بالنسبة لي أنا راضي عن السيارة وده علشان هي صفقة رابحة مقارنة بباقي السيارات في مصر ولكن أنا غير راض عن التوكيل ودي حاجة ملهاش علاقة بالعربية مع أنه يعتبر توكيل كويس مقارنة بباقي التوكيلات المصرية السيئة وهأوضح رأي في العربية على شكل نقاط :
- بالنسبة للمساحة الداخلية فهي أكبر مساحة داخلية في فئتها من حيث أماكن الجلوس الخلفية - كرسي السائق وطبعاً مساحة شنطة السيارة واسعة لدرجة أني بضطر أرمي نفسي جوا علشان أوصل لملمع الجلد في آخر الشنطة .
- بالنسبة للشكل الخارجي نقطة محسومة العربية حققتلي معادلة صعبة عربية عائلية بشكل الكوبية الرياضية أفتكر أول ما نزلت كنت أقف قدام معرض العربيات وأبصلها مذهول والله وكنت أقف أكلمها وأقولها يخربيت عقلك أيه الجمال ده هههههه .
- بالنسبة للتسارع بصراحة فوق الممتاز ومش عاوز تسارع أكتر من كدة بصراحة وأنا سواقتي كلها رياضية وفيها تسارع وشد وتسقيط نقل ومش تحيز للعربية لأن سوقت عربيات كتير وعمر مالواحد هيفضل معاه عربية واحدة بس بأمانة العربية دي موتورها صاحي ومتجاوب بشكل كبير .
- بالنسبة للفتيس هاديء ومريح وسريع الأستجابة .
- بالنسبة لعزل العربية فأنا راضي عنه تماماً مقارنة بالكورولا والمازدا الجداد يعني كلهم متقاربين في المستوى .
- بالنسبة لأستهلاك البنزين مش هأقدر أكون حيادي وموضعي في النقطة دي لأن نادراً لما بشوف لمبة الأيكو شغالة وبالتالي علشان سواقتي كلها سريعة مش هأتكلم عن تجربتي مع أستهلاك البنزين .
- بالنسبة لشكل التابلوه شايف أنه كويس جداً وشيك جداً يعيبه نقطتين الأولى هي البلاستيك المستخدم بكثره والثانية هي فتحات التكييف في منتصف التابلوه مفروض يظبطوا مكانها أفضل وده اللي حصل مع النسخة الصينية للألنترا 2013 وده متوقع يعتمدوه في كل العربيات الألنترا في العالم مش الصين بس .
المفضلات