانا اشاورلهم علشان يرجعو ثاني وهمه مش فاهمين لحد ما ركنت قدام البيت وقعدت اشاورلهم يلحقو الثانيين ازاي وهمه كانو مخنوقين مني خنقة سودة

الثاني كنت مسافر زيارة للسعودية لوالدي اللي بيعمل هناك وكان عنده عربية شيفرولية كابريس قديمة جدا وكانت عزيزة عليه قوي لأنها معاه من زمان ولما اشترى عربية جديدة جه يبيعها لقاها برخص التراب فاستحرم يبيعها وسابها عنده
المهم اني كنت بستعملها وانا هناك ومرة كانت العربية الجديدة عطلانة وهوه نازل الشغل وهياخد القديمة لقيته بعد ما نزل رجع ثاني وهوه قمة في الانبساط وبيقولي العربية اتسرقت يا محمد قلتله لا اصلي راكنها في المكان الفلاني زعل جدا وكان نفسه تتسرق علشان نفسه مش جايباه انه يبيعها بسعر رخيص

افتكرت كمان موقف

ابن عمي غاوي صيد ومرة قعد يقنع فيه اننا نروح في رحلة الى احد القرى النائية لأن هناك النيل مليان خير (مش عارف اشمعنى هناك) المهم رحنا وفي الطريق لقيت مزلقان والقطر متعطل عليه فوقفنا حوالي ساعة على ما يصلحو القطر وطبعا كان في وسط بلدان فلاحين معزولين تماما عن العالم كنت انا الوحيد اللي واقف على المزلقان بعربية والباقي كله ببهايم (ربنا يعزكم) وتسمع تعليقات الناس على البشوات اللي في عربية تقول كأنهم اول مرة يشوفو ناس راكبين عربية
المهم لقيتلك جاموسة واقفة جنبي في المزلقان وكانت قريبة جدا من الشباك وقرفت منها وقفلت الشباك ويا ريتني ما قفلته... الجاموسة قعدت تلحس الزجاج بلسانها وطبعا انتو متخيلين المنظر من جوه هيكون عامل ازاي... الحمد لله اني كنت لسه مفطرتش يومها

كمان موقف انا عارف اني عامل زي العواجيز شغال افتكر بالتدريج بس معلش استحملوني

هوه موقف حصل لصحابي كانو طالعين رحلة تبع الجامعة للغردقة وسفاجا بس مكنتش معاهم (همه حكولي)

كانو عايزين يقضو حاجتهم فاستأذنو من السواق بتاع الاتوبيس فوقف ونزلو الشباب على جنب الطريق وادو وشهم لجبل ولقو كل اللي في الاتوبيس نزلو ووقفو جنبهم وبقو عاملين طابور في جنب الطريق
وبعدين في النص لقو واحد محترم معاه عربية فيرنا ومعاه زوجته راح واقف جنب الاتوبيس ونزل وقف في الطابور وقضى حاجته
طبعا بيقولو انهم من كثر الضحك كانو هيلوثو نفسهم من المنظر

وقصة كمان
واحد كان على طريق طنطا المحلة وكان راجل شكله محترم ولابس بدلة وراكب مرسيدس عيون وقف جنب الطريق علشان يقضي حاجته وظهره للطريق والظاهر انه من الاستعجال نسي ان وشه لسكة قطار
والمنحوس في الوسط لقى قطار عدى من قدامه والناس كلها بتتفرج من الشباك......